- 2018-07-13 10:20:00
- សុខភាព
អ្នកអត់ទាន់មានកូន កុំអាលបន្ទោសគ្នា ដឹងវីតាមីន ៩មុខ បង្កើនឱកាសមានកូនរបស់បុរស
- 2018-07-13 10:20:00
- ចំនួនមតិ 0 | ចំនួនចែករំលែក 0
អ្នកអត់ទាន់មានកូន កុំអាលបន្ទោសគ្នា ដឹងវីតាមីន ៩មុខ បង្កើនឱកាសមានកូនរបស់បុរស
ចន្លោះមិនឃើញ
ការពិតជាពិសេសមួយសម្រាប់ភាពអាចមានកូនបានរបស់បុរសនោះគឺថា រាងកាយរបស់ពួកគេមានតុល្យភាពនៃអ័រម៉ូន និងប្រូតេអ៊ីន។ ចំណុចនេះគឺ អាចជួយបង្កើតជាមេជីវិតឈ្មោលដែលផ្ដល់សុខភាពល្អ មុនឈានទៅបង្កើតជាកូនបានដែរ។
មានវិធីច្រើនណាស់ ដែលគេអាចជួយឲ្យបុរសមានសមត្ថភាពបង្កើនភាពមានកូនបាន។
ដំបូងឡើយ ចូរចៀសឲ្យឆ្ងាយពីការប៉ះពាល់ប្រដាប់ភេទជាមួយនឹងកម្ដៅ ដូចជា ការងូតទឹកក្ដៅ ត្រាំទឹកក្ដៅ ឬនៅក្នុងបន្ទប់សូណា។ ចូរកុំដាក់កុំព្យូទ័រ Laptopលើភ្លៅ និងត្រូវដាក់ទូរស័ព្ទដៃឲ្យឆ្ងាយពីខ្លួន។
ករណីអ្នកត្រូវការប្រើថ្នាំដោយមានវេជ្ជបញ្ជា ចូរនិយាយជាមួយគ្រូពេទ្យ ថាតើថ្នាំទាំងនេះអាចប៉ះពាល់ដល់មេជីវិតឈ្មោល ឬអត់? ជាទូទៅ បើសិនជាបេះដូង ឬខួរក្បាលមានសុខភាពល្អហើយ វាក៏ល្អចំពោះពងស្វាសមនុស្សប្រុសដែរ។
របៀបរស់នៅដែលមានការជក់បារី ញ៉ាំគ្រឿងស្រវឹង និងធាត់ជ្រុលពេក មិនមែនជារឿងល្អសម្រាប់សុខភាពទូទៅឡើយ ហើយវាក៏មិនល្អចំពោះសមត្ថភាពនៃការមានកូនដែរ។
អ្នកជំនាញបានណែនាំថា របបអាហារដែលមានអង់ទីអុកស៊ីដង់ខ្ពស់ ដូចជា បន្លែ និងផ្លែឈើដែលមានពណ៌ខុសៗគ្នា គឺជាជីវជាតិដ៏សំខាន់សម្រាប់ជំរុញដល់សុខភាព ហើយបង្កើនសមត្ថភាពមានកូនរបស់មនុស្សប្រុសថែមទៀត។ ក្រៅពីនេះវាក៏មានវីតាមីនផ្សេងៗទៀតដែលជួយដល់ការមានកូនរបស់បុរសដែរដូចជា
១. វីតាមីន C
វាគឺជាវីតាមីនដែលរលាយក្នុងទឹក ហើយក៏បង្កើនគុណភាពមេជីវិតឈ្មោល ព្រមទាំងបន្ថយការខូចខាតរបស់កោសិកាជាច្រើននៃរាងកាយផងដែរ។ ២. វីតាមីន E
គឺជាអង់ទីអុកស៊ីដង់មួយប្រភេទដែលធ្វើការយ៉ាងល្អជាមួយនឹងវីតាមីន C ក្នុងការបោសសម្អាតសារធាតុអាក្រក់ៗចោល និងបង្កើនគុណភាពមេជីវិតឈ្មោល។
៣. Co Enzyme Q10
វាគឺជាសារធាតុដ៏សំខាន់មួយសម្រាប់មុខងាររបស់កោសិកាទាំងអស់ក្នុងខ្លួន ហើយក៏ត្រូវបានគេបង្ហាញថា ជួយពង្រឹងដល់ចំនួន និងការធ្វើចលនារបស់មេជីវិតឈ្មោលផងដែរ។ ៤. ជាតិស័ង្កសី
គឺជាជាតិរ៉ែដ៏សំខាន់មួយដែលអាចជួយដល់មេជីវិតឈ្មោល និងបង្កើនអត្រានៃការមានផ្ទៃពោះដែរ។
៥. សេឡេញ៉ូម
គឺជាជាតិរ៉ែមួយប្រភេទដែលត្រូវបានរាងកាយប្រើប្រាស់ក្នុងការប្រឆាំងការខូចខាតដោយសារអង់ស៊ីតកម្ម និងពង្រឹងដល់លទ្ធភាពនៃការមានកូន និងសុខភាពទូទៅ។
៦. តែបៃតង
មានសារធាតុផ្ដល់សុខភាពច្រើនដែលបង្កើនសមត្ថភាពមានកូនបាន។ ការញ៉ាំតែបៃតងគឺជារឿងសំខាន់មួយចំពោះរឿងនេះ។
៧. ទំពាំងបាយជូរពណ៌ក្រហម ទឹកទំពាំងបាយជូរក្រហម និងស្រាក្រហម
គឺមានសារធាតុ Resveratrol ខ្ពស់ ហើយក៏ត្រូវបានគេបង្ហាញថា ជាអង់ទីអុកស៊ីដង់ដ៏ខ្លាំងមួយដែលអាចពង្រឹងដល់គុណភាពមេជីវិតឈ្មោលបាន។
៨.សារធាតុ Lycopene
វាមានមិនច្រើនឡើយលើបុរសដែលមិនអាចមានកូនបាន ប៉ុន្តែអ្នកអាចរកបានយ៉ាងល្អពីធម្មជាតិ ដែលមានក្នុងផ្លែឈើ និងបន្លែពណ៌ក្រហម ជាពិសេសផ្លែឪឡឹកតែម្ដង។
៩. វីតាមីន D
បុរសដែលកង្វះវីតាមីននេះ ត្រូវបានគេរកឃើញទៀតថា មានចំនួនមេជីវិតឈ្មោលចុះទាប និងមិនងាយមានកូនឡើយ៕