អស្ចារ្យ! ស្រ្តីខ្មែរ៩រូបទទួលពានសហគ្រិនស្ត្រីឆ្នើមប្រចាំតំបន់អាស៊ានដោយផ្ទាល់ពីព្រះមហាក្សត្រថៃ

2019-06-19 04:00:00
ការអប់រំ

2019-06-19 04:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់សហគ្រិនស្ត្រីឆ្នើមប្រចាំតំបន់អាស៊ានលើកទី៦ នឹងផ្ដល់ជូនដល់ស្ត្រីខ្មែរ៩រូប ដែលព្រឹត្តិការណ៍នេះនឹងធ្វើឡើងក្នុងប្រទេសថៃ ពីថ្ងៃ២០ -២២ ខែមិថុនា ២០១៩ ព្រមទាំងមហាកិត្តិយសទទួលពានរង្វាន់ផ្ទាល់ពីព្រះមហាក្សត្រថៃ ផងដែរ។

ឧកញ៉ា ស្រ៊ាត មុំសុភា ជនបង្គោលតំណាងឲ្យបណ្ដាញសហគ្រិនស្រ្តីប្រចាំតំបន់អាស៊ាន ហៅកាត់ថា AWEN (Asean Women Entrepreneurs Network) សម្រាប់កម្ពុជា និងជាអនុប្រធានសមាគមសហគ្រិនស្ត្រីកម្ពុជា ប្រាប់ថា នេះជាឆ្នាំទី៦នៃការជ្រើសរើសពានរង្វាន់សហគ្រិនស្ត្រីឆ្នើមប្រចាំតំបន់អាស៊ាន ។ ចំពោះលក្ខខណ្ឌនៃការជ្រើសរើសមានដូចជា៖

១. អាយុចាប់ពី៣០ឆ្នាំឡើង

២. អាជីវកម្មត្រូវតែមានអាយុកាលចាប់ពី៥ឆ្នាំឡើង ព្រមទាំងចុះបញ្ជីនិងបង់ពន្ធត្រឹមត្រូវ

៣. ត្រូវតែជាសហគ្រិនស្ត្រីដែលជាម្ចាស់អាជីវកម្មនិងជាម្ចាស់ភាគហ៊ុននៃអាជីវកម្ម។ មួយវិញទៀត មានបុគ្គលិកស្ត្រីពី៥០%

៤. មានការចែករំលែកចំណេះដឹង បទពិសោធន៍ ថវិកា ពេលវេលាចូលរួមសកម្មភាពតាមសហគមន៍ សមាគមន៍ មានការតាំងចិត្តខ្ពស់ក្នុងការចែករំលែកទៅឲ្យសហគ្រិនស្ត្រីផ្សេងទៀត។ ជាបុគ្គលគំរូល្អដែលអាចជះឥទ្ធិពលដល់សហគ្រិនស្ត្រីផ្សេងៗផងដែរ។

ឧកញ៉ា ស្រ៊ាត មុំសុភា

សម្រាប់បេក្ខភាពនឹងទទួលពានរង្វាន់មានដូចជា អ្នកស្រី សន សុទ្ធី អ្នកស្រី អេលីដា គីមស្រ៊ុន អ្នកស្រី ហ៊ាង សុខ អ្នកស្រី តាំង ជីងជា អ្នកស្រី វ៉ា សុខជីន អ្នកស្រី គៀត អភិវឌ្ឍន៍ អ្នកស្រី ពិន នេត្រា អ្នកស្រី ប៉ ជូ និងអ្នកស្រី សុខ ចិន្ដា។ ឆ្នាំនេះ កម្ពុជារើសបេក្ខភាពទទួលពានរង្វាន់ចំនួន៩រូបប៉ុណ្ណោះ ដោយកង្ចះខាតផ្សេងៗ ត្រូវបានឧកញ៉ា ស្រ៊ាត មុំសុភា មើលឃើញថា ដោយសារបេក្ខភាពផ្សេងមិនបានទទួលព័ត៌មានគ្រប់គ្រាន់ពីការដាក់ពាក្យ ។ លើសពីនេះមានឧបសគ្គក្នុងឆ្លើយសំនួរ ពាក់ព័ន្ធពេលវេលា ព្រមទាំងសហគ្រិនមួយចំនួនមិនទាន់មានលក្ខណៈគ្រប់គ្រាន់ឆ្លើយតបតាមតម្រូវការចង់បាន។ .

ចំពោះគោលបំណងសំខាន់នៃព្រឹត្តិការណ៍នេះ គឺអនុវត្តដោយភ្ជាប់ការចែករំលែកនិងប្ដូរចំណេះដឹង បទពិសោធន៍តាមរយៈវេទិកា ដើម្បីលើកកម្ពស់ការផ្ដល់សិទ្ធអំណាចសេដ្ឋកិច្ចដល់ស្ត្រីក៏ដូចជាទទួលស្គាល់នូវសមិទ្ធផលការរួមចំណែករបស់សហគ្រិនស្ត្រីអាស៊ាន។ សម្រាប់កម្ពុជាអាចក្លាយជាម្ចាស់ផ្ទះរៀបចំព្រឹត្តិការណ៍នេះក្នុងរយៈពេល៤ឆ្នាំខាងមុខ។

ដើម្បីជំរុញទឹកចិត្តដល់ស្ត្រីផ្សេងទៀត ឈានជាសហគ្រិនស្ត្រីឆ្នើម ឧកញ៉ា ស្រ៊ាត មុំសុភា ផ្ដល់អនុសាសន៍ថា ស្ត្រីទាំងអស់មិនគួរបណ្តែតបណ្តោយពេលវេលាចោលនោះទេ ។ ស្រ្តីគួរតែអភិវឌ្ឍន៍ខ្លួនពីក្នុងប្រទេសមកក្នុងតំបន់និងទៅថ្នាក់អន្តរជាតិ តាមរយៈការចូលរួមប្រកួតផ្សេងៗ។ លោកស្រីបញ្ជាក់ថា សូមកុំទុកខ្លួនឯងឲ្យម្នាក់ឯង តែត្រូវនៅក្នុងបណ្ដាញ ដើម្បីអភិវឌ្ឍន៍ប្រមូលបានសំលេងតែមួយ ព្រមទាំងធ្វើដំណើរទៅរួមគ្នា៕

ចុចអាន៖ ស្ត្រីខ្មែរមហិច្ឆតាខ្ពស់! សុខចិត្តចាយលុយខ្លួនឯងធ្វើគម្រោងដើម្បីជំរុញទឹកចិត្តយុវតីជំនាន់ថ្មី

អត្ថបទ៖ លឹម សុនា