- 2018-05-18 09:25:06
- ចរាចរណ៍
អ្នករត់កង់បីខ្មែររកចំណូលសឹងតែលែងបាន កំពុងប្រកាសអាសន្នធំហើយ
- 2018-05-18 09:25:06
- ចំនួនមតិ 0 | ចំនួនចែករំលែក 0
អ្នករត់កង់បីខ្មែររកចំណូលសឹងតែលែងបាន កំពុងប្រកាសអាសន្នធំហើយ
ចន្លោះមិនឃើញ
រ៉ឺម៉កកង់បីបានក្លាយជាមធ្យោបាយធ្វើដំណើរដ៏ពេញនិយមសម្រាប់អ្នករាជធានីភ្នំពេញ ជាច្រើនឆ្នាំមកហើយ។ ប៉ុន្តែ១ឆ្នាំចុងក្រោយនេះ អ្នកប្រកបរបររត់កង់បី ដែលពលរដ្ឋខ្មែរភាគច្រើនតែងហៅថា «ទុកទុក» នោះកំពុងប្រឈមការធ្លាក់ចំណូល និងបាត់ម៉ូយយ៉ាងគំហុក ក្រោយរ៉ឺម៉កកង់បីឥណ្ឌាបានក្លាយជាមធ្យោបាយធ្វើដំណើរបែបបច្ចេកវិទ្យាមួយបែបទៀតនៅភ្នំពេញ។
លោកពូ ឡី សុភ័ក្រ ប្រកបរបររត់កង់បីជិត៨ឆ្នាំមកហើយ កំពុងប្រកាសលក់រ៉ឺម៉កកង់បីរបស់ខ្លួន ក្រោយពីរកម៉ូយដឹក លែងបាន។ បុរសវ័យ៣៤ឆ្នាំរូបនេះ ប្រាប់ថា ចំណូលរកបានពីការប្រកបរបរនេះគឺធ្លាក់ចុះ៥០% កាលពីមិនទាន់មានរ៉ឺម៉កកង់បីឥណ្ឌា១ថ្ងៃយ៉ាងហោចណាស់ក៏បាន៤ម៉ឺនរៀលដែរ តែឥឡូវរកតែ២ម៉ឺនរៀលមិនចង់បានផង។
ភ្ញៀវដែលលោកធ្លាប់ដឹកពីមុនៗ គឺងាកទៅជ្រើសរើសរ៉ឺម៉កកង់បីឥណ្ឌាវិញអស់ហើយ។ មូលហេតុនេះ លោកពូ សុភ័ក្រ លើកឡើងថា ដោយសារតម្លៃតែម្ដង។ រ៉ឺម៉កកង់បីឥណ្ឌាជិះក្នុង១គីឡូម៉ែត្រតែ ១ ២០០រៀលទេ។ ចំណែករ៉ឺម៉កកង់បីខ្មែរ គិតតាមជិតតាមឆ្ងាយ និងតម្លៃមិនក្រោម១ម៉ឺនរៀលឡើយ។ ដូច្នេះបើធ្វើដំណើរដំណើរតាមកង់បីឥណ្ឌាយ៉ាងច្រើនភ្ញៀវចំណាយអស់ត្រឹមតែ ៦ពាន់រៀលគឺទៅដល់គោលដៅហើយ។
អ្នករស់នៅម្ដុំស្ពានអាកាសក្បាលថ្នល់រូបនេះ បន្តថា ខ្លួនក៏ចង់ទិញរ៉ឺម៉កកង់បីឥណ្ឌាដែរប៉ុន្តែគ្មានលទ្ធភាព ព្រោះតម្លៃដល់ទៅ៣០០០ដុល្លារឯណោះ។ អ៊ីចឹងហើយ ទើបលោកចេះតែទ្រាំរត់រកតិកតក់ៗ ដើម្បីរកកម្រៃចិញ្ចឹមគ្រួសារ។ បច្ចុប្បន្នលោកពូ ឡី សុភ័ក្រ កំពុងប្រកាសលក់កង់បីចាស់ ដើម្បីទិញកង់បីខ្មែរថ្មី ក្រែងអាចទាក់ទាញភ្ញៀវខ្លះមកវិញ។ លោកពូនិយាយថា៖ «ដោយសារឥឡូវអ្នកភ្នំពេញសុទ្ធតែស៊ីវិល័យ គេមិនជិះកង់បីចាស់ៗទៀតទេ គេរកតែតាក់ស៊ី កង់បីឥណ្ឌា តម្លៃថោកហើយលឿនទៀត។»
ចំណែកឯអ្នកលក់កង់បីខ្មែរ និងជាអ្នករត់ផងនោះ លោក មាស សារ៉ា រអ៊ូថាកង់បីខ្មែរធ្លាប់តែលក់ដាច់ខ្លាំងកាលពី៥ឆ្នាំមុននោះ ឥឡូវមួយខែមិនទាន់មានអ្នកមករកទិញម្នាក់ផង។ ចំណែកឯរឿងរកម៉ូយដឹកកាន់តែលំបាកទៀត ពីមុនធ្លាប់រកបាន១ថ្ងៃអាចដល់១០ម៉ឺនរៀល តែពេលនេះ២ម៉ឺនរៀលហៅម៉ូយចង់ខ្សោះខ្យល់។ លោកថា រ៉ឺម៉កកង់បីខ្មែរមិនកាលីប ហើយតម្លៃថ្លៃជាងកង់បីឥណ្ឌា អ៊ីចឹងហើយទើបគេលែងចង់ជិះ ប៉ុន្តែលោកក៏ដូចជាអ្នករត់កង់បីខ្មែរដទៃទៀត មិនអាចចុះថ្លៃបានទេ ព្រោះត្រូវចាក់សាំង។ ឯកងបីឥណ្ឌា ប្រើហ្គាសមានតម្លៃធូរជាងសាំង។
អ្នកបឹងត្របែករូបនេះ បន្តថា អនាគតទៅអាចលែងមានអ្នករត់កង់បីមែន ព្រោះសូម្បីតែលោកប្រកាសលក់រ៉ឺម៉កកង់បីខ្មែរថោកៗនៅមិនមានអ្នកមកទិញផង។ ដូច្នេះបើកាលណាលែងមានតម្រូវការក៏លែងមានការផលិត ហើយបើលែងមានអ្នកជិះក៏លែងមានអ្នករត់ដែរ។
លោក មាស សារ៉ា ថាខ្លួនលោកក៏មានគម្រោងទិញរ៉ឺម៉កកង់បីឥណ្ឌាមករត់ដែរ។ លោកថា ភ្ញៀវបរទេសស្នាក់នៅក្នុងខុនដូរឥឡូវនេះ ឃើញកង់បីខ្មែរដើរហួសតែម្ដង ដោយសារម្នាក់ៗសុទ្ធតែមាន App អាចហៅកង់បីឥណ្ឌាម៉ោងប៉ុន្មានក៏បាន។
ដោយឡែក Sabay បានធ្វើការទំនាក់ទំនងទៅលោក វន ពៅ ជាប្រធានឯករាជ្យនៃសេដ្ឋកិច្ចក្រៅប្រព័ន្ធ ដើម្បីលម្អិតពីបញ្ហានេះ ប៉ុន្តែលេខទូរសព្ទរបស់លោក ពុំអាចទាក់ទងបានទេ៕