- 2019-03-04 12:00:00
- ការអប់រំ
សុទ្ធតែតំណាងសាលាធំៗ ហោះពីឆ្ងាយមកជួបនិស្សិតខ្មែរក្នុងពិពណ៌សិក្សាមួយនេះ
- 2019-03-04 12:00:00
- ចំនួនមតិ 0 | ចំនួនចែករំលែក 0
សុទ្ធតែតំណាងសាលាធំៗ ហោះពីឆ្ងាយមកជួបនិស្សិតខ្មែរក្នុងពិពណ៌សិក្សាមួយនេះ
ចន្លោះមិនឃើញ
សិស្សានុសិស្ស និស្សិត និងអាណាព្យាបាល នៃសាលារៀនឯកជន ចំនួន១៥ ក្នុងរាជធានីភ្នំពេញប្រមាណ១ពាន់នាក់ បានមកចូលរួមពិពណ៌ការសិក្សាប្រចាំឆ្នាំ ដើម្បីប្រឹក្សាជាមួយអ្នកជំនាញផ្នែកអប់រំនៅសហរដ្ឋអាមេរិក ដោយឥតគិតថ្លៃ។
នៅក្នុងពិពណ៌នេះបានរៀបចំដាក់ជាតុ និងមានអ្នកជំនាញជនបរទេស និងខ្មែរផងចាំជួយសម្រួលផ្នែកបកប្រែភាសាជូន។ អ្នកជំនាញតាមមហាវិទ្យាល័យ និងសកលវិទ្យាល័យ ចំនួន ៣០ល្បីៗ នៅអាមេរិកដែលរាប់បញ្ចូលទាំងស្ថាប័នរដ្ឋ និងឯកជនផង បានស្វាគមន៍សំណួរ និងយោបល់នានាទាក់ទងនឹងផ្នែកអប់រំ និងលក្ខខណ្ឌអាហារូបករណ៍ពីសំណាក់សិស្ស និស្សិតខ្មែរ។
យុវសិស្ស កៅ ម៉េងហេងលាង ជាសិស្សរៀនថ្នាក់ទី១២ នៃសាលារៀនឯកជនមួយ បានប្រាប់ Sabayថា លោកបានចូលរួមកម្មវិធីបែបនេះជាលើកទី២ហើយ។
អ្វីដែលលោកចាប់អារម្មណ៍ខ្លាំងជាងគេ គឺការប្រឹក្សាក្បោះក្បាយចំៗ អ្វីដែលជាចម្ងល់ មានដូចជាបរិយាកាសនៅក្រៅប្រទេស ជំនាញដែលចង់ចាប់យក និងការពង្រឹងជំនាញភាសាអង់គ្លេសឲ្យខ្លាំង។ លោកបានបន្តថា ក្រោយបានសួរនាំក្នុងពិពណ៌នេះរួច លោកអាចរកឃើញចំណុចខ្វះខាត និងចំណុចខ្លាំង ហើយគិតថា ខ្លួនអាចមានសង្ឃឹមក្នុងការដាក់ពាក្យស្នើសុំអាហារូបករណ៍បាននៅពេលក្រោយ។
ក្រៅពីសិស្ស និស្សិត អ្នកស្រី ជា ម៉ាសូលីដា ដែលជាស្ត្រីមេផ្ទះមួយរូបបានឃើញព័ត៌មាននេះ ទំព័រហ្វេសប៊ុកស្ថានទូត ក៏បានបង្ហាញចំណាប់អារម្មណ៍ ដើម្បីទុកចែករំលែកទៅកូនៗទាំងបីនាក់។ អ្នកស្រី បានបន្តថា នេះជាកម្មវិធីល្អ ដែលអ្នកស្រីមិនធ្លាប់បានដឹងពីមុនមក។
