ដឹងអត់ ហេតុអ្វីនិស្សិតវៀតណាមសម្រុកមករៀននៅអាមេរិកច្រើន?

2019-04-07 02:00:00
ការអប់រំ

2019-04-07 02:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រភពរបាយការណ៍ពីនាយកដ្ឋានសន្តិសុខជាតិ ផ្នែកពង្រឹងការអនុវត្តពន្ធ និងអន្តោប្រវេសន៍ របស់អាមេរិក បានបង្ហាញថា បច្ចុប្បន្ននេះមាននិស្សិតវៀតណាមចំនួន ៣០៩៦០នាក់ កំពុងបន្តការសិក្សានៅក្នុងសហរដ្ឋអាមេរិក ដោយហេតុផលនានា។

តួលេខនេះអាជ្ញាធរអាមេរិក បានធ្វើការកត់សម្គាល់ដោយគិតត្រឹមខែមីនា ឆ្នាំ២០១៩កន្លងទៅថ្មីៗនេះ ដោយបញ្ជាក់ទៀតថា ចំនួនគឺមានការកើនឡើង បើធៀបនឹងរយៈពេលកន្លងទៅ។

រូបថតនៅ មហាវិទ្យាល័យសហគមន៍ Santa Fe

ភាគច្រើននិស្សិតវៀតណាមទាំងនោះ បានមករៀននៅតាមមហាវិទ្យាល័យសហគមន៍ ឬធ្វើការងារនានា នៅតាមរដ្ឋឆ្ងាយ ឬជិត រួមនឹងនៅក្នុងរដ្ឋធានីវ៉ាស៊ីនតោនផងដែរ។

និស្សិតជនជាតិវៀតណាម កញ្ញា Nguyen Thi Hoai Chau អាយុ២៤ឆ្នាំ ជានិស្សិតផ្នែកភាសាបរទេស នៃមហាវិទ្យាល័យសហគមន៍ Santa Fe ក្នុងទីក្រុង Gainnesville នៃរដ្ឋ Florida បានបញ្ជាក់ថា កញ្ញា មករៀននៅទីនេះ តាមរយៈបងប្អូនជីដូនមួយ ជាជនជាតិវៀតណាមរស់នៅទីក្រុង New York ដែលមានសញ្ជាតិអាមេរិកកាំង តាំងពីឆ្នាំ២០១៣មកម្ល៉េះ។ ម្យ៉ាងវិញទៀតកញ្ញាក៏ធ្លាប់បានដឹងព័ត៌មាន ពីសមាគមវៀតណាម នៅសហរដ្ឋអាមេរិក ដែលបានផ្សព្វផ្សាយដំណឹងនៃកម្មវិធីសិក្សានានាជាច្រើន រួមមានដំណឹងអាហារូបករណ៍ និងថ្នាក់បង់ថ្លៃ ពិសេសនៅតាមមហាវិទ្យាល័យសហគមន៍ល្អជាច្រើន ដល់សិស្ស និស្សិត តាំងពីនាងនៅក្នុងប្រទេសវៀតណាមមក។

កញ្ញា Nguyen Thi Hoai Chau

ហេតុផលនេះហើយ ទើបកញ្ញា Nguyen Thi Hoai Chau សម្រេចចិត្ត និងបានបោះបង់ការសិក្សាឆ្នាំទី១ចោល កាលនៅរៀនសកលវិទ្យាល័យមួយ នៃប្រទេសវៀតណាម ដើម្បីផ្លាស់មករៀនបន្តតាមរយៈថ្នាក់បង់ថ្លៃទាំងស្រុងនៅក្នុងរដ្ឋ Florida តាំងពីចុងឆ្នាំ២០១៦ ដើម្បីសម្រេចបំណងធំ គឺរៀនបន្ត ក្នុងប្រព័ន្ធអប់រំនៅទីនេះល្អ និងមានការទទួលស្គាល់ជុំវិញពិភពលោក។

