- 2018-06-07 08:37:12
- ស្នេហា
មនុស្សប្រុសហ៊ានចោលនារីម្នាក់មិនមែនសុទ្ធតែអាក្រក់ ព្រោះតែទង្វើច្រំដែល៥យ៉ាងនេះហើយ
- 2018-06-07 08:37:12
- ចំនួនមតិ 0 | ចំនួនចែករំលែក 0
មនុស្សប្រុសហ៊ានចោលនារីម្នាក់មិនមែនសុទ្ធតែអាក្រក់ ព្រោះតែទង្វើច្រំដែល៥យ៉ាងនេះហើយ
ចន្លោះមិនឃើញ
មនុស្សប្រុសដែលហ៊ានចាកចោលនារីម្នាក់ ឬគេហ៊ានក្បត់ទៅរកអ្នកផ្សេងមិនមែនសុទ្ធតែជាប្រុសសាវា មនុស្សអាក្រក់ អាត្មានិយមនោះទេ។ ជួនកាលបុរសដែលធ្លាប់តែជាមនុស្សល្អម្នាក់ អាចក្លាយជាមនុស្សចិត្តដាច់បំផុត ព្រោះតែគេលែងទទួលយកបាននូវទង្វើច្រំដែលៗដូចខាងក្រោមនេះ៖
១. មិនដែលជឿជាក់លើស្នេហាដែលគេមាន
ស្នេហាសំខាន់បំផុត គឺការជឿជាក់លើគ្នា ជឿលើទង្វើ កាយវិការ ដែលផ្ដល់ឲ្យគ្នា។ ទទួលស្គាល់ថា មនុស្សស្រីអាចមានក្ដីស្រលាញ់ខ្លាំងលើសលប់ ជាងភាគីខាងបុរស ជាហេតុធ្វើឲ្យនាងក្លាយជាមនុស្សដែលចិត្តច្រើន សង្ស័យច្រើន ជួនកាលក្លាយជាមនុស្សលែងមានហេតុផល។ រីឯបុរសក្លាយទៅជាមនុស្សម្នាក់ដែលរង់ចាំតែបកស្រាយ ព្រោះតែការសង្ស័យរាប់រយជំពូករបស់មនុស្សស្រីទៅវិញ។
ទង្វើដដែលៗ ការចោទប្រកាន់ សង្ស័យគ្មានហេតុផល ដែលផ្ទុយខុសពីការពិតនេះហើយ ដែលធ្វើគេហត់ចិត្ត។ គេនឹងមានអារម្មណ៍ស្នេហាដែលគេផ្ដល់ឲ្យនារីម្នាក់ហាក់គ្មានតម្លៃ ការខិតខំរបស់គេដើម្បីនារីម្នាក់ ទទួលបានមកវិញតែការសង្ស័យ។
២. ចង់ឲ្យគេផ្លាស់ប្ដូរគ្រប់បែបយ៉ាងដើម្បីខ្លួន
ប្រសិនបើស្រលាញ់គ្នា គឺត្រូវទទួលទាំងចំណុចល្អ និងចំណុចមិនល្អរបស់គូស្នេហ៍ ហើយព្យាយាមផ្លាស់ប្ដូរខ្លួនឯងម្នាក់បន្តិច ដើម្បីក្ដីស្នេហាមួយ។ នារីខ្លះ ចង់ឲ្យបុរសដែលខ្លួនឯងស្រលាញ់ ធ្វើគ្រប់បែបយ៉ាងដើម្បីនាង ដើម្បីក្ដីសុខខ្លួនឯង រហូតក្លាយជាមនុស្សអាត្មានិយមទៅវិញ។ ពេលខ្លះគេចង់រស់នៅជាជីវិតរបស់គេ ហើយគេចង់មានស្នេហាមួយ ដែលយល់ពីគ្នាទៅវិញទៅមក។ គេក៏មានអារម្មណ៍ចេះហត់ ហើយគេក៏ចង់ឲ្យនារីដែលខ្លួនស្រលាញ់ព្យាយាមយល់ពីគេវិញដូចគ្នា មិនមែនឲ្យតែមិនធ្វើអ្វីតាមចិត្តនាងចង់បាន ហើយមកចោទប្រកាន់ថា គេមិនស្រលាញ់នាងនោះទេ។
៣. គេហត់នឹងលួងលោមគ្រប់ពេល
គេយល់ព្រមធ្វើចាញ់នាង គេយល់ព្រមឲ្យនាងក្ដិចនាងខាំ ក៏ព្រោះតែគេស្រលាញ់ ទោះបីជាពេលខ្លះគេក៏ដឹងថា មិនមែនជាកំហុសរបស់គេក៏ដោយ តែគេព្រមឲ្យនាងឈ្នះ។ តែបើធ្វើដូចនេះ ស្នេហាមួយអាចដើរបានយូរអង្វែងដែរទេ? ចុះបើគេហត់នឹងលួង នោះស្នេហានឹងត្រូវបញ្ចប់ទៅហើយទេអី។ ស្នេហាមួយអាចដើរទៅមុខ លុះអស់ជីវិតរៀងខ្លួន គឺទាមទារឲ្យភាគីទាំងសង្ខាងមានភាពចាស់ទុំ មានហេតុផលច្បាស់លាស់ យកចិត្តគេដាក់ចិត្តខ្លួនឯង។ បើថ្ងៃណាមួយគេចាកចេញពីនាង ក៏ព្រោះគេលែងទទួលយកបាននូវភាពក្មេងខ្ចីរបស់នាងនោះហើយ។
