- 2019-04-23 06:52:53
- សុខភាព
មកដឹងពីអត្ថប្រយោជន៍ នៃរុក្ខជាតិបៃតង ទាក់ទងនឹងអារម្មណ៍ និង អាយុវែង !
- 2019-04-23 06:52:53
- ចំនួនមតិ 0 | ចំនួនចែករំលែក 0
មកដឹងពីអត្ថប្រយោជន៍ នៃរុក្ខជាតិបៃតង ទាក់ទងនឹងអារម្មណ៍ និង អាយុវែង !
ចន្លោះមិនឃើញ
ដំណក់ទឹកដែលដក់លើស្លឹកឈើពណ៌បៃតងបានរេរាំ ស្របនឹងព្រះពាយផាត់តិចៗនោះ គឺជាក្ដីសង្ឃឹម និង ជាស្នាមញញឹមរបស់យុវតី អោម កក្កដា។ កក្កដា អាយុ ១៦ ឆ្នាំ រៀនថ្នាក់ទី ១០ នៅវិទ្យាល័យសន្ធរមុខ រាជធានីភ្នំពេញ។
សូមចុចអាន៖ ភ្នំពេញឥឡូវមិនដូចពីដើមទេ ការញ៉ាំកាហ្វេសឹងជារឿងធម្មតាទៅហើយ
នាងតែងតែងើបពីព្រលឹមស្រាងៗ ស្រោចផ្កា និង ដើមឈើមួយចំនួននៅមុខផ្ទះ ដែលឋិតនៅតាមបណ្ដោយផ្លូវចាក់បេតុង ផ្លូវសូនី ខណ្ឌមានជ័យ រាជធានីភ្នំពេញ គឺខាងជើងផ្សារសឡា។ នៅមុខផ្ទះល្វែងនាងមានដើមដូង ប្រទាលកន្ទុយក្រពើ ស្លឹកតើយ និង ប្រទាលជាច្រើនទៀត លាយឡំនឹងការដាំផ្កាចម្រុះពណ៌ផ្សេងៗ។ កក្កដា រីករាយជានិច្ច នៅពេលនាងបានស្រោចផ្កា និង ថែទាំរុក្ខជាតិទាំងនោះ ដោយវាក្លាយទៅជាទម្លាប់ទៅហើយសម្រាប់នាង នៅមុនពេលនាងទៅសាលារៀន និង ពេល ត្រឡប់មកពីរៀនវិញ។
“ខ្ញុំសប្បាយចិត្តណាស់នៅពេលខ្ញុំឃើញរុក្ខជាតិពណ៌បៃតង លាយឡំនឹងផ្កាចម្រុះពណ៌ផ្សេងទៀត។ ខ្ញុំមិនហត់នឿយក្នុងការថែទាំវាទេ ផ្ទុយទៅវិញខ្ញុំគិតថា វាល្អទៅវិញទេ នាំឲ្យខ្ញុំហ្នឹង សប្បាយចិត្តច្រើនបន្ទាប់ពីការសិក្សា គឺនិយាយរួមសុខភាពផ្លូវចិត្តល្អ"។
ក្រុមអ្នកឯកទេសធ្លាប់បានលើកឡើងថា រុក្ខជាតិបៃតងផ្ដល់នូវសារប្រយោជន៍ច្រើន ដោយសារតែវាជាប្រភពផ្ដល់នូវអុកស៊ីសែន បរិស្ថានស្រស់ត្រកាល ដែលធ្វើឲ្យអារម្មណ៍មនុស្ស មានការសប្បាយចិត្ត។
ដោយឃើញពីសារៈសំខាន់នៃរុក្ខជាតិបៃតង សាលារាជធានីភ្នំពេញគ្រោងធ្វើឲ្យទីក្រុងគជ់មួយនេះ ក្លាយទៅជាទីក្រុងបៃតង។ ឯកឧត្ដម កែប ជុតិមា អតីតអភិបាលសាលារាជធានីភ្នំពេញ ធ្លាប់បានប្រាប់បណ្ដាញសារព័ត៌មានក្នុងស្រុកថា "យើងចង់ធ្វើទីក្រុងភ្នំពេញទៅជាទីក្រុងពណ៌បៃតង។ ទីក្រុងបៃតង គឺ មិនសំដៅតែទៅលើដើមឈើពណ៌បៃតងតែមួយមុខទេ ប៉ុន្តែវាជាទីក្រុងដែលលើកស្ទួយបរិស្ថានផងដែរ"។
ដូច្នេះហើយគេសង្កេតឃើញថា នៅក្នុងអំឡុងការកាន់កាប់តំណែងអភិបាលសាលារាជធានីភ្នំពេញ ២ អាណត្តិ កន្លងទៅ ឯកឧត្ដម កែប ជុតិមា តែងតែយកចិត្តទុកដាក់ពីភាពបៃតង នៃទីក្រុង រាល់ការអភិវឌ្ឍ ដូចឃើញស្រាប់នៅតាមដងផ្លូវ និងសួនច្បារ គឺសុទ្ធតែមានដើមឈើ។
