- 2017-12-12 02:24:36
- សេដ្ឋកិច្ច
អាជីវកម្មភ្ញាស់កូនមាន់ លក់បានប្រាក់ខ្ទង់ពាន់ដុល្លារ ក្នុងមួយខែៗ
- 2017-12-12 02:24:36
- ចំនួនមតិ 0 | ចំនួនចែករំលែក 0
អាជីវកម្មភ្ញាស់កូនមាន់ លក់បានប្រាក់ខ្ទង់ពាន់ដុល្លារ ក្នុងមួយខែៗ
ចន្លោះមិនឃើញ
បុរសម្នាក់ដើមឡើយជាពេទ្យសត្វប្រចាំភូមិនោះទេ តែដោយធ្លាប់បានឆ្លងកាត់វគ្គបណ្តុះបណ្តាលពីវិធីភ្ញាស់កូនមាន់ និងការរៀបចំផែនការអាជីវកម្មផងនោះ បុរសជាពេទ្យសត្វរូបនេះបានសាកល្បងអាជីវកម្មខ្នាតតូចមួយនេះ។
លោក រស់ ញ៉ រស់នៅភូមិអូផុត ឃុំអង្គតាសោម ស្រុកត្រាំកក់ខេត្តតាកែវ។ លោកថាដើមឡើយលោកជាអ្នកដើរព្យាបាលសត្វឲ្យអ្នកនៅក្នុងភូមិ តែថាក្រោយបានទទួលការបណ្តុះបណ្តាលពីអង្គការ People In Need លោកក៏ចាប់អារម្មណ៍លើអាជីវកម្មភ្ញាស់កូនមាន់។
លោកឲ្យដឹងថាដំបូងឡើយលោកសាកល្បងតែមេមាន់១០ក្បាល និងទូភ្ញាស់មួយប៉ុណ្ណោះ តែដោយមើលឃើញពីតម្រូវការទីផ្សារខ្ពស់លោកក៏បានបន្ថែមចំនួនមេមាន់ដល់១០០ក្បាល និងទូភ្ញាស់កូនមាន់ដល់ចំនួន៥គ្រឿង។
លោកបន្ថែមថាៈ «ឃើញពីឱកាសទីផ្សារ មានអ្នកប្រកបរបរនេះតិច តែមានអ្នកទិញច្រើន»។ បើតាមលោក រស់ ញ៉ ក្នុងមួយខែលោកអាចភ្ញាស់កូនមាន់បានចន្លោះពី២ ៥០០ក្បាលទៅ៣ ០០០ក្បាល ដោយកូនមាន់មួយលោកលក់បានក្នុងតម្លៃចន្លោះពី៣ ៥០០រៀល ទៅ៤ ០០០រៀល។ លោកបញ្ជាក់ថាកូនមាន់ដែលលក់ចេញនេះសុទ្ធតែបានចាក់វ៉ាក់សាំងការពារជំងឺរួចរាល់ទាំងអស់ ដែលចំណុចនេះ លោកថាកូនមាន់អាចធន់នឹងជំងឺ និងលូតលាស់បានល្អពេលយកទៅចិញ្ចឹម។
បើតាមលោក រស់ ញ៉ ក៏មានដែរអតិថិជនខ្លះទិញតែកូនមាន់ទេ ហើយយកទៅចាក់វ៉ាក់សាំងដោយខ្លួនឯងដែលកូនមាន់មិនទាន់ចាក់វ៉ាក់សាំងនេះមានតម្លៃទាបជាងកូនមាន់ដែលចាក់វ៉ាក់សាំងរួច។
ចំពោះលោក រស់ ញ៉ ចំនួនកូនមាន់ដែលភ្ញាស់បានប៉ុណ្ណេះមិនទាន់ពេញចិត្តលោកនៅឡើយទេ ដោយថាលោកមានបំណងបន្ថែមមេមាន់មួយចំនួនទៀត ដើម្បីសម្រេចឲ្យបានការភ្ញាស់កូនមាន់ចន្លោះពី៧ ០០០ក្បាល ទៅ៨ ០០០ក្បាលក្នុងមួយខែ។ ចំនួននេះលោកថាអាចនឹងបំពេញតម្រូវការដែលកំពុងហក់ឡើងខ្លាំង។ តម្រូវការហក់ឡើងខ្លាំងដោយថាអតិថិជនរបស់លោកមិនមែនតែអ្នកនៅក្នុងស្រុកភូមិប៉ុណ្ណោះទេ ប៉ុន្តែមានទាំងអ្នកខេត្តកំពត និងកំពង់ស្ពឺផងដែរ។
សម្រាប់ប្រធានគម្រោងអង្គការ People In Need ទទួលបន្ទុកខាងបណ្តុះបណ្តាលការចិញ្ចឹមសត្វលោក ជួន ប៊ុណ្ណារ៉ា មានប្រសាសន៍ថាអង្គការរបស់លោកគាំទ្រលើសេវាកម្មប្រើប្រាស់និងថែរក្សាវ៉ាក់សាំងព្រមទាំងផ្តល់ការបណ្តុះបណ្តាលការធ្វើផែនការអាជីវកម្មផ្សេងៗ។
លោកថាគម្រោងនេះអង្គការPeople In Need បាន ធ្វើការតាមដានពីស្ថានភាពចិញ្ចឹមសត្វរបស់កសិករក្នុងតំបន់គោលដៅជាប្រចាំ ទាំងការថែទាំនិងការប្រើប្រាស់ថ្នាំ។ លោកបន្តថាក្នុងករណីដែលមានផ្ទុះជំងឺ កសិករផ្សេងៗទៀតអាចមកទទួលយកបពិសោធន៍ទាំងនេះពីកសិដ្ឋានខាងលើបាន។ លោកបានចាត់ទុកថានេះថាជាគម្រោងដែលកំពុងទទួលបានជោគជ័យ«បំផុត»៕
