អ្វីក៏ដោយមានសក្ដានុពលរៀងខ្លួន ដូចបន្ទាយស្រី អភិបាលស្រុករកឃើញសក្ដានុពលនោះ ទើបបានលទ្ធផលល្អដូចពេលនេះ!

2022-06-15 07:04:33
ព័ត៌មាន

2022-06-15 07:04:33
ចំនួនមតិ 0 | ចំនួនចែករំលែក 0

ចន្លោះមិនឃើញ

មុនការមកដល់របស់អភិបាលស្រុកវ័យក្មេង ឃឹម ហ្វីណង់ ស្រុកបន្ទាយស្រីគ្រាន់ជាស្រុកធម្មតាមួយនៃខេត្តសៀមរាប។ ប៉ុន្តែបច្ចុប្បន្ន បន្ទាយស្រីបានក្លាយជាគោលដៅទេសចរណ៍ចម្បងបន្ទាប់ សម្រាប់ភ្ញៀវទេសចរណ៍ដែលទៅដល់ខេត្តសៀមរាប នោះក៏ព្រោះតែថ្នាក់ដឹកនាំស្រុកបានរកឃើញនូវសក្ដានុពលពិតប្រាកដមួយនៃស្រុកមួយនេះ។

លោក ឃឹម ហ្វីណង់ បានមកទទួលភារកិច្ចដឹកនាំស្រុកបន្ទាយស្រីក្នុងឆ្នាំ ២០១៩។ នៅក្នុងកម្មវិធី "ជជែកអំពីទេសចរណ៍កម្ពុជា" ក្រោមប្រធានបទ "សក្ដានុពលកសិ-ទេសចរណ៍ស្រុកបន្ទាយស្រី ភ្ញៀវទេសចរអាចមកមើល និងធ្វើ" របស់សហភាពសហព័ន្ធយុវជនកម្ពុជា វិស័យទេសចរណ៍ លោកអភិបាលបានរៀបរាប់ថា លោកបានរិះរកវិធីដើម្បីលើកកម្ពស់ស្រុកក្នុងសមត្ថកិច្ចរបស់លោកនេះ ដោយដំបូងឡើយមើលពីទីតាំងភូមិសាស្ត្រ។

និយាយពីចំណុចអន់ថយមុន លោកថា ស្រុកបន្ទាយស្រីរបស់លោកជាតំបន់ខ្ពស់រាប មិនមានដីច្រើនសម្រាប់ឲ្យធ្វើស្រែចម្ការទេ។ ក្រៅពីនេះ បន្ទាយស្រីគ្រាន់តែកន្លែងដែលទឹកហូរកាត់ មិនមានប្រភពទឹកនោះទេ។ ដូច្នេះហើយ វាមិនសមស្របសម្រាប់ប្រជាពលរដ្ឋក្នុងមូលដ្ឋានផ្ដោតទៅលើតែការដាំដុះនោះឡើយ។

ងាកមកមើលការធ្វើស្រែរបស់ប្រជាពលរដ្ឋវិញ ១ហិកតាបានផលប្រមាណ ២-៣តោនប៉ុណ្ណោះ។ តួលេខនេះ នៅទាបខ្លាំងធៀបនឹងតំបន់ផ្សេងៗដូចជា ព្រៃវែង បាត់ដំបង ដែលជាតំបន់វាលទំនាប។ ដូច្នេះលោកថា បើប្រកាន់យកជីវភាពដូចតំបន់ទាំងនោះ គឺមិនអាចទៅរួចឡើយដើម្បីលើកកម្ពស់កម្រិតជីវភាពរបស់ប្រជាពលរដ្ឋ។

ក្រោយពីវិភាគលើចំណុចអន់ថយ លោកក៏ងាកគិតពីសក្ដានុពលរបស់បន្ទាយស្រីវិញ។ លោក ឃឹម ហ្វីណង់ លើកឡើងថា បន្ទាយស្រីជាប់នឹងកាំជណ្ដើរក្រុងសៀមរាបតំបន់ដែលមានសក្ដានុពលទេសចរណ៍ស្រាប់។ ដូច្នេះផែនការរបស់លោក គឺធ្វើយ៉ាងណារកវិធីទាក់ទាញភ្ញៀវទេសចរពីក្រុងសៀមរាបឲ្យបាន។ ទីបំផុតទន្ទឹមនឹងបន្ទាយស្រីមិនអាចផ្ដោតលើកសិកម្មពេញទំហឹងបាន លោកក៏បានជ្រើសផែនការអភិវឌ្ឍស្រុកបន្ទាយស្រីតាមបែប កសិ-ទេសចរណ៍តែម្ដង។

តាមរយៈផែនការនេះ បន្ទាយស្រីបានប្រែមុខមាត់ តាមរយៈលើកកម្ពស់បែបបទនៃការរស់នៅរបស់ប្រជាពលរដ្ឋក្នុងមូលដ្ឋាន ជាមួយការរស់នៅស្អាត មានអនាម័យ ភូមិដ្ឋានមានរបៀបជាដើម។ បច្ចុប្បន្ន ស្រុកបន្ទាយស្រី បានក្លាយជាគោលដៅទេសចរណ៍បន្ទាប់ចម្បងមួយ សម្រាប់ភ្ញៀវទេសចរដែលទៅលេងខេត្តសៀមរាប ក្នុងនោះ ភូមិប្រដាក គឺជាភូមិមួយក្នុងចំណោមភូមិទាំង ៣៦របស់ស្រុក ដែលលេចធ្លោបំផុត។

លោក ឃឹម ហ្វីណង់ បញ្ជាក់ថា លោកនៅមានផែនការអភិវឌ្ឍន៍ច្រើនទៀតក្នុងស្រុកជាសមត្ថកិច្ចរបស់លោក ដែលនេះ ស្របតាមផែនការមេរបស់រាជរដ្ឋភិបាលអភិវឌ្ឍន៍ខេត្តសៀមរាបឆ្នាំ ២០២១-២០៣៥ ដែលបានអនុម័តកាល៣០ មីនា ២០២១ ជ្រើសរើសស្រុកបន្ទាយស្រីជាតំបន់អាទិភាពស្រាប់៕