អាហារូបករណ៍ទៅចិន ឬអឺរ៉ុប មួយណាក៏ល្អដែរ តែបើខ្វះ៣យ៉ាងនេះ ទើបពិបាក

2021-01-05 02:06:37
ការអប់រំ

2021-01-05 02:06:37
ចំនួនមតិ 0 | ចំនួនចែករំលែក 0

ចន្លោះមិនឃើញ

មួយរយៈចុងក្រោយនេះ គេសង្កេតឃើញមានជំនួយអាហារូបករណ៍មកពីរដ្ឋាភិបាលចិនហូរហែផ្ដល់ដល់និស្សិតកម្ពុជា ស្របពេលកំណើនប្រជាជនចិន ក្លាយជាភ្ញៀវទេសចរលំដាប់ទី១នៅកម្ពុជា។ ទន្ទឹមគ្នានេះ អ្នកជំនាញក្នុងវិស័យអប់រំ លោកបណ្ឌិត ឈួន ចាន់ថន បង្ហាញគំនិតសុទិដ្ឋិនិយមថា វាជាឱកាសដ៏ល្អសម្រាប់យុវជនចាប់យកជំនាញភាសាចិនបន្ថែម និងអាចឈោងទៅសិក្សានៅប្រទេសយក្សមួយនេះ។ លោកថា បច្ចុប្បន្នមានក្រុមហ៊ុនចិនជាច្រើននៅកម្ពុជា ខ្វះបុគ្គលិកអាចនិយាយភាសាចិន ខណៈប្រាក់ខែជាមធ្យមប្រមាណពី ៥០០ ទៅ ៨០០ដុល្លារអាមេរិក។

លោកបណ្ឌិត ឈួន ចាន់ថន ដោយបានណែនាំដល់និស្សិតបើមានបំណងដាក់អាហារូបករណ៍ទៅបរទេស មិនគួររឿងសាកលវិទ្យាល័យនៅប្រទេសណាខ្លាំងពេកពេកនោះទេ សាកលវិទ្យាល័យនៅស្រុកគេធំៗ ដូចជាកូនទីក្រុងមួយ មានស្ដង់ដារ។ ហេតុនេះ និស្សិត គួរកុំខ្វល់ថាអាហារូបករណ៍ ទៅចិន ទៅអឺរ៉ុប ពោលគឺទៅរៀននៅសាលាក៏សុទ្ធតែល្អទាំងអស់ តែសំខាន់គឺខ្លួនឯង។

លោកបណ្ឌិត ឈួន ចាន់ថន

លោកបណ្ឌិត ចាន់ថន បង្ហើបគន្លឹះ ៣ ចំណុច ត្រូវត្រៀម មុននឹងដាក់អាហារូបករណ៍ទៅរៀននៅប្រទេសចិន ដូចខាងក្រោម៖

១. ភាសា

បើដាក់អាហារូបករណ៍ទៅប្រទេសចិន អ្វីដែលត្រូវសំខាន់បំផុតគឺភាសា យ៉ាងហោចណាស់ក៏ចេះភាសាចិនបន្តិចបន្តួចដែរ។ មួយវិញទៀត បើភាសាចិនមិនអាចទៅរួច គួរតែចេះភាសាអង់គ្លេសអាចប្រើប្រាស់បាន ព្រោះការសិក្សានៅទីនោះ សៀវភៅភាសាអង់គ្លេស-ចិន មានច្រើន ដែលងាយស្រួលសម្រាប់សិស្សអន្តរជាតិខ្សោយភាសាចិន។

២. ជំនាញទន់

ជំនាញទន់ គឺការទំនាក់ទំនងប្រកបដោយសីលធម៌។ វាជាមុខមាត់សម្រាប់ប្រទេសយើងមួយ ដែលជាប្រជាជាតិមានក្រមសីលធម៌ល្អ អាចរស់នៅ និងចុះសម្រុងក្នុងការចូលរួមសង្គមជាមួយជាជនជាតិគេផ្សេង។

៣. ជំនាញរឹង

ចំណុចទី៣ គឺការជ្រើសរើសជំនាញរឹង។ ជំនាញទំនាក់ទំនងល្អ ក៏ត្រូវការជំនាញពិតប្រាកដបន្ថែមដែរ ។ បើបានទៅសិក្សានៅស្រុកគេហើយ គួរតែសម្លឹងមើលជំនាញណាមានតម្រូវការតាមទីផ្សារជាក់ស្ដែងនៅក្នុងស្រុក ត្រូវចេះឲ្យពិតប្រាកដ និងត្រឡប់មកអភិវឌ្ឍប្រទេសយើងវិញ។