លម្អិត៤រឿងកំពុងចាប់អារម្មណ៍ខ្លាំង ពីថ្នាក់រៀនភាសាខ្មែរក្នុងទីតាំងល្បី១ នៅអាមេរិក

2019-01-16 06:00:00
ការអប់រំ

2019-01-16 06:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្នាក់រៀនភាសាខ្មែរដែលជាស្នាដៃរបស់កូនខ្មែរ១ក្រុម នៅសហរដ្ឋអាមេរិក កំពុងទទួលការគាំទ្រពីសាធារណជន ពិសេសផ្ដល់ឱកាសឱ្យខ្មែរនៅក្រៅប្រទេសបានរៀនសូត្រភាសាកំណើត។ មិនត្រឹមតែជាថ្នាក់រៀនធម្មតា តែវាមានទីតាំងនៅក្នុងបណ្ណាល័យល្បីឈ្មោះមួយ រួមនឹងចំណុចពិសេស៤យ៉ាង។

រូបតំណាង ប្រភពរូប Worldpopulationreview

តាមសារអេឡិចត្រូនិកឆ្លើយឆ្លងជាមួយ Sabay លោក កន សង្ហាក់ បច្ចុប្បន្នជាគ្រូបង្រៀនភាសាខ្មែរស្ម័គ្រចិត្ត បានប្រាប់ថា កម្មវិធីបង្រៀនភាសាខ្មែរ មានគោលបំណងបម្រើប្រយោជន៍សាធារណៈ និងជាចំណែកលើកស្ទួយភាសាខ្មែរ ពិសេសផ្ដល់ឱកាសដល់អ្នកចង់រៀន និងចេះភាសាខ្មែរ។

រូបភាពផ្តល់ឲ្យ

លោក កន សង្ហាក់ បន្តថា កម្មវិធីនេះបង្កើតតាំងពីឆ្នាំ២០០៨មក ដែលមាន ស្ថាបនិក គឺលោក Bryant Ben ជាជនជាតិដើមខ្មែរ សញ្ជាតិអាមេរិក តែងលើកទឹកចិត្ត រួមនឹងការគាំទ្រពីក្រុមការងារស្ម័គ្រចិត្ត១ក្រុមទៀត។

លោក កន សង្ហាក់ (រូបភាពផ្តល់ឲ្យ)

រំលឹកទៅអតីតកាល ដំបូងឡើយ ក៏ធ្លាប់មានការរអាក់រអួល និងរឿងលំបាកដទៃទៀតជាច្រើនបានកើតឡើង ប៉ុន្តែក្រុមការងារ នៅតែតស៊ូជម្នះមិនបោះបង់ ខណៈកន្លែងផ្សេងដែលមានសកម្មភាពស្រដៀងនេះ បានបិទទ្វារទៅវិញអស់។

ឆ្លងតាមបទពិសោធន៍ជាង១០ឆ្នាំមកនេះ បច្ចុប្បន្នកម្មវិធីបង្រៀនភាសាខ្មែរទទួលបានការគាំទ្រ និងចាប់អារម្មណ៍កាន់តែច្រើនពីសាធារណជន ពិសេសបងប្អូនខ្មែរនៅទីនោះ ទាំងក្មេង ទាំងចាស់ ដោយហេតុផល ៤នេះ។

១. ទីតាំងល្អ

រូបថតនៅតំបន់ Cambodia Town (ប្រភពរូប Scmp)

ថ្នាក់រៀនភាសាខ្មែរនេះ មានទីតាំងងាយស្រួលស្គាល់ ព្រោះវាស្ថិតក្នុងបរិវេណ នៃបណ្ណាល័យសាធារណៈល្បីឈ្មោះ១ នៅសហរដ្ឋអាមេរិក គឺ Mark Twain Library ដែលនៅចំកណ្ដាលទីក្រុង Long Beach រដ្ឋ California។

បណ្ណាល័យសាធារណៈ Mark Twain

មួយវិញទៀត វាក៏ជាកន្លែងនៅជិតតំបន់ដែលមានជនជាតិខ្មែររស់នៅច្រើនជាងគេ ក្នុងចំណោមរដ្ឋដទៃ ពិសេសងាយស្រួលសម្រាប់ចាស់ៗខ្មែរ ដែលចង់អាន ឬរំលឹកមេរៀនភាសាខ្មែរឡើងវិញ ក្រោយបានមកដល់ទីនេះតាំងពីទសវត្សឆ្នាំ៨០មកម្ល៉េះ។ នេះបើតាម លោក កន សង្ហាក់ បច្ចុប្បន្នជាគ្រូបង្រៀនភាសាខ្មែរស្ម័គ្រចិត្ត។

២. ក្មេងចាស់ អាចចូលរៀនដោយឥតគិតថ្លៃ

រូបភាពផ្តល់ឲ្យ

ប្រភពដដែលបន្តថា ក្រៅពីការអានសៀវភៅ ថ្នាក់រៀនភាសាខ្មែរកម្រិតដំបូង ជាអ្វីដែលទាក់ទាញ និងផ្ដល់ភាពងាយស្រួលដល់អ្នកចង់ចេះ ចង់រៀនភាសាខ្មែរ។ មិនថាតែខ្មែរ ជនជាតិបរទេស ចាស់ ឬក្មេងទេ គឺអាចចូលរួមបានដោយឥតគិតថ្លៃ។ ការរៀនភាសាខ្មែរ មានបើកជូន នៅរៀងរាល់ថ្ងៃសៅរ៍ ចាប់ពីម៉ោង ៩ព្រឹក ដល់១២:៣០នាទីថ្ងៃត្រង់ ម៉ោងនៅទីក្រុង Long Beach រដ្ឋ California។

