- 2018-08-29 08:18:47
- ព័ត៌មាន
ដឹងរឿងរ៉ាវស្មានមិនដល់ ពីផ្ទះបុរាណខ្មែរជិតរយឆ្នាំ នៅតែរឹងមាំគ្មានពុកផុយសូម្បីបន្តិច
- 2018-08-29 08:18:47
- ចំនួនមតិ 0 | ចំនួនចែករំលែក 0
ដឹងរឿងរ៉ាវស្មានមិនដល់ ពីផ្ទះបុរាណខ្មែរជិតរយឆ្នាំ នៅតែរឹងមាំគ្មានពុកផុយសូម្បីបន្តិច
ចន្លោះមិនឃើញ
ចាប់ផ្ដើមសាងសង់ក្នុងអំឡុងឆ្នាំ១៩២០ ក្នុងសម័យកាលហ្លួងព្រះស៊ីសុវត្ថិ មកទល់ពេលនេះក្បែររយឆ្នាំ តែផ្ទះបុរាណនៅទឹកដីខេត្តបាត់ដំបងមួយនេះនៅតែរឹងមាំគ្មានការខូចខាតត្រង់ណាដែលគួរឲ្យកត់សម្គាល់នោះឡើយ។ ភាពរឹងមាំនៃផ្ទះបុរាណមួយខ្នងនេះ បានបង្កប់នូវអាថ៌កំបាំងមួយចំនួន កូនខ្មែរមួយចំនួនធំអាចមិនដែលធ្លាប់បានដឹងសោះក៏ថា។
ចំណុចដំបូងសូមស្វែងយល់ពីមូលហេតុដែលជញ្ជាំងផ្ទះគ្មានការពុកផុយ ហើយមានអារម្មណ៍ថាត្រជាក់ស្រួលម្ល៉េះ?
លោកសម្បត្តិ វីរៈ ក្មួយម្ចាស់ផ្ទះនៅថែរក្សាផ្ទះដ៏ធំនេះ ហើយរង់ចាំទទួលស្វាគមន៍ភ្ញៀវទេសចរចម្រុះជាតិសាសន៍បានទម្លាយអាថ៌កំបាំងថា ជញ្ជាំងដែលមើលមួយភ្លែតអាចគិតថាជាថ្ម ឬស៊ីម៉ងត៍ តែតាមពិតមិនមែនឡើយ គឺគេហៅថាជញ្ជាំងបាយអ។ ធាតុផ្សំដែលបុព្វបុរសខ្មែរបានយកមកលាយគ្នាធ្វើជញ្ជាំងផ្ទះមានដូចជា៖ ចំបើង លាមកគោក្រៀម តាប៉ែខ្មៅ ស្ករកំបោរ និងខ្សាច់។ បន្ទាប់ពីលាយរូបមន្តរួចហើយ គេត្រូវយកល្បាយទាំងនោះ ទៅគប់ពីលើឫស្សីដែលត្បាញហើយសម្រាប់ធ្វើជាគ្រោងឆ្អឹងនៃជញ្ជាំងរហូតទាល់តែស្មើសាច់ និងមានកម្រាស់ក្រាស់ល្អ។
គុណសម្បត្តិនៃជញ្ជាំងផ្សំចេញពីរូបមន្តបែបបុរាណខ្មែរនេះ គឺធន់នឹងកម្ដៅ និងភាពសើម។ ជាពិសេសពេលចូលមកដល់ក្នុងផ្ទះមានអារម្មណ៍ត្រជាក់ខុសពីផ្ទះមានជញ្ជាំងធ្វើពីឈើធម្មតា។ លើសពីនេះដូនតាខ្មែរសង់ផ្ទះផុតពីដី គឺទាក់ទងនឹងចរន្តខ្យល់ធម្មជាតិ ព្រោះកាលពីដើមឡើយពុំមានអគ្គិសនីដូចបច្ចុប្បន្នឡើយ។ នេះបើតាមការលើកឡើងបន្ថែមទៀតរបស់បុរសវ័យ ៤៤ឆ្នាំរូបនេះ។
កាលជំនាន់របបកម្ពុជាប្រជាធិបតេយ្យ តើផ្ទះមួយខ្នងនេះត្រូវបានខ្មែរក្រហមយកមកធ្វើជាទីតាំងអ្វី?
ចំណែកផ្ទះបាយវិញត្រូវបានបំផ្លាញទាំងស្រុង ដោយសារកាលជំនាន់ខ្មែរក្រហមត្រូវបានគេយកធ្វើជាផ្ទះបាយរួមប្រចាំភូមិសហករណ៍។ មានមនុស្សយ៉ាងតិច២០០នាក់ក្នុងថ្ងៃៗ មកហូបបាយនៅលើផ្ទះបាយដ៏ចំណាស់នេះ។ ក្រោយមកក្នុងទសវត្ស៨០ ផ្ទះបាយត្រូវបានជួសជុលឡើងវិញ តែនៅរក្សាទម្រង់ដដែល។ ចំណែកតួផ្ទះទាំងមូលគ្មានខូចខាតត្រង់ណាឡើយ ដោយសារទាហានខ្មែរក្រហមយកធ្វើជាទីជម្រក គឺមិនហ៊ានប៉ះពាល់អ្វីនោះទេ។ នេះក៏ជាមូលហេតុចម្បងមួយធ្វើឲ្យផ្ទះមានអាយុកាល៩៩ឆ្នាំមកហើយ មិនត្រូវបានបំផ្លាញក្នុងសម័យប៉ុក ពត។
ផ្ទះប្រភេទនេះ ក្នុងសម័យហ្លួងព្រះស៊ីសុវត្ថិ គឺសម្រាប់អ្នកមានទ្រព្យសម្បត្តិស្ដុកស្ដម្ភ មានកិត្តិយសមុខមាត់ក្នុងសង្គម។ លោក សម្បត្តិ វីរៈ គឺជាអ្នកជំនាន់ទី៣ហើយ ដែលរស់នៅក្នុងផ្ទះបុរាណមួយនេះ។ បច្ចុប្បន្នផ្ទះសង់ឡើងពីឈើកំពូលៗនេះ បានក្លាយជាទីតាំងដ៏ទាក់ទាញសម្រាប់ភ្ញៀវទេសចរជាពិសេសគឺជនបរទេសតែម្ដង។ ចំណែកទេសចរខ្មែរ មិនសូវជាមានប៉ុន្មានឡើយ។ ផ្ទះបុរាណនេះ មានទីតាំងនៅភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង៕
សូមទស្សនាវីដេអូខាងក្រោមនេះ៖