ទន្ទឹងគ្នានេះ គេក៏សង្កេតឃើញរុក្ខជាតិបៃតង មានដាក់ក្នុងផើង ឬ ថូផ្កា ដើម្បីលម្អកន្លែងធ្វើការផង និង ដើម្បីកាត់បន្ថយឧស្ម័នពុលផ្សេងៗផង។ លោក សុខុម បុគ្គលិកក្រុមហ៊ុនមួយក្នុងរាជធានីភ្នំពេញ បានប្រាប់ Sabay ថា "បន្ទាប់ពីខ្ញុំសម្លឹងកុំព្យូទ័រយូរពេកនាំឲ្យខ្ញុំឈឺភ្នែក ដូច្នេះខ្ញុំក្រឡេកមើលផ្កា ឬរុក្ខជាតិបៃតង ដែលនៅលើតុរបស់ខ្ញុំ គឺធ្វើឲ្យខ្ញុំមានអារម្មណ៍ធូរស្រាលមួយកម្រិត និង ក៏ជួយកាត់បន្ថយភាពតានតឹងអារម្មណ៍ផងដែរ។
សូមអានអត្ថបទពាក់ព័ន្ធសុខភាពជាច្រើនទៀត សូមចុចត្រង់នេះ
ទោះយ៉ាងណាក្ដី អ្នកឯកទេសចក្ខុរោគ នៅមន្ទីរពេទ្យព្រះអង្គឌួង និងជាអនុប្រធានកម្មវិធីសុខភាពផ្នែកភ្នែក នៃក្រសួងសុខាភិបាល លោកវេជ្ជបណ្ឌិត ដោ សីហា ធ្លាប់បាននិយាយថា តាមពិតទៅរុក្ខជាតិបៃតងមិនមានឥទ្ធិពលណាមួយជួយដល់ភ្នែកនោះទេ។ ប៉ុន្តែលោកវេជ្ជបណ្ឌិតបញ្ជាក់ថា រុក្ខជាតិបៃតងធ្វើឲ្យមនុស្សមានអារម្មណ៍ស្រស់ស្រាយច្រើនជាង។
លោកវេជ្ជបណ្ឌិតក៏បានបញ្ជាក់ដែរថា ការសម្លឹងមើលអ្វីយូរពេកនឹងនាំឲ្យរួយសាច់ដុំភ្នែក ដូចជាការសម្លឹងមើលកុំព្យូទ័រជាដើម ដូច្នេះប្រសិនបើជាមានអាការៈឈឺភ្នែក ស្រវាំងភ្នែក ឬរួយភ្នែក គួរតែសម្រាក ហើយងាកមកសម្លឹងបរិយាកាសផ្សេងនៅជុំវិញខ្លួន ជាពិសេសរុក្ខជាតិបៃតង ព្រោះវាក៏អាចជួយឲ្យអារម្មណ៍យើងស្រស់ស្រាយផងដែរ។
បន្ថែមលើនេះ អ្នកស្រី ចក់ ធីតា អ្នកឯកទេសវិកលវិទ្យា និងជានាយករងមន្ទីរពេទ្យមិត្តភាពខ្មែរ-សូវៀត បានបញ្ជាក់ថា រុក្ខជាតិបៃតងពិតជាផ្ដល់ឲ្យមនុស្សមានអារម្មណ៍រីករាយ និង ស្ងប់ស្ងាត់ផ្លូវចិត្តនៅពេលដែលយើងសម្លឹងមើលវាកាន់តែយូរ។ ការភ្ញោចអារម្មណ៍ឡើងនេះ ដោយសារតែប្រព័ន្ធអូតាណូម។ អូតាណូម បានបែងចែកជាពីរ គឺទី ១ សាមប៉ាតិច និង ប៉ារ៉ាសាមប៉ាតិច។
"ខ្ញុំសូមបញ្ជាក់ថា សាមប៉ាតិច គឺសំដៅដល់ពណ៌ក្រហម ហើយពណ៌នេះ តែងតែធ្វើឲ្យអារម្មណ៍ និង បេះដូងដើរញាប់ៗ។ ចំណែកប៉ារ៉ាសាមប៉ាតិច សំដៅដល់ពណ៌ខៀវ ផ្ទៃមេឃ និង បៃតង ជាដើម ដែលពណ៌ទាំងនេះ បានជំរុញឲ្យមនុស្សមានភាពរីករាយ និងស្ងប់ស្ងាត់ផ្លូវអារម្មណ៍ច្រើន។
អ្នកស្រី ចក់ ធីតា បានបញ្ជាក់បន្ថែមថា រហូតមកទល់នឹងពេលនេះនៅមិនទាន់មានការសិក្សាជាក់លាក់នៅឡើយទេថា រុក្ខជាតិបៃតងនឹងនាំឲ្យមនុស្សមានអាយុវែង ប៉ុន្តែគេអាចធ្វើការប៉ាន់ស្មានបានត្រង់ថា ផ្លូវចិត្តគឺជាផ្នែកមួយដ៏សំខាន់ នៃសុខភាព ដូច្នេះប្រសិនបើការមើលរុក្ខជាតិពណ៌បៃតង ដែលនាំឲ្យយើងមានអារម្មណ៍រីករាយ ផ្លូវចិត្តស្រស់ស្រាយ គឺនឹងនាំឲ្យយើងមានសុខភាពល្អ និង មានអាយុវែងមិនខាន។ ផ្ទុយទៅវិញប្រសិនបើផ្លូវចិត្តតានតឹង នឹងនាំឲ្យយើងឆាប់ចាស់ និង អាយុខ្លីជាមិនខាន៕
សូមអានអត្ថបទពាក់ព័ន្ធនឹងសុខភាពជាច្រើនទៀត សូមចុចត្រង់នេះ