រូបភាពផ្តល់ឲ្យ

ក្រៅពីនេះ ក៏មានកម្មវិធីពិសេសសម្រាប់ខ្មែរយើងដែលមានកូនតូចៗ អាយុពី៣ ទៅ៦ឆ្នាំ អាចចូលរួម គឺ Khmer Story Time ដើម្បីស្ដាប់រឿងនិទានអប់រំខ្លីល្អៗ ជាភាសាខ្មែរផងដែរ។

៣. ចំនួនសៀវភៅ និងឯកសារដ៏សម្បូរបែបជាភាសាខ្មែរ

រូបភាពផ្តល់ឲ្យ

Mark Twain Library គឺជាបណ្ណាល័យសាធារណៈ១ ក្នុងចំណោមបណ្ណាល័យទាំង ១២នៃទីក្រុង Long Beach។ បណ្ណាល័យនេះក៏ធ្លាប់បានទទួលពានរង្វាន់ ប្រចាំសហរដ្ឋអាមេរិក ដោយសារស្នាដៃជាច្រើន រួមបញ្ចូលនឹងសកម្មភាពគាំទ្រកម្មវិធីបង្រៀនភាសាខ្មែរផងដែរ។ ដោយសារមានឈ្មោះបោះសំឡេង និងទីតាំងក៏អំណោយផលល្អស្រាប់ ទើបងាយស្រួលសម្រាប់សហគមន៍ខ្មែរ អាចទៅចូលរួមច្រើន។

រូបភាពផ្តល់ឲ្យ

ដូច្នេះហើយ ទើបឯកសារជាភាសាខ្មែរជាច្រើន បានរៀបចំដាក់តម្កល់ជូនសាធារណជន ចំនួនសរុបចន្លោះពី៣៥០០ ទៅ៤០០០ក្បាល។ ក្នុងនោះមានដូចជា៖សៀវភៅ CD និង DVD បទចម្រៀង ទស្សនាវដ្ដី ឬរឿងកុនខ្មែរចម្រុះ និងឯកសារប្រវត្តិសាស្ត្រខ្មែរជាច្រើន ទុកសម្រាប់សាធារណជនស្ដាប់ ឬទស្សនា។

បន្ថែមពីនេះ អ្វីដែលកាន់តែពិសេស ក្រុមការងារកំពុងសិក្សាបន្ថែម ពីការដាក់ឯកសារខ្មែរទាំងអស់នៅទីនេះ ចូលទៅក្នុងប្រព័ន្ធម្យ៉ាង ហៅថា OCLC ដែលជាផ្នែកមួយនៃ WorldCat Program ដែលមានប្រមូលផ្ដុំព័ត៌មានទិន្នន័យ នៃបណ្ណាល័យល្បីៗ ដើម្បីអាចឲ្យខ្មែរយើង និងអ្នកចាប់អារម្មណ៍ផ្សេងទៀតអាចចូលមើលឯកសារជាភាសាខ្មែរបានងាយស្រួល នៅទូទាំងពិភពលោក។

រូបភាពផ្តល់ឲ្យ

៤. សៀវភៅអត្ថន័យល្អជាចំណូលចិត្តខ្មែរ

រូបភាពផ្តល់ឲ្យ

តាមរយៈការស្ទង់មតិថ្មីៗនេះ ក្រុមការងារបានរកឃើញថា ខ្មែរយើងនៅក្រៅប្រទេស រួមនឹងជនបរទេស តែងចេញចូលថ្នាក់រៀននេះជាមិនសូវដាច់ បើទោះមិនទាន់មានចំនួនរបាយការណ៍ជាក់លាក់។

ប្រភពពីលោក កន សង្ហាក់ បន្តថា ដើម្បីរៀន ឬរំលឹកពីភាសាខ្មែរ និងអនុស្សាវរីយ៍ពីអតីតកាលផង ភាគច្រើនពួកគេចូលចិត្តអានបំផុត គឺប្រភេទសៀវភៅទាក់ទងនឹងប្រវត្តិសាស្ត្រខ្មែរ ចម្រៀងមនោសញ្ចេតនាចាស់ៗ សៀវភៅពីវិធីចម្អិនម្ហូបអាហារបែបខ្មែរ វប្បធម៌ និងសិល្បៈ ការអប់រំក្នុងគ្រួសារ និងសៀវភៅទាក់ទងជំនឿសាសនាជាដើម។

រូបភាពផ្តល់ឲ្យ៖ ដោយ លោក កន សង្ហាក់ គ្រូបង្រៀនភាសាខ្មែរស្ម័គ្រចិត្ត នៅសហរដ្ឋអាមេរិក

អត្ថបទ៖ ពៅ រក្សា