- 2019-06-28 04:08:00
- សុខភាព
ធ្លាប់ប្រើស្រោមអនាម័យគ្រើមអត់? ល្បីថា ស្រោមប្រភេទនេះប្រឈមគ្រោះថ្នាក់ច្រើន
- 2019-06-28 04:08:00
- ចំនួនមតិ 0 | ចំនួនចែករំលែក 0
ធ្លាប់ប្រើស្រោមអនាម័យគ្រើមអត់? ល្បីថា ស្រោមប្រភេទនេះប្រឈមគ្រោះថ្នាក់ច្រើន
ចន្លោះមិនឃើញ
អ្នកដែលនៅម្ដុំនោះសុទ្ធតែស្គាល់ថា ហឹបទាំងនេះ គឺដាក់តាំងលក់ស្រោមអនាម័យ។ ចំណែកពាក្យ"អាធម្មតា" ដែលបុរសអ្នកលក់ទាំងនោះតែងស្រែកសួរអ្នកមកទិញ សំដៅទៅលើ ស្រោមអនាម័យធម្មតា មានដូចជា Number1 ឬ Ok ប៉ុន្តែ "អាគ្រើម" គឺសំដៅទៅលើស្រោមអនាម័យ ដែលមានចំណុចគ្រើមៗ នៅស្បែកខាងក្រៅនៃស្រោមនោះ។ ប៉ុន្តែស្រោមប្រភេទនេះ ត្រូវបានមន្ត្រីធ្វើការផ្នែកសុខភាពបន្តពូជព្រមានដល់អ្នកប្រើប្រាស់ប្រយ័ត្នប្រឈមនឹងការឆ្លងមេរោគ។
សូមចុចអាន៖ អ្នកឧកញ៉ា គិត ម៉េង ត្រៀមសម្ពោធវិទ្យុចុងឆ្នាំនេះ
រូបតំណាង (រូបថត៖ បរទេស)
គ្រូបណ្ដុះបណ្ដាលរបស់អង្គការរ៉ាក់ លោក ម៉ៅ វណ្ណៈ និយាយថា សិក្ខាកាមដែលធ្លាប់បានរៀនជាមួយលោកក្នុងសិក្ខាសាលានាពេលកន្លងមក ធ្លាប់បានលើកឡើងអំពីការប្រើប្រាស់ស្រោមអនាម័យគ្រើមនេះដែរ។ លោកថា តាមរយៈការពិសោធន៍ចំពោះស្រោមប្រភេទនេះ បង្ហាញថា វាមានផលប៉ះពាល់ច្រើនណាស់។
លោកថា៖ “ពេលរួមភេទ វាកកិតយូរៗទៅ ធ្វើឲ្យសឹកកោសិការបស់ស្ត្រីជាដៃគូ។ ដល់ពេលប៉ះកកិតខ្លាំងទៅ ធ្វើឲ្យគាត់ងាយកើតជំងឺផ្សេងៗ។ ថ្មីត្បិតវាស្វិត មិនបែក តែចំណុចគ្រើមអាចបណ្ដាលឲ្យជ្រាបបាន ដូច្នេះងាយណាស់ក្នុងការឆ្លងជំងឺស្វាយ អេដស៍ និងថ្លើមប្រភេទ B។ ខ្ញុំឲ្យយោបល់ថា មិនគួរប្រើជាដាច់ខាត”។
លោកបន្ថែមថា មូលហេតុ នៃការបង្កើតស្រោមប្រភេទគ្រើមនេះ គឺដើម្បីភ្ញោចអារម្មណ៍នារីជាដៃគូឲ្យពុះកញ្ជ្រោលពេលរួមភេទ ប៉ុន្តែ សម្រាប់គុណសម្បត្តិអ្វីផ្សេង លោកថា លោកមើលមិនឃើញទេ។
បើគេក្រឡេកទៅមើលស្រោមអនាម័យដែលដាក់លក់នៅតាមផ្លូវក្បែរផ្សារអូរឫស្សី គឺមានស្រោមច្រើនប្រភេទណាស់។ ក្នុងនោះក៏មានស្រោមគ្រើម ដែលខ្លះមានយីហោត្រឹមត្រូវ និង ខ្លះទៀតរកយីហោពុំឃើញឡើយ ក្រៅពីអក្សរអង់គ្លេសតូចៗ។
