- 2020-07-15 11:32:33
- សុខភាព
ទម្លាប់រស់នៅ ៨យ៉ាងនាំអ្នកឈានទៅរកភាពធាត់ដោយមិនដឹងខ្លួន
- 2020-07-15 11:32:33
- ចំនួនមតិ 0 | ចំនួនចែករំលែក 0
ទម្លាប់រស់នៅ ៨យ៉ាងនាំអ្នកឈានទៅរកភាពធាត់ដោយមិនដឹងខ្លួន
ចន្លោះមិនឃើញ
ឲ្យតែឡើងទម្ងន់ ពិបាកក្នុងការសម្រកមែនអត់? មុនចូលវ័យ ៣០ មនុស្សភាគច្រើន មិនសូវជាមានបញ្ហារឿងធាត់ទេព្រោះវ័យនេះ ប្រព័ន្ធរំលាយអាហារ និងដុតជាតិខ្លាញ់នៅធ្វើការល្អ ដូច្នេះញុំាច្រើនម៉េចក៏ដោយអាចសូវមិនធាត់ដែរ។
តែពេលចូលវ័យ ៣០ឆ្នាំហើយ អ្វីៗមិនដូចមុនទេ ពេលខ្លះភ្លេចខ្លួន ធាត់ជ្រុលបាត់ទៅហើយ ។ កុំឲ្យពិបាកសម្រកទាន់ តោះ! មកមើលទម្លាប់រស់នៅ ទាំង៨ យ៉ាងខាងក្រោមនេះ នឹងធ្វើឲ្យអ្នកធាត់ដោយមិនដឹងខ្លួន ហើយពិបាកក្នុងការសម្រក៖
១. គេងមិនគ្រប់
ការសិក្សាបានបង្ហាញថា ការដេកមិនគ្រប់នឹងធ្វើឲ្យអ្នកឃ្លាន បើទោះបីជាអ្នកញ៉ាំឆ្អែតក៏ដោយ ព្រោះថាគេងមិនគ្រប់នឹងធ្វើអោយប៉ះពាល់ដល់អ័រម៉ូនដែលគ្រប់គ្រងអាហារ។ សម្ពាធ ឬ ស្ត្រេស ក៏ជាមូលហេតុធ្វើឲ្យអ្នកគេងមិនលក់ ហើយបង្កើតអ័រម៉ូនធ្វើឲ្យអ្នកចេះតែឃ្លាន ហើយឡើងខ្លាញ់ផងដែរ។
២. ផឹកភេសជ្ជមានជាតិផ្អែម
ផឹកភេសជ្ជផ្អែមញឹកញាប់ ឬស្រាបៀរ និងភេសជ្ជកំប៉ុងពិតជាងាយស្រួលធ្វើឲ្យអ្នកផ្ទុកនូវកាឡូរីជាច្រើនក្នុងខ្លួន ដែលបណ្ដាលឲ្យអ្នកចេះតែឡើងទម្ងន់។ មួយវិញទៀត ការផឹកភេសជ្ជទាំងនេះ អាចឲ្យអ្នកអត់វាមិនបាន ដោយមិនដឹងខ្លួន បើនៅតែទម្លាប់ផឹករាល់ថ្ងៃ។
៣.មិនញ៉ាំអាហារពេលព្រឹក
កំហុសមួយដ៏ធំ ដែលមនុស្សជាច្រើនតែងតែធ្វើនោះ គឺមិនញ៉ាំអាហារពេលព្រឹក ព្រោះថាភាគច្រើនអ្នកដែលចង់សម្រកទម្ងន់ គឺប្រាកដជាមិនហ៊ានញ៉ាំអាហារពេលយប់នោះទេ ដូច្នេះហើយ រាងកាយរបស់អ្នកគឺត្រូវការអាហារ ពេលព្រឹកជាចាំបាច់។
៤. ញ៉ាំលឿនពេក