ម្យ៉ាងកញ្ញាយល់ថា នាងបានចំណាយពេលជាង២០ឆ្នាំទៅហើយ នៅក្នុងប្រទេសកំណើត ដូច្នេះដល់ពេល គួរចេះរកវិធីមកប្រទេសនានា ដែលជាគោលដៅកញ្ញា គឺនៅទីនេះ ដើម្បីបានចំណេះដឹងថ្មីៗ និងឈានជើងចូលមកក្នុងពិភពលោក តាមរយៈការអប់រំនៅអាមេរិក។

មកដល់ដំបូងៗ Nguyen Thi Hoai Chau បានប្រាប់ថា នាងមានបញ្ហាភាសាអង់គ្លេស ពោលគឺមិនអាចប្រើការកើតឡើយ។ ហេតុនេះ កញ្ញាក៏បានសម្រេចចិត្តទៅធ្វើការងារក្រៅម៉ោង នៅហាងលក់ទំនិញតូចមួយជិតសាលា ដើម្បីបានប្រាក់កាក់ខ្លះ និងសំខាន់បានអនុវត្តភាសាអង់គ្លេសឲ្យបានច្រើន។ រហូតមកដល់ពេលនេះ គឺភាសាអង់គ្លេសរបស់កញ្ញា គឺមានភាពល្អប្រសើរជាងមុនច្រើន។

បើតាមលោក Dan Rodkin, Ed, D. ជានាយករង នៃសមាគមនិស្សិត ទទួលបន្ទុកកិច្ចការសាធារណៈ នៃមហាវិទ្យាល័យសហគមន៍ Santa Fe ក្នុងទីក្រុង Gainnesville នៃរដ្ឋ Florida បានបញ្ជាក់ថា នៅទីនេះ និស្សិតវៀតណាម មានចំនួនកើនដល់ ២០នាក់សម្រាប់ឆ្នាំ២០១៩នេះ។

លោក Dan Rodkin, Ed, D.

បើគិតជាចំនួននិស្សិតអន្តរជាតិសរុប មានគឺមានចំនួន ១៥០០០នាក់ ដែលកំពុងសិក្សានៅមហាវិទ្យាល័យសហគមន៍ Santa Fe។ ចំពោះវត្តមាននៃករណីនិស្សិតវៀតណាមមករៀននៅអាមេរិកច្រើន លោកយល់ថា ពួកគេអាចបំពេញមានសមត្ថភាពបំពេញតាមតម្រូវការ និងលក្ខខណ្ឌរបស់សាលាបានកំណត់។ លោកថា ម្យ៉ាងវិញទៀត និស្សិតវៀតណាមក៏ឆាប់យល់ពីវប្បធម៌ដ៍សម្បូរបែប និងចម្រុះជាតិសាសន៍ ដែលមានច្រើននៅសហរដ្ឋអាមេរិក។

សូមរំលឹកថា បើតាមប្រភពពីនាយកដ្ឋានសន្តិសុខជាតិ ផ្នែកពង្រឹងការអនុវត្តពន្ធ និងអន្តោប្រវេសន៍របស់អាមេរិក បានបង្ហាញថា មានទីតាំងចំនួន ៥ដែលជាប់ជាកំពូលតំបន់ ឬភាសាអង់គ្លេសហៅថា (Top 5) ដែលមាននិស្សិតវៀតណាមស្នាក់នៅ និងរៀនច្រើនជាងគេនៅអាមេរិក ។ ក្នុងនោះគឺមានដូចជា៖

១. រដ្ឋ California មាននិស្សិតវៀតណាម ៥៨៣៨នាក់

២. រដ្ឋ Texas មាននិស្សិតវៀតណាម ៤៩៣៤នាក់

៣. រដ្ឋធានី Washington មាននិស្សិតវៀតណាម ២៣៦៥នាក់

៤. រដ្ឋ Massachusetts មាននិស្សិតវៀតណាម ១៩១៣នាក់

៥. ទីក្រុង New York មាននិស្សិតវៀតណាម ១៤៥៥នាក់។

អត្ថបទ៖ ពៅ រក្សា