- 2018-06-06 05:13:05
- ចរាចរណ៍
បញ្ជាក់ជុំវិញ រថភ្លើងអាកាសដំបូងបំផុតនៅភ្នំពេញ ជាគម្រោងខ្យល់ឬក៏អត់?
- 2018-06-06 05:13:05
- ចំនួនមតិ 0 | ចំនួនចែករំលែក 0
បញ្ជាក់ជុំវិញ រថភ្លើងអាកាសដំបូងបំផុតនៅភ្នំពេញ ជាគម្រោងខ្យល់ឬក៏អត់?
ចន្លោះមិនឃើញ
រថភ្លើងលើអាកាសដំបូងបំផុតនៅរាជធានីភ្នំពេញ បានប្រកាសគម្រោងសាងសង់តាំងពីឆ្នាំ២០១៧មកម្ល៉េះ។ កាលពីថ្មីៗមានលេចឮពាក្យចចាមអារ៉ាមថា ជប៉ុនមិនផ្ដល់ហិរញ្ញប្បទានលើការសាងសង់ឡើយ។ ឯកឧត្ដម ស៊ុន ចាន់ថុល រដ្ឋមន្ត្រីក្រសួងសាធារណការ បានច្រានចោលព័ត៌មាននេះភ្លាមៗ និងបញ្ជាក់យ៉ាងច្បាស់ថា ជប៉ុននៅតែបន្តផ្ដល់ជំនួយក្នុងការសាងសង់ ហើយរថភ្លើងលើអាកាសស្វ័យប្រវត្តិ(AGT)នេះ ត្រូវតែមាននៅភ្នំពេញមុនឆ្នាំ២០២៣។
ថ្លែងប្រាប់អ្នកសារព័ត៌មានកាលពីម្សិលក្នុងពិធីចុះកិច្ចព្រមព្រៀង លើគម្រោងចរាចរណ៍រួមគ្នាមួយ របស់ក្រុមហ៊ុន Grab និងUNDP រដ្ឋមន្ត្រីក្រសួងសាធារណការបញ្ជាក់ច្បាស់ៗម្ដងទៀតថា ការសិក្សាលើគម្រោងដ៏ធំនេះ គឺត្រូវចំណាយពេលយូររហូត២ឆ្នាំ ពោលគឺអាចបញ្ចប់នៅចុងឆ្នាំនេះ ឬឆ្នាំ២០១៩។ ជប៉ុនជាប្រទេសនាំមុខផ្នែកបច្ចេកវិទ្យាមួយនៅលើពិភពលោក ការសាងសង់អ្វីមួយ ត្រូវលម្អិត និងហ្មត់ចត់ខ្លាំង ជាពិសេសពាក់ព័ន្ធដល់បញ្ហាសុវត្ថិភាព គឺកាន់តែត្រូវសិក្សាឲ្យច្បាស់បំផុត។ ដូច្នេះហើយទើបត្រូវចំណាយពេលយូរ។
ទេសរដ្ឋមន្ត្រីបានបង្ហើបថា គម្រោងរថភ្លើងអាកាស (AGT) ប្រវែង១៨គីឡូម៉ែត្រនេះ នឹងចាប់ផ្ដើមពីផ្សារធំថ្មី ឆ្ពោះទៅកាន់ព្រលានយន្តហោះអន្តរជាតិភ្នំពេញ។ តាមគម្រោងនឹងត្រូវចាយលុយ មិនតិចជាង ៨០០លានដុល្លារសហរដ្ឋអាមេរិកឡើយ ជាប្រាក់កម្ចីខ្លះ និងជាជំនួយឥតសំណងខ្លះ ពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន-កម្ពុជា ហៅកាត់ (JICA)។
ការបង្កើតរថភ្លើងអាកាសតាមបច្ចេកវិទ្យាជប៉ុននេះ គឺដើម្បីសម្រួលដល់ការធ្វើដំណើររបស់ប្រជាពលរដ្ឋក្នុងរាជធានីដែលកំពុងកកកុញដោយយានយន្ត កាត់បន្ថយបញ្ហាកកស្ទះ និងដើម្បីស្វាគមន៍ព្រឹត្តិការណ៍ជាប្រវត្តិសាស្ត្រលើទឹកដីកម្ពុជាស៊ីហ្គេម ២០២៣៕
