- 2014-10-15 15:29:59
- ការអប់រំ
ក្រោយបញ្ចប់ការប្រលង សិស្សខ្លះសង្ឃឹម ខ្លះគ្មានសូម្បីបន្តិច
- 2014-10-15 15:29:59
- ចំនួនមតិ 0 | ចំនួនចែករំលែក 0
ក្រោយបញ្ចប់ការប្រលង សិស្សខ្លះសង្ឃឹម ខ្លះគ្មានសូម្បីបន្តិច
ចន្លោះមិនឃើញ
បន្ទាប់ពីសំឡេងជួងបន្លឺឡើងនៅវេលាម៉ោង៤:៣០ ល្ងាចម្សិលមិញ បញ្ជាក់ថា មុខវិជ្ជាគណិតវិទ្យាបានបញ្ចប់ហើយ ហើយក៏ជាមុខវិជ្ជាចុងក្រោយនៃការប្រលងបាក់ឌុបលើកទីពីរនេះផងដែរ។ សិស្សានុសិស្សបានចាកចេញពីមណ្ឌលប្រលង ខ្លះមានទឹកមុខស្រងូតស្រងាត់ ស្លេកស្លាំង ប៉ុន្តែខ្លះទៀតរីករាយ។
ជាក់ស្ដែង កញ្ញាស្រីតី ត្រូវមកប្រលងនៅមណ្ឌលព្រះយុគន្ធប្រាប់ថា ការប្រលងពីរថ្ងៃនេះ កញ្ញាធ្វើបានច្រើន បើប្រៀបនឹងប្រលងលើកទីមួយ ហើយ លើកទីពីរនេះយុវតីរូបនេះសង្ឃឹមច្រើនព្រោះមានបទពិសោធន៍រួចហើយ។
ស្រីតីប្រាប់បន្តថា៖ ”ខ្ញុំធ្វើបានប្រហែល៧០%ទៅ៨០% ហើយមិនសូវភ័យប៉ុន្មានទេ។ លើកមុនខ្ញុំភ័យឡើងញ័រជើង សរសេរអីក៏អត់កើតដែរ។ វិញ្ញាសាប្រលងលើកទីមួយ និងទីពីរគឺខុសគ្នាដាច់។ ការប្រឡងលើកទីពីរនេះ មុខវិជ្ជាគណិតលំបាកជាងគេសម្រាប់ខ្ញុំ។ មិនមែនមុខវិជ្ជាគណិតលំបាកទេ អាចថាមកពីខ្ញុំខ្សោយគណិតខ្លួនឯង ម្យ៉ាងក្នុងបន្ទប់អត់មានអ្នកចេះ អ្នកចេះពីមុនគេជាប់អស់ហើយ។ ប្រលងលើកនេះវិញ្ញាសារៀងធូរជាងលើកទីមួយ។ ខ្ញុំប្រលងធ្លាក់លើកមុនមកពីតឹងពេក ហើយមិនបានត្រៀមលក្ខណៈរៀនត្រៀមជាមុន តែលើកនេះខ្ញុំប្រឹងប្រែងព្រោះមិនចង់ធ្លាក់ម្តងទៀតឡើយ”។
-អត្ថបទពាក់ព័ន្ធ៖ ៦រឿងប្លែកៗ ថ្ងៃប្រលងបាក់ឌុបលើកទី២
សម្រាប់កញ្ញា ស្រីវួច សិស្សរៀននៅវិទ្យាល័យទួលអម្ពិល ត្រូវមកប្រលងមណ្ឌលព្រះយុគន្ធដែរ ប្រាប់ថា រយៈពេលពីរថ្ងៃនៃការប្រលងនេះ ស្រីវួចសង្ឃឹមតិចណាស់ថាជាប់។
ស្រីវួចថា៖ ”មុខវិជ្ជាគណិតលំបាកណាស់ ធ្វើមិនបានទេ តែចេះតែសរសេរឲ្យតែពេញៗទៅកុំឲ្យទុកក្រដាសសទៅគ្រូ តែបើថាត្រូវហើយជាប់ដូចគ្មានសង្ឃឹមឡើយ”។
ចំពោះយុវសិស្សរៀននៅសាលាប៊ែលធី ឈ្មោះសត្យា និយាយថា៖ “ក្នុងអំឡុងពីរថ្ងៃនេះ ខ្ញុំធ្វើបានច្រើនគួរសម។ មុខវិជ្ជាគីមី និងគណិតលំបាកជាងគេសម្រាប់ខ្ញុំ ខ្ញុំធ្វើអត់បានសោះ។ ការប្រលងនៅតែតឹងធ្វើឲ្យខ្ញុំសង្ឃឹមតិចណាស់ថាជាប់”។
កញ្ញាម៉ាឡាមកពីវិទ្យាល័យទួលអំពិលនិយាយថា៖ ”មុនមកប្រលងខ្ញុំគិតរួចហើយថាគ្មានសង្ឃឹម។ វិញ្ញាសាអត់សូវលំបាកទេ តែពិបាករឿងតឹងតែម្ដង។ ខ្ញុំធ្វើបានច្រើនគួរសមលើមុខវិជ្ជាប្រវត្តិ និងខ្មែរ ក្រៅពីនោះធ្វើបានតិចណាស់។ ខ្ញុំសង្ឃឹមតែ២០%ប៉ុណ្ណោះសម្រាប់ការប្រលងលើកទីពីរនេះ”។
ការប្រលងបាក់ឌុបមានបេក្ខជន ៦៧០០០នាក់ ដោយចែកជា១១៧មណ្ឌល។ ចំណែកលទ្ធផលប្រលងនឹងប្រកាសនៅថ្ងៃទី៤ ខែវិច្ឆិកា ឆ្នាំ២០១៤៕
-ធ្លាយបេក្ខជនជិត១ម៉ឺននាក់ បោះបង់ចោលប្រលងបាក់ឌុបលើកទី២
អត្ថបទ៖ លឹម សុនា