៤. គេមានអារម្មណ៍ថានាងមិនដែលមានក្ដីសុខពេលមានវត្តមានគេក្នុងជីវិតនាង
តាំងពីមាននាងចូលក្នុងជីវិតរបស់គេ គេតែងធ្វើគ្រប់យ៉ាងដើម្បីឲ្យនាងមានក្ដីសុខ។ តែយូរទៅគេតែងតែឃើញនាងយំ នាងពិបាកចិត្ត នាងខ្វល់ខ្វាយ ដោយគ្មានហេតុផល នាងកើតទុក្ខដោយសារក្នុងគំនិតមានតែរឿងអវិជ្ជមាន។ គេមានអារម្មណ៍ថា អ្វីៗដែលធ្វើចំពោះនាង មិនអាចរកក្ដីសុខឲ្យនាងបានឡើយ ហើយក៏គ្មានអ្វីមកកែប្រែចិត្តគំនិតនាង ឲ្យមើលគេក្នុងផ្លូវល្អបានដែរ។
ពេលខ្លះគេគិតថា បើវត្តមានគេក្នុងជីវិតនាង ធ្វើឲ្យនាងឈឺចាប់បែបនេះ តើគេគួរតែនៅបន្ត ឬចាកចេញ ដើម្បីនាងអាចទៅរកបុរសដែលល្អជាងខ្លួន? បើនាងពិតជាស្រលាញ់គេមែន ហើយមិនចង់បាត់បង់គេ សូមនាងបើកចិត្តមើលចំណុចល្អរបស់គេខ្លះផង។
៥. គេក៏ត្រូវការពេលវេលាផ្ទាល់ខ្លួនខ្លះដែរ
មិនថាគេនៅកន្លែងធ្វើការ ទៅជួបមិត្តភក្ដិ ឬនៅជាមួយគ្រួសារ នាងតែងតែងចង់ឲ្យគេខល ផ្ញើសារ ហើយពេលខ្លះ នាងទាមទារឲ្យបុរសដែលខ្លួនឯងស្រលាញ់ នៅក្បែរនាងគ្រប់ពេល ទើបនាងសុខចិត្ត។ បែបនេះគេមិនមែនហៅថា ស្នេហានោះទេ តែជាលក្ខណៈចង់ក្លាយជាកម្មសិទ្ធិផ្ដាច់មុខហើយ។ ការស្រលាញ់គ្នា មិនចាំបាច់ទាល់តែនៅក្បែរគ្នា២៤ម៉ោង និយាយទូរសព្ទ ផ្ញើសាររកគ្នា គ្រប់ទីកន្លែងទេ សំខាន់ក្ដីស្រលាញ់ដែលមាននៅក្នុងចិត្តគឺមានតម្លៃបំផុត មិនអាចកាត់ថ្លៃបាន។
គេកើតមកជាបុរស មិនមែនកំណត់មកថា សម្រាប់តែធ្វើគ្រប់យ៉ាង ដើម្បីតែនារីទេ គេមានកាតព្វកិច្ច មានការងារ មានឪពុកម្ដាយ បងប្អូនមិត្តភក្ដិ ដូចតែនាងអ៊ីចឹង។ នាងជាចំណែកមួយក្នុងជីវិតរបស់គេមែន តែមិនមែនជាម្ចាស់ជីវិតគេ មានសិទ្ធគ្រប់គ្រងគេទាំងស្រុងបានឡើយ។
សរុបមកវិញ ស្នេហាមួយដែលអាចកាន់ដៃគ្នា រហូតដល់ជីវិតចុងក្រោយបាន គឺអាស្រ័យលើភាគីទាំងសង្ខាង។ ស្នេហាមួយដែលមានតែភាពស្រស់បំព្រង និងសេចក្ដីសុខ មិនមែនជាកាតព្វកិច្ចភាគីខាងនារី ឬភាគីខាងបុរសឡើយ តែអ្នកទាំងពីរជាតួអង្គដ៏សំខាន់បំផុតមិនអាចខ្វះបានក្នុងរឿងស្នេហា។ ស្នេហាមួយដែលត្រូវរង្គោះរង្គើមិនមែនសុទ្ធតែបង្កមកពីខាងប្រុស ក៏មិនប្រាកដថាគ្មានកំហុសពីខាងនារីដែរ។ ដូច្នេះការយល់ពីគ្នា ការលើកលែង គឺសំខាន់ជាងអ្វីទាំងអស់ក្នុងជីវិតគូស្នេហ៍។
សូមបញ្ជាក់ថា ៥ចំណុចខាងលើនេះ គឺជាការចែករំលែកបទពិសោធន៍របស់បុរសមួយចំនួន តាមសារអេឡេចត្រនិកជាមួយក្រមការងារ Sabay ចំនួន៥រូប ហើយបានលើកឡើងស្រដៀងៗគ្នា ដូចខាងលើនេះ៕