- 2018-06-20 03:59:19
- ចរាចរណ៍
ល្មមដល់ពេលសន្សំថ្លៃសាំង! ឡានក្រុងសាធារណៈទំនើបកប់របស់ជប៉ុន មកដល់ហើយ
- 2018-06-20 03:59:19
- ចំនួនមតិ 0 | ចំនួនចែករំលែក 0
ល្មមដល់ពេលសន្សំថ្លៃសាំង! ឡានក្រុងសាធារណៈទំនើបកប់របស់ជប៉ុន មកដល់ហើយ
ចន្លោះមិនឃើញ
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានប្រាប់ Sabay កាលពីថ្ងៃទី១៩ ខែមិថុនា ឆ្នាំ២០១៨នេះថា រថយន្តក្រុងសាធារណៈស៊េរីទំនើបជាជំនួយឥតសំណង របស់ជប៉ុនចំនួន២០គ្រឿង នឹងមកដល់រាជធានីភ្នំពេញនៅចុងខែមិថុនានេះ យ៉ាងពិតប្រាកដ។
រថយន្តក្រុង២០គ្រឿងនេះ ត្រូវបញ្ជូនមកជាជំហានដំបូង ក្នុងចំណោម៨០គ្រឿង។ ចំណែកឯ៦០គ្រឿងទៀត នឹងមកដល់ជាបន្តបន្ទាប់ចន្លោះ ២ ឬ ៣ខែម្ដង ពោលនឹងបញ្ចប់ការបញ្ជូនរថយន្តក្រុងរបស់ជប៉ុនចំនួន៨០គ្រឿងនោះ នៅបំណាច់ឆ្នាំ២០១៨នេះ។ នេះបើតាមការបញ្ជាក់បន្ថែមរបស់លោក ម៉េត មាសភក្ដី។
អ្នកនាំពាក្យសាលារាជធានីភ្នំពេញ ក៏បានបញ្ជាក់ដែរថា ចំពោះខ្សែរត់បន្ថែម លើចំនួនខ្សែចាស់ កំពុងស្ថិតនៅក្នុងផែនការ និងធ្វើការពិចារណាឲ្យបានល្អិតល្អន់សិនថា ផ្លូវណាដែលកំពុងមានបញ្ហាកកស្ទះខ្លាំង ហើយចាំបាច់ត្រូវមានរថយន្តក្រុងសាធារណៈ ដើម្បីដឹកជញ្ជូនបងប្អូនប្រជាពលរដ្ឋ។ ដូច្នេះនៅមិនទាន់បានបញ្ជាក់ទេថា នឹងត្រូវបន្ថែមប៉ុន្មានខ្សែទៀត ហើយនៅលើផ្លូវណានៅឡើយនោះទេ។
រថយន្តក្រុងទំនើបជាជំនួយឥតសំណងរបស់ជប៉ុនទាំងនេះ មានបំពាក់នូវបច្ចេកវិទ្យាទំនើបដូចជា៖ ម៉ាស៊ីនត្រជាក់ អេក្រង់ LED សម្រាប់បង្ហាញជើងរថយន្តក្រុង មានទូរទស្សន៍នៅក្នុង ដើម្បីបង្ហាញពីស្ថានភាព និងទីតាំងរថយន្តក្រុង។ រដ្ឋាភិបាលជប៉ុន បានសន្យាផ្ដល់រថយន្តក្រុងឲ្យសាលារាជធានីភ្នំពេញ ចំនួន ១៤០គ្រឿង ស្មើនឹងតម្លៃជាង ៨លានដុល្លារ ចាប់ពីឆ្នាំ២០១៨ ដល់ ២០២០។ លោក ម៉េត មាសភក្តី កន្លងមកបានឲ្យដឹងថា ការសន្យារបស់ជប៉ុន ក្នុងការផ្តល់រថយន្តក្រុងនេះ គឺក្រោយពីសាលារាជធានីភ្នំពេញ បានសិក្សា និងចរចាជាមួយភាគីជប៉ុន អស់រយៈពេលជិត៣ឆ្នាំមកហើយ។
គួរឲ្យដឹងដែរថា កាលពីឆ្នាំ២០១៧ ចិនក៏បានផ្ដល់ជំនួយរថយន្តក្រុងស៊េរីទំនើបចំនួន១០០គ្រឿងដែរ ដែលកំពុងធ្វើចរាចរណ៍នាបច្ចុប្បន្ននេះ៕
