- 2017-09-13 23:20:00
- ជំនឿ
ល្បីថាមានយុវតីម្នាក់យាយម៉ៅចូលសណ្ឋិតព្យាបាលជំងឺពូកែ
- 2017-09-13 23:20:00
- ចំនួនមតិ 0 | ចំនួនចែករំលែក 0
ល្បីថាមានយុវតីម្នាក់យាយម៉ៅចូលសណ្ឋិតព្យាបាលជំងឺពូកែ
ចន្លោះមិនឃើញ
ថ្មីៗនេះក្នុងទឹកដីខេត្តកំពង់ចាម មានយុវតីម្នាក់ដែលអ្នកស្រុកល្បីថាលោកយាយម៉ៅពេជ្រនិលចូលរូប និងល្បីថាមានឫទ្ធិពូកែអាចព្យាបាលជំងឺរបស់អ្នកផងទាំងពួងបានដោយគ្រាន់តែយកទឹកដែលយុវតីនោះកូហើយមកទទួលទានក៏បានជាសះស្បើយ។
យុវតីដែលល្បីថាមានយាយម៉ៅចូលសណ្ឋិតនោះរស់នៅក្នុងភូមិអង្គរជ័យ ឃុំមហាខ្ញូង ស្រុកកោះសូទិន គឺមានចំងាយប្រហែលជា១៩គីឡូម៉ែត្រពីទីរួមខេត្តកំពង់ចាម។
ម្តាយរបស់យុវតីរូបនេះគឺអ្នកស្រី យឿន ស្រី ថ្លែងប្រាប់ Sabay ថាកូនអ្នកស្រីដើមឡើងមានជំងឺប្រចាំកាយមើលមិនជានោះទេ តែក្រោយមកក៏បានគ្រូខ្មែរម្នាក់ជួយព្យាបាល ដោយថាកូនអ្នកស្រីមានជាប់សង្វារ និងត្រូវរៀបចំសែនព្រេនថ្វាយសង្វារទើបជា។ អ្នកស្រីបន្តថានៅពេលនោះគឺនៅរដូវភ្ជុំបិណ្ឌ ឆ្នាំ២០១៦កូនអ្នកស្រីបានរៀបចំថ្វាយសង្វារ និងមានយាយម៉ៅចូលសណ្ឋិតតាំងពីពេលនោះដែរ។ អ្នកស្រីបន្តថាកូនអ្នកស្រីបានមជាពីជំងឺ និងមានលទ្ធភាពព្យាបាលអ្នកដទៃផងដែរ។
ម្តាយយុវតីរូបនេះបន្តថា កូនអ្នកស្រីព្យាបាលជំងឺដោយកូទឹក និងសូត្របាលីខ្លះផ្សុំជាមួយគ្នាមុននឹងឲ្យអ្នកជំងឺបរិភោគ។អ្នកស្រីអះអាងថាពិតជាមានអ្នកជំងឺដែលជាដោយសារការព្យាបាលនេះមែន។
អ្នកស្រីឲ្យដឹងទៀតថាអ្នកមានជំងឺក្រពះ ពោះវៀន រោគស្រ្តី បានមករកកូនអ្នកស្រីឲ្យព្យាបាលដែលអ្នកទាំងនោះមានមកពីខេត្តរតនគិរី ត្បូងឃ្មុំ ព្រះវិហារ ភ្នំពេញ និងអ្នកកំពង់ចាមជាដើម។
លោក សុភក្ត្រ រស់នៅស្រុកកំពង់សៀម ក្នុងខេត្តកំពង់ចាម ប្រាប់ Sabay ថាឳពុករបស់លោកមានជំងឺក្រពះ ពោះវៀន សម្រាន្តមិនលក់ បានទៅរកការព្យាបាលពីយុវតីនោះដែរ និងថាបានធូរស្រាលជាងមុនក្រោយបានពិសាទឹកមន្តនោះ។
ចំណែក អ្នកស្រី ដួង ណុប មកពីខេត្តត្បូងឃ្មុំ ប្រាប់ Sabay ពេលដែលអ្នកស្រីមករកយុវតីនោះព្យាបាលថាអ្នកស្រីមានជំងឺរោគស្រ្តី ដែលថាការព្យាបាលកន្លងមកមិនបានធូរស្បើយ ទើបថាពេលនេះអ្នកស្រីសម្រេចមកសុំទឹកមន្តពីយុវតីយាយម៉ៅសណ្ឋិតនេះវិញម្តងដោយថាក្រែងបានធូរស្បើយ។ អ្នកស្រីឲ្យដឹងថាបងប្អូនអ្នកស្រីដែលរស់នៅកំពង់ចាមនេះប្រាប់គាត់ថាយុវតីនេះល្បីថាអាចមើលជំងឺជាច្រើនយ៉ាង ទើបគាត់សម្រេចចិត្តមករកការព្យាបាល។
ទោះជាយុវតីយាយម៉ៅចូលរូបនេះល្បីដល់ខេត្តដទៃក៏ពិតមានតែអ្នកក្នុងស្រុកកោះសុទិនម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះថាគាត់មិនបានដឹងថាមានយុវតីមានយាយម៉ៅសណ្ឋិន និងអាចព្យាបាលជំងឺបានច្រើនយ៉ាងបែបនេះនោះទេ៕