អ្នកលក់ស្រោមនៅក្បែរផ្សារអូរឫស្សីសុំមិនបញ្ចេញឈ្មោះថ្លែងថា លោកមានម៉ូយរបស់លោកយកមកបោះដុំឲ្យ ប៉ុន្តែលោកមិនបញ្ជាក់ថា ម៉ូយនោះទិញមកពីណាទេ។ លោកថា ស្រោមគ្រើមនេះលក់ដាច់ជាងស្រោមធម្មតា។ បើអ្នកធ្លាប់មកជាវស្រោមនៅទីនេះ លោកថា គេនឹងស្គាល់ភ្លាមដោយគ្រាន់តែនិយាយថា "អាធម្មតា ឬអាគ្រើម"។ លោកថា ក្នុងស្រោមធម្មតាមួយប្រអប់ ដែលមានបីកញ្ចប់ តម្លៃមួយពាន់រៀល ចំណែកស្រោមគ្រើមដែលមានបីកញ្ចប់ដែរ ថ្លៃរហូតដល់ទៅ៤ពាន់រៀលឯណោះ។
លោក ណាង អាយុ៣០ឆ្នាំថ្លែងថា ខ្លួនតែងទិញស្រោមគ្រើមនេះមួយកញ្ចប់ និង ស្រោមធម្មតាមួយកញ្ចប់ មិនមែននៅក្បែរផ្សារអូរឫស្សីទេ តែនៅតាមទំនប់ទួលគោក មុននឹងខ្លួនទៅរកសេវាផ្លូវភេទ។
លោកថា៖ “ដំបូងធ្លាប់ប្រើតែស្រោមធម្មតា ដល់ពេលឮថាមានអាគ្រើមអីចឹង ដូចជាមានអារម្មណ៍រំភើបចង់ទិញដែរ។ ប៉ុន្តែមុននឹងទិញ ខ្ញុំបានមើលអក្សរសរសេរនៅលើប្រអប់ទៅឃើញថា មានការទទួលស្គាល់ត្រឹមត្រូវដោយអឺរ៉ុប និងជប៉ុន ដូច្នេះខ្ញុំក៏ទិញតែម្ដងទៅ។ ពេលប្រើ ខ្ញុំដូចជាមិនបារម្ភខ្លាចឆ្លងអ្វីទេ"។
លោក លីម ហួពៅ ប្រធានប្រតិបត្តិក្រុមហ៊ុន Full Well Trading (Cambodia) Ltd. ដែលនាំយកស្រោមអនាម័យអូកាម៉ូតុចូលមកស្រុកខ្មែរ ថ្លែងថា ស្រោមអនាម័យអូកាម៉ូតុរបស់លោកក៏មានប្រភេទគ្រើមនេះដែរ និងលក់ដាច់គួរសម បើប្រៀបធៀបនឹងស្រោមប្រភេទដទៃ។ ប៉ុន្តែលោកបដិសេធថា ស្រោមគ្រើមអាចប្រឈមនឹងការឆ្លង។
លោកថា៖ "មុននឹងចេញមក គេបានធ្វើតេស្តជាមួយខ្យល់ផង ទឹកផង និងប្រព័ន្ធអេឡិចត្រូនិកផង។ ពេលគេចេញមកឲ្យយើងប្រើមួយៗ សុទ្ធតែឆ្លងកាត់ការធ្វើតេស្តពីសុវត្ថិភាពត្រឹមត្រូវណាស់"។
លោកបន្ថែមថា ស្រោមរបស់លោកសុទ្ធទេមានយីហោអូកាម៉ូតុត្រឹមត្រូវ ដូច្នេះ លោកថា ស្រោមដែលអាចប្រឈមនឹងគ្រោះថ្នាក់នោះ អាចនឹងស្រោមប្រភេទផ្សេង ជាពិសេសស្រោមដែលគ្មានយីហោច្បាស់លាស់៕