នៅសាកលវិទ្យាល័យ Rhode Island បានរកឃើញថាអ្នកដែលញ៉ាំយឺតៗ ញ៉ាំតិចជាង ១/៣ នៃអ្នកដែលញ៉ាំលឿន។ ម្យ៉ាងញ៉ាំលឿនពេក អ្នកនឹងទំពាមិនម៉ដ្ឋ និងពិបាកក្នុងការរំលាយអាហារ។ ញុំាលឿនពេក អាចធ្វើឲ្យឈឺពោះ ព្រោះក្រពះកិនមិនទាន់ ។ ទោះឃ្លានយ៉ាងណាក៏ដោយ ត្រូវព្យាយាមញុំាតាមសម្រួល។
៥. បង្អត់អាហារ
ប្រសិនបើអ្នកមិនញ៉ាំអាហារទៀងម៉ោង ឬលើសពី ៣ ទៅ ៥ ម៉ោងនៃពេលញ៉ាំអាហារនោះ អ្នកនឹងចាប់ផ្ដើមឃ្លានខ្លាំង ហើយពិបាកក្នុងការទប់អារម្មណ៍ ញ័រដៃញ័រជើងមិនខាន មួយទៀតអ្នកនឹងចាប់ផ្ដើមញ៉ាំច្រើនជាងមុនទៅទៀត។
៦. មិនសូវបានធ្វើសកម្មភាពឲ្យចេញញើស
ភាពមមាញឹកក្នុងការសិក្សា និងធ្វើការបានបណ្ដាលឲ្យមនុស្សភាគច្រើន គ្មានពេលក្នុងការហាត់ប្រាណ។ បើទោះបីជាអ្នកខិតខំកាត់បន្ថយអាហារក៏ដោយ ប៉ុន្តែប្រសិនបើអ្នកមិនបានហាត់ប្រាណនោះទេ គឺកាឡូរីនៅក្នុងអាហារដែលអ្នកញ៉ាំគឺមិនអាចដុតបាននោះទេ។
៧. មើលទូរស័ព្ទ ឬទូរទស្សន៍អំឡុងពេលញ៉ាំអាហារ
មើលទូរស័ព្ទ ឬ ទូរទស្សន៍កំឡុងពេលញ៉ាំអាហារអាចឲ្យអ្នកញុំាច្រើនភ្លេចខ្លួន ឬ ញុំាអត់ដឹងឆ្អែត ដែលជាមូលហេតុឲ្យឡើងទម្ងន់បាន។ ការស្រាវជ្រាវបានបង្ហាញថា មនុស្សម្នាក់អាចញ៉ាំច្រើនជាងធម្មតា គឺនៅពេលកំពុងមើលទូរទស្សន៍។
៨. ញ៉ាំអាហារច្រើនប្រភេទក្នុងពេលតែមួយ
បើអ្នកជាមនុស្សចូលចិត្តញ៉ាំអាហារច្រើនមុខក្នុងពេលតែមួយ នេះក៏អាចជាមូលហេតុឲ្យអ្នកញុំាច្រើនដោយមិនដឹងខ្លួន ព្រោះពេលខ្លះអាហារប្រភេទផ្សេងគ្នា អាចធ្វើឲ្យប៉ះពាល់ដល់ដំណើរនៃការរំលាយអាហារ។ ជាទូទៅ បើមានអាហារច្រើនមុខនឹងធ្វើឲ្យអ្នកញ៉ាំកាន់តែច្រើនជាងមុន។
ហេតុនេះហើយ ពេលឈានចូលវ័យខ្ទង់ ៣០ បើអ្នកមិនគិតគូរ ផ្លាស់ប្តូរទម្លាប់រស់នៅ និងរបបអាហារឲ្យត្រឹមត្រូវជួយដល់សុខភាពទេ ដឹងតែខូចរាងហើយ ពិសេសត្រូវព្យាយាម រកពេលហាត់ប្រាណឲ្យបានយ៉ាងហោចណាស់ ៣០នាទី ក្នុង១ថ្ងៃ ៕