- 2017-03-06 01:39:41
- ការអប់រំ
ប្រព័ន្ធអប់រំសំខាន់៣ ដែលយុវជនត្រូវមាន ដើម្បីជីវិតជោគជ័យ
- 2017-03-06 01:39:41
- ចំនួនមតិ 0 | ចំនួនចែករំលែក 0
ប្រព័ន្ធអប់រំសំខាន់៣ ដែលយុវជនត្រូវមាន ដើម្បីជីវិតជោគជ័យ
ចន្លោះមិនឃើញ
ជាបុគ្គលដែលបានតស៊ូក្នុងជីវិតពីមានជីវភាពក្រខ្សត់ រហូតក្លាយជាអ្នកជំនួញដ៏ជោគជ័យមួយរូប លោកសោម សម្បត្តិបាននិយាយថាដើម្បីអោយយុវជនទទួលបានភាពជោគជ័យក្នុងជីវិតគឺលុះត្រាតែពួកគេទទួលបានប្រព័ន្ធអប់រំសំខាន់បីជាមុនសិន។ ការលើកឡើងបែបនេះគឺក្នុងឱកាសដែលលោកត្រូវបានអញ្ជើញជាវាគ្មិនក្នុងកម្មវិធី "អាថ៌កំបាំងនៃការធ្វើខ្លួនឯងអោយមានតម្លៃ" ដែលរៀបចំឡើងដោយ សមាគមអ្នកមានអាជីពផ្នែកលក់នៅកម្ពុជា នៅឯមជ្ឈមណ្ឌលសហប្រតិបត្តិការកម្ពុជាកូរ៉េ កាលពីថ្ងៃទី ៤ មីនា ២០១៧។
១ ចំណេះដឹងទូទៅ
អគ្គនាយកនៃសហគ្រាសថ្នាំពណ៌ជាតិ Cam-Paint រូបនេះបានអោយដឹងថា ចំណេះដឹងទូទៅ រឺ Academic Education គឺសំដៅទៅលើចំណេះដឹងទាំងឡាយណាដែលទទួលបានពីសាលារៀន រឺ គ្រឹះស្ថានអប់រំនានា។ ជាការចាំបាច់ណាស់ដែលមនុស្សម្នាក់ៗត្រូវមានចំណេះដឹងជាមូលដ្ឋាន តាមរយៈការអាចអាន និង សរសេរបាន។ ព្រោះថាប្រការនេះនឹងអាចធ្វើអោយយុវជនរួចផុតពីអនក្ខរភាព។
២ ជំនាញវិជ្ជាជីវៈ
លោកសោម សម្បត្តិ បានពន្យល់ថា ការមានត្រឹមតែចំណេះដឹងក្នុងសាលារៀនមួយមុខ ក៏ពុំទាន់គ្រប់គ្រាន់សម្រាប់ជីវិតជោគជ័យនោះដែរ។ គេត្រូវមានជំនាញមួយច្បាស់លាស់ដែលអាចប្រើការបាន ទើបអាចចាប់យកអាជីពមួយពិតប្រាកដសម្រាប់ចិញ្ចឹមជីវិត ក៏ដូចជាជួយដល់សង្គម។ លោកបានលើកជាឧទាហរណ៍ផ្ទាល់ខ្លួនថា ជាការពិតលោករៀនបានត្រឹមថ្នាក់ទី៦ប៉ុណ្ណោះ ប៉ុន្តែដោយសារការខំប្រឹងរៀនផ្នែកជំនាញវិជ្ជាជីវៈ ទីបំផុតលោកអាចរៀនចេះរហូតដល់៣ភាសា។ លើសពីនេះទៅទៀត លោកបានរៀនជំនាញខាងផ្នែកផលិតថ្នាំលាប រហូតឈានដល់ការបើកសហគ្រាស និង ទទួលបានជោគជ័យលើមុខជំនួញនេះទៀតផង។
៣ ចំណេះដឹងហិរញ្ញវត្ថុ
អ្នកជំនួញផ្នែកថ្នាំពណ៌រូបនេះ បានបន្តថា ចំណេះដឹងផ្នែកហិរញ្ញវត្ថុគឺជាអ្វីដែលមនុស្សភាគច្រើនបានមើលរំលង។ លោកបានបញ្ជាក់ថា នៅពេលដែលយុវជនមិនទាន់មានចំណេះដឹងក្នុងការគ្រប់គ្រងចំណូលចំណាយរបស់ខ្លួននោះទេ គឺពួកគេមិនងាយនឹងទទួលបានជោគជ័យក្នុងជីវិតនោះឡើយ។ ពួកគេត្រូវតែខិតខំរៀនសូត្រលើការគ្រប់គ្រងផ្នែកហិរញ្ញវត្ថុនេះ ដើម្បីធ្វើយ៉ាងណាអោយមានតុល្យភាពនៃផ្នែកហិរញ្ញវត្ថុពេលបើករបររកស៊ី ហើយជាពិសេសគឺអាចចៀសផុតពីបំណុលវ័ណ្ឌក។ លោកបានណែនាំអោយយុវជនគួរតែអានសៀវភៅមួយក្បាលដែលមានចំណងជើងថា "កំពូលអ្នកមាននៅទីក្រុងបាប៊ីឡោន" រឺ The Richest man in Babylon ដើម្បីទទួលបានចំណេះដឹងល្អៗលើផ្នែកនេះបន្ថែម។
