អបអរសាទរ! Cambodia Airways ទទួលជោគជ័យលើដំណើរការជើងហោះហើរត្រង់ទៅបាងកក

2019-04-12 08:51:14
ព័ត៌មាន

2019-04-12 08:51:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Cambodia Airways បានដំណើរការជើងហោះហើរត្រង់ទៅកាន់ទីក្រុងបាងកកប្រទេសថៃ បានយ៉ាងជោគជ័យនៅថ្ងៃទី ១១ខែមេសានេះ។

ជើងហោះហើរដំបូងបង្អស់ បានចុះចតនៅព្រលានយន្ដហោះសុវណ្ណភូមិនាវេលាម៉ោង ១៩:១០នាទីដូចការគ្រោងទុកដោយប្រើប្រាស់យន្ដហោះ Airbus 319 ដែលមានទម្ងន់ផ្ទុកអ្នកដំណើរប្រមាណ ៩០% និងទំនិញជាង ២ពាន់គីឡូក្រាម។ ដើម្បីជាការអបអរសាទរដល់ជើងហោះហើរទៅបាងកកលើកដំបូងក៏ដូចជាពិធីបុណ្យចូលឆ្នាំខ្មែរខាងមុខ ក្រុមហ៊ុន Cambodia Airways បានជូនកាដូតុក្កតាស្រស់ស្អាតដល់ភ្ញៀវនៅព្រលានយន្ដហោះអន្ដរជាតិភ្នំពេញសម្រាប់ជាកាដូអនុស្សាវរីយ។ លើសពីនេះ មន្ត្រីអាកាសយានដ្ឋានក្រុងបាងកក បានរៀបចំវត្ថុអនុស្សាវរីយ៍មួយចំនួនសម្រាប់អ្នកដំណើរ, អ្នកបើកបរ និងអ្នកបម្រើលើយន្ដហោះរបស់ក្រុមហ៊ុន Cambodia Airways ផងដែរ។

យោងតាមនាយករងផ្នែកពាណិជ្ជកម្មនៃក្រុមហ៊ុន Cambodia Airways លោក Simon Xu ឲ្យដឹងថា "ក្រុមហ៊ុនអាកាសចរណ៍ Cambodia Airways មានមោទនភាពក្នុងការប្រកាសអំពីការបើកដំណើរការជើងហោះហើរលើកដំបូងភ្នំពេញ-បាងកក មុនចូលឆ្នាំខ្មែរ។ នេះជាការប្តេជ្ញាចិត្តបន្តរបស់យើងក្នុងការផ្តល់ជូនអតិថិជននូវជម្រើសបន្ថែមទៀតលើធ្វើដំណើរតាមផ្លូវអាកាស ដោយយើងដំណើរការហោះហើរជារៀងរាល់ថ្ងៃជាមួយនឹងម៉ោងហោះហើរដែលអំណោយផលសម្រាប់អតិថិជនជ្រើសរើស។ យើងធ្វើដំណើរចេញពីអាកាសយានដ្ឋានអន្ដរជាតិភ្នំពេញនៅម៉ោង ១៦:១៥នាទីល្ងាច និងទៅដល់ព្រលានយន្ដហោះសុវណ្ណភូមិនៅម៉ោង ១៩:១០នាទី។ សម្រាប់ការហោះហើរត្រលប់មកវិញ នឹងចាកចេញពីព្រលានយន្ដហោះសុវណ្ណភូមិនៅម៉ោង ២០:១០នាទី និងមកដល់អាកាសយានដ្ឋានអន្ដរជាតិភ្នំពេញនៅម៉ោង ២១:៣៥នាទី ពោលគឺមិនយូរពេក ឬឆាប់ពេកសម្រាប់អតិថិជនរបស់យើង។ យើងមិនត្រឹមតែផ្ដល់ជូននូវសេវាកម្មអតិថិជនដែលមានគុណភាពខ្ពស់ប៉ុណ្ណោះទេ តែយើងថែមទាំងផ្ដល់នូវសេវាកម្មដឹកជញ្ជូនដ៏មានប្រសិទ្ធភាពផងដែរ។ ”

ក្រុមហ៊ុន Cambodia Airways តែងតែផ្ដល់ជូននូវសេវាកម្មដែលមានគុណភាពខ្ពស់ដល់ការដឹកជញ្ជូនអ្នកដំណើរ ក៏ដូចជាសេវាកម្មដឹកជញ្ជូនទំនិញ។ សម្រាប់អ្នកដំណើរ ក្រុមហ៊ុន Cambodia Airways ផ្ដល់ជូននូវសេវាកម្មដឹកជញ្ជូនអ្នកដំណើរថ្មីហៅថា "សេវាកម្ម Winflex” ដែលផ្ដល់ជូនអាទិភាពក្នុងការ Check-in, អាទិភាពឡើងយន្ដហោះមុនគេ, ទម្ងន់កំណត់ឥវ៉ាន់ ១០គីឡូក្រាមបន្ថែម, អាទិភាពសម្រាប់សេវាកម្មផ្ញើ និងទទួលឥវ៉ាន់, ទទួលកន្លែងអង្គុយធំទូលាយ និងសេវាកម្មជាច្រើនទៀតនៅលើយន្ដហោះ។ សម្រាប់សេវាកម្មដឹកជញ្ជូនទំនិញវិញ យើងផ្ដល់ជូននូវការកក់មុនតាមរយៈ cargo@cambodia-airways.com សម្រាប់ការកក់សេវាកម្ម។

គួរជម្រាបថា អាកាសចរណ៍ Cambodia Airways Co., Ltd គឺជាក្រុមហ៊ុនអាកាសចរណ៍របស់ប្រទេសកម្ពុជា ដែលមានមូលដ្ឋាននៅរាជធានីភ្នំពេញ និងត្រូវបានបង្កើតឡើងកាលពីខែកញ្ញា ឆ្នាំ២០១៧។ Cambodia Airways បានសម្ពោធជើងហោះហើរដំបូងរបស់ខ្លួន ដែលមានគោលដៅពីភ្នំពេញទៅសៀមរាប នៅថ្ងៃទី១០ ខែកក្កដា ឆ្នាំ២០១៨។ បច្ចុប្បន្ន អាកាសចរណ៍មានយន្តហោះចំនួន ៣គ្រឿង គឺ Airbus A391 ដែលកំពុងធ្វើប្រតិបត្តិការជាមួយជើងហោះហើរទៅមកទាំងក្នុង និងក្រៅស្រុក នៅភ្នំពេញ សៀមរាប ក្រុងព្រះសីហនុ ម៉ាកាវ តៃប៉ិ... ក្នុងចំណោមគោលដៅធ្វើដំណើរមួយចំនួនទៀត៕