អង្គការមិត្តសំឡាញ់ ដាក់ចេញនូវយុទ្ធសាស្ត្រ ៥សំខាន់ៗ ដើម្បីប្រយុទ្ធប្រឆាំង Covid-19

2020-04-10 10:33:55
ព័ត៌មាន

2020-04-10 10:33:55
ចំនួនមតិ 0 | ចំនួនចែករំលែក 0

ចន្លោះមិនឃើញ

មេរោគឆ្លងថ្មី Covid-19 កំពុងតែរីករាលដាលជុំវិញពិភពលោក រួមទាំងប្រទេសប្រទេសកម្ពុជាផងដែរ។ ខណៈពេលដែលប្រទេសអភិវឌ្ឍជាច្រើន កំពុងតស៊ូប្រយុទ្ធប្រឆាំងជាមួយជំងឺដ៏កាចសាហាវនេះ ក៏មានការព្រួយបារម្ភជាខ្លាំងចំពោះប្រទេសកំពុងអភិវឌ្ឍដែលមានប្រពន័្ធសុខាភិបាលទន់ខ្សោយក្នុងការការទប់ស្កាត់ការរាលដាល។ ដើម្បីជាការចូលរួមជាមួយរដ្ឋាភិបាលកម្ពុជា អង្គការមិត្តសំឡាញ់បានដាក់ចេញនូវយុទ្ធសាស្ត្រសំខាន់ៗ ដើម្បីប្រយុទ្ធជំងឺនេះ។

ខាងក្រោមនេះ គឺជាយុទ្ធសាស្ត្រ ៥សំខាន់ៗ ដែលអង្គការមិត្តសំឡាញ់ដាក់ចេញដើម្បីប្រយុទ្ធប្រឆាំង Covid-19 ៖

១. ចែកចាយនូវសម្ភារៈ និងការបណ្ដុះបណ្ដាលពីអនាម័យចាំបាច់

អង្គការមិត្តសំឡាញ់ បានផ្ដល់ជូននូវការបណ្ដុះបណ្ដាលដើម្បីធ្វើឲ្យមានការយល់ដឹងកាន់តែប្រសើរឡើងដល់សហគមន៍ដែលងាយរងគ្រោះ ដូចជាវិធានការការពារផ្សេងៗ, ការស្វែងយល់ពីរោគសញ្ញានៃកូវីដ១៩ និងវិធីរក្សាបាននូវសុវត្ថិភាព និងសុខភាពល្អសម្រាប់ពួកគេ។

២. ការបណ្តុះបណ្តាលជំនាញសំរាប់ភ្នាក់ងារសុវត្ថិភាពកុមារដែលមានមូលដ្ឋាននៅសហគមន៍ស្តីពីវិធីសាស្ត្រការពារកុមារ

ដើម្បីប្រាកដថា ភ្នាក់ងាររបស់អង្គការដឹងពីរបៀបឆ្លើយតបក្នុងគ្រាមានអាសន្នផ្សេងៗ ភ្នាក់ងាររបស់អង្គការមិត្តសំឡាញ់ ត្រៀមខ្លួនរួចជាស្រេចដើម្បីជួយសម្រួលដល់កុមារដែលត្រូវបានបោះបង់ចោល ដោយសារអាណាព្យាបាលរបស់ពួកគេ ត្រូវបានដាក់ឲ្យនៅដោយឡែកដោយសារកូវីដ១៩។

៣. សម្របខ្លួនជាមួយស្ថានភាពបច្ចុប្បន្ន

អង្គការមិត្តសំឡាញ់ បានដំណើរការសេវាកម្មជាច្រើនដែលមានសារៈសំខាន់ចំពោះសុវត្ថិភាព និងសុខុមាលភាពរបស់អ្នកទទួលផលពីអង្គការដូចជា ក្មេងៗដែលគ្មានកន្លែងសុវត្ថិភាពស្នាក់នៅជាដើម។ ប្រសិនបើនរណាម្នាក់ក្នុងចំណោមក្មេងទាំងនោះ មានចេញនូវរោគសញ្ញានៃកូវីដ១៩ ពួកគេនឹងត្រូវបានដាក់ឲ្យនៅបន្ទប់ដាច់ដោយឡែកក្នុងអង្គការដើម្បីការពារសុវត្ថិភាពដល់អ្នកផ្សេងទៀត។

៤. ការកំណត់អត្តសញ្ញាណក្រុមគ្រួសារដែលត្រូវការអាហារ និងការឧបត្ថម្ភបន្ទាន់

ប្រសិនបើពួកគេ តម្រូវឲ្យនៅដាច់ដោយឡែក ឬការបិទទីក្រុងទាំងស្រុង នោះវិធានការណ៍នេះនឹងមានសារៈសំខាន់ខ្លាំងណាស់សម្រាប់ការរស់រានមានជីវិតរបស់គ្រួសារនីមួយៗ។ លើសពីនេះ ការផ្ដល់ជូនឲ្យពួកគេនូវអាហារ និងសម្ភារចំបាច់ ក៏ជួយកាត់បន្ថយការឆ្លងរាលដាលផងដែរ ដោយសារពួកគេមិនចាំបាច់ចេញទៅក្រៅ តាមរយៈការផ្ដល់ជំនួយរបស់អង្គការ។

៥. បង្កើតគណកម្មការមិត្ដសំឡាញ់ពហុប្រទេស

អង្គការមិត្តសំឡាញ់ បានសហការជាមួយនឹងអង្គការសុខភាពពិភពលោក និងអង្គការក្រៅរដ្ឋាភិបាលជាច្រើនទៀត ដើម្បីផ្ដល់ជូននូវព័ត៌មានសំខាន់ៗដល់ពលរដ្ឋស្របទៅតាមស្ដង់ដារ និងការដាក់ចេញនូវវិធានការណ៍ចុងក្រោយដោយរដ្ឋាភិបាល។

លោកអ្នក ក៏អាចចូលរួមជាមួយអង្គការមិត្តសំឡាញ់របស់យើងដើម្បីប្រយុទ្ធប្រឆាំងនឹងកូវីដ១៩ ផងដែរ តាមរយៈការបរិច្ចាគមកកាន់អង្គការរបស់យើង។ សម្រាប់អ្នកដែលចង់បរិច្ចាគសម្រាប់ជួយក្នុងគ្រាលំបាកនេះ អាចធ្វើការទំនាក់ទំនងមកកាន់អង្គការផ្ទាល់តាមទូរសព្ទលេខ ៖ 023 986 601 ឬគេហទំព័រហ្វេសប៊ុកមិត្តសំឡាញ់ Mith Somlanh ឬបរិច្ចាគផ្ទាល់តាមរយៈគណនី ABA ៖ 000849002 ៕

អត្ថបទ ៖ Se7en