​កម្មវិធី Starting Up ​សប្ដាហ៍​ទី២១នេះ​ ប្រិយមិត្តនឹង​ទទួល​បាន​បទពិសោធន៍​ពី​ការ​បើក​អាជីវកម្មរកសុី​ គន្លឹះថ្មី​ពីដំណើរការអាជីវកម្ម​ដំបូង​ពី​ភ្ញៀវកិត្តិយស ដែលជាស្ថាបនិក សហគ្រាសថូង អ៊ិនធ័រប្រាយស៍ ដែលកំពុងជោគជ័យ​លើអាជីវកម្មរបស់ខ្លួន។ កញ្ញា ថូង ធីតា នឹងចូលខ្លួនមកបើកកកាយជីវប្រវត្តិ ការសិក្សា បទពិសោធន៍ការងារ ដំណើរជីវិត មុនឈានជើងមកដល់ភាពជោគជ័យដល់ពេលបច្ចុប្បន្ន។

កញ្ញា ថូង ធីតា ជានិស្សិតដែលបានថ្នាក់បញ្ចប់បរិញ្ញាប័ត្រជាន់ខ្ពស់ មកពីសាកលវិទ្យាល័យភូមិន្ទនិតីសាស្រ្ត និងវិទ្យាសាស្រ្តសេដ្ឋកិច្ច។ កញ្ញា ជាកូនស្រីអ្នកកសិករធ្វើអំបិលជាង៣០ឆ្នាំ និងមានចិត្តចង់លើកស្ទួយវិស័យកសិកម្មផលិតអំបិល កម្ពុជានាំចេញទៅអន្តរជាតិ។

ដោយមានចិត្តចង់លើកស្ទួយវិស័យកសិកម្មផលិតអំបិល កញ្ញា ធីតា បានបំលែងពីអាជីវកម្មលក្ខណៈគ្រួសារ មកជាសហគ្រាសសង្គមធុនមធ្យមឆ្នាំ ២០១៧ ដើម្បីធានាឲ្យបាននូវជំហររឹងមាំ ជួយបង្កើតការងារដល់កសិករច្រើនជាង ២៥ គ្រួសារក្នុង សហគមន៍ផលិតអំបិលនៅកំពត។ អំបិលធម្មជាតិនេះត្រូវបានផលិតឡើងតាមបែបប្រពៃណីធម្មជាតិ ប្រកបដោយគុណភាព និងអនាម័យខ្ពស់ មិនមែនជាអំបិលគីមីកែច្នៃទេ។

«អំបិលធម្មជាតិកំពត ធីតា» គឺជាសិប្បកម្មផលិតអំបិលធម្មជាតិលើផ្ទៃដីចំនួន ៥០ ហិចតាក្នុងខេត្តកំពត។ អំបិលនេះផ្ទុកនូវ ប្រភេទរ៉ែចំបងៗ និងប្រភេទរ៉ែ កម្រជាច្រើនមុខផ្តល់សារៈសំខាន់ដ៏ធំធេងដល់រាង កាយមនុស្សនិងដំណើរការជីវសាស្ត្រក្នុងរាងកាយដែលអំបិលរោងចក្រពុំអាចប្រៀបធៀបបាន។

កញ្ញា ធីតា ដើរតួជាអ្នកបច្ចេកទេសខ្លួនឯងផង ជានាយកក្រុមហ៊ុនផង និង ជាអ្នករកភ្ញៀវផង។អាជីវកម្មរបស់កញ្ញា ទទួលបានជោគជ័យ ដោយផលិតបានអំបិលខ្មែរឈានមុខគេស្តង់ដារអន្តរជាតិ មានការគាំទ្រយ៉ាងច្រើន ទាំងក្នុងស្រុក និងនាំចេញទៅទីផ្សារជប៉ុន។ លើសពីនេះ កញ្ញាក៏ធ្លាប់បានឈ្នះពានរង្វាន់ សហគ្រិនវ័យក្មេងប្រចាំឆ្នាំ ២០១៨ និងពានរង្វាន់សហគ្រិនថ្នាក់ជាតិ ២០២០  National Entrepreneurship Awards 2020។

​ ចង់​ជ្រាប់​កាន់​តែ​ច្បាស់​កុំភ្លេចរង់ចាំជួបជាមួយនឹងកញ្ញា ថូង ធីតា ស្ថាបនិក សហគ្រាសថូង អ៊ិនធ័រប្រាយស៍ ផលិតផ្កាអំបិលធម្មជាតិកំពត នៅក្នុងកម្មវិធី Starting Up សប្ដាហ៍ទី២១នេះ នៅថ្ងៃសៅរ៍ ទី១១ ខែធ្នូ ឆ្នាំ ២០២១ វេលាម៉ោង ១០ព្រឹក នៅលើទំព័រហ្វេសប៊ុកផេកផ្លូវការរបស់កម្មវិធី Starting Up ក៏ដូចជា channel YouTube "Sabay TV" និងស្ដាប់ជាសំឡេង Podcast "Starting Up"៕