- 2019-04-02 03:16:09
- ព័ត៌មាន
ពិតជាច្នៃប្រឌិត! សិស្សវៀតណាមមួយក្រុម បង្កើតកង់សម្អាតខ្យល់ពុល ព្រោះហេតុផល១
- 2019-04-02 03:16:09
- ចំនួនមតិ 0 | ចំនួនចែករំលែក 0
ពិតជាច្នៃប្រឌិត! សិស្សវៀតណាមមួយក្រុម បង្កើតកង់សម្អាតខ្យល់ពុល ព្រោះហេតុផល១
ចន្លោះមិនឃើញ
សិស្សវៀតណាមមួយក្រុម បានសម្រេចបង្កើតឧបករណ៍បំពាក់ជាមួយកង់សម្រាប់សម្អាតខ្យល់កខ្វក់ដើម្បីជិះទៅសាលារៀន។
សិស្សទាំងបីនាក់មកពីវិទ្យាល័យ Thang Long Gifted ក្នុងទីក្រុងដាឡាត់ បានចំណាយពេល ៦ខែទៅលើការពិសោធន៍មុនពេលបញ្ចប់ការរចនាវាឡើង។ ឧបករណ៍ដែលបំពាក់នៅលើដៃកង់នេះ មានថ្ម និងតម្រងខ្យល់ដែលផលិតពីកប្បាសបីស្រទាប់សម្រាប់ចាប់យកធូលី។ តម្រងនេះ ត្រូវបានភ្ជាប់ទៅនឹងកង្ហារតូចៗដែលដំឡើងនៅផ្នែកទាំងពីរនៃកង់ខាងមុខ និងភ្ជាប់នឹងឌីណាម៉ូដែលមានស្រាប់នៅលើកង់។ ឧបករណ៍នេះ នឹងផ្លុំខ្យល់ស្អាតមកលើមុខអ្នកជិះកង់ ក៏ដូចជាសាកថ្មផងដែរ។
យោងតាមអាជ្ញាធរបរិស្ថានក្នុងតំបន់ឲ្យដឹងថា ជាលទ្ធផលនៃការសាកល្បងបង្ហាញថា ឧបករណ៍នេះអាចត្រងធូលីរហូតដល់ ៨៦% និងឧស្ម័នអាសូត ៦៣%។ ចំណែកឯសិស្សទាំងបីនាក់ ឲ្យដឹងថាពួកគេបង្កើតឧបករណ៍នេះឡើងដើម្បីផ្ដល់ភាពងាយស្រួលដល់សិស្សសាលាដោយមិនចាំបាច់ពាក់ម៉ាសនៅពេលជិះកង់ និងមិនបារម្ភពីបញ្ហាខ្យល់ពុលនោះឡើយ។
គួរឲ្យបញ្ជាក់ថា សិស្សទាំងបីនាក់ ធ្លាប់បានទទួលពានរង្វាន់លេខ ២ក្នុងការប្រកួតប្រជែងផ្នែកបច្ចេកទេស និងវិទ្យាសាស្ត្រថ្នាក់ជាតិប្រចាំឆ្នាំ ហើយពួកគេប្ដេជ្ញាថានឹងបន្ដធ្វើការអភិវឌ្ឍឧបករណ៍នេះទៀតដើម្បីធ្វើឲ្យវាកាន់តែមានប្រសិទ្ធិភាព៕