សម្រាប់ព័ត៌មានអប់រំនៅថ្ងៃនេះ អ្នកស្រីនឹងទុកប្រាប់កូនៗ ដែលចង់ចេះ ចង់ដឹង និងចង់ដាក់ពាក្យសុំអាហារូបករណ៍ស្រាប់ ដើម្បីត្រៀមខ្លួន និងបំពេញលក្ខខណ្ឌឲ្យត្រូវចំណូលចិត្ត និងអាចទទួលបានឱកាសទៅរៀន ឬជាប់អាហារូបករណ៍ល្បីៗ។
លោក Michael Newbill ភារធារីស្ដីទី នៃស្ថានទូតអាមេរិក បានបញ្ជាក់ថា តាមការកត់សម្គាល់ចំនួន នៃនិស្សិតខ្មែរ ដែលបានទៅរៀននៅសហរដ្ឋអាមេរិក មានការកើនឡើងពីមួយឆ្នាំទៅមួយឆ្នាំ ដោយហេតុផលសំខាន់ៗ។ ក្នុងនោះមានដូចជា ការរីកចម្រើននៃសេដ្ឋកិច្ចកម្ពុជា ការកែទម្រង់ប្រព័ន្ធអប់រំ របស់ក្រសួងអប់រំ យុវជន និងកីឡាដែលបង្កលក្ខណៈងាយស្រួលដល់និស្សិតឲ្យមានលទ្ធភាពទៅរៀននៅអាមេរិកក្នុងប្រព័ន្ធអប់រំថ្មី១ ដែលអាចនិយាយបានថា មានភាពល្អប្រសើរជាងគេនៅក្នុងពិភពលោក។
លោកបានបន្ថែមទៀតថា លោកពិតជាមានមោទកភាព និងស្វាគមន៍ចំពោះវត្តមានសិស្សរាប់ពាន់នាក់ដែលបានចូលរួមពិពណ៌ការសិក្សានៅថ្ងៃនេះ ក៏ដូចជានិស្សិតជុំវិញពិភពលោក ពិសេសកម្ពុជា ដែលចាប់អារម្មណ៍ការសិក្សាទៅកាន់សហរដ្ឋអាមេរិក។
សូមជម្រាបថា ពិពណ៌ការសិក្សានៃសហរដ្ឋអាមេរិក បានរៀបចំជារៀងរាល់ឆ្នាំ ចាប់ពីឆ្នាំ២០១១មក ដែលមានកំណើនអ្នកគាំទ្រ រាប់ពាន់នាក់ ដែលកាលនោះធ្វើនៅមជ្ឈមណ្ឌលកោះពេជ្រ។ សម្រាប់ឆ្នាំ២០១៩ ពិពណ៌ការសិក្សានេះ បានរៀបនៅសណ្ឋាគារ Great Duke អតីតសណ្ឋាគារអាំងទែរកុងទីណង់តាល់ រាជធានីភ្នំពេញ។
ប្រសិនបើសិស្ស និស្សិតមានចម្ងល់បន្ថែម ឬសួរព័ត៌មានដើម្បីទៅរៀន ឬសុំអាហារូបករណ៍នៅតាមមហាវិទ្យាល័យ និងសកលវិទ្យាល័យនៅអាមេរិក សូមទាក់ទងមកមជ្ឈមណ្ឌលប្រឹក្សាការសិក្សាមានទីតាំងនៅសកលវិទ្យាល័យបញ្ញាសាស្ត្រកម្ពុជា និងនៅក្នុងស្ថានទូតអាមេរិកប្រចាំនៅកម្ពុជា។ ឬទាក់ទងតាមទូរសព្ទលេខ ០១១ ៥០ ២១ ២១, ០១០ ៥០ ២១ ២១ ឬអ៊ីមែល eduUSA@puc.edu.kh។ នេះបើយោងតាមប្រភពពីអ្នកស្រី ម៉ៅ កូឡាប អ្នកប្រឹក្សា នៃមជ្ឈមណ្ឌល Education USA។
