- 2018-04-24 07:40:02
- សេដ្ឋកិច្ច
ក្រុងស្ទឹងសែន បង្ហាញប្លង់មេ ស្ថាបនាសួនច្បារដ៏ស្រស់ស្អាតមួយ
- 2018-04-24 07:40:02
- ចំនួនមតិ 0 | ចំនួនចែករំលែក 0
ក្រុងស្ទឹងសែន បង្ហាញប្លង់មេ ស្ថាបនាសួនច្បារដ៏ស្រស់ស្អាតមួយ
ចន្លោះមិនឃើញ
ដើម្បីលើកកម្ពស់សោភ័ណភាពក្រុងស្ទឹងសែន ឱ្យកាន់តែស្រស់ស្អាតប្លង់មេជារូប 3D ស្ថាបនាសួនច្បារមួយត្រូវបានបង្ហាញ ដោយឯកឧត្ដម សុខ លូ អភិបាលនៃគណៈអភិបាលខេត្តកំពង់ធំ តាមរយៈបណ្តាញសង្គម Facebook ផ្ទាល់ខ្លួន។
ថ្លែងប្រាប់តាមទូរសព្ទឯកឧត្ដមបានលើកឡើងថា នេះគ្រាន់ជាប្លង់បឋមប៉ុណ្ណោះ នៃការស្ថាបនាសួនច្បារ ខណៈគម្រោងសាងសង់អាចនឹងចាប់ផ្ដើមនៅឆ្នាំក្រោយ ចាប់ពីចំណុចគល់ស្ពានស្ទឹងសែនរហូតដល់វេទិកាអុំទូក។
ចុចអាន៖ ពិសេសអស់ស្ទះ! សួនច្បារមុខព្រះបរមរាជវាំង កែប្រែមុខមាត់ថ្មីបានសម្រេច
ឯកឧត្ដមថា ក្រុមការងារផ្នែកសាងសង់នឹងត្រូវរង់ចាំរហូតដល់ទៅការស្ថាបនាច្រាំងស្ទឹងសែនរួចរាល់ ១០០%សិន។ ច្រាំងស្ទឹងសែន ដែលកំពុងសាងសង់មានប្រវែង ៣០០ ម៉ែត្រ ។ «អញ្ចឹងយើងត្រូវរង់ចាំរហូតដល់ការសាងសង់ច្រាំងរួចរាល់សិន ដើម្បីទប់ដីមិនឱ្យបាក់ទើបយើងអាចស្ថាបនាច្បារសួនបាន។ ម្យ៉ាងប្លង់មេដែលបានបង្ហាញនេះ នឹងត្រូវឆ្លងកិច្ចប្រជុំ ដើម្បីឈានទៅធ្វើការកែសម្រួលបន្ថែមទៀត»។
ឯកឧត្ដមបានបន្ថែមថា សួនច្បារនេះ ត្រូវបានធ្វើឡើងក្នុងគោលបំណងបង្កលក្ខណៈងាយស្រួលដល់បងប្អូនប្រជាពលរដ្ឋទាំងអស់អាចមកលំហែកាយ ស្រូបយកខ្យល់អាកាស និងការហាត់ប្រាណ ហើយខេត្តក៏មានគម្រោងផ្សេងៗជាច្រើនទៀត ដើម្បីធ្វើយ៉ាងណាឱ្យសោភ័ណក្រុងកាន់តែស្រស់ស្អាត។ បន្ទាប់ពីចលនាប្រឡងប្រណាំងទីក្រុងស្អាតលើកទី២ (២០១៥-២០១៨) កន្លងផុតទៅ លទ្ធផលបង្ហាញថា គ្រប់ក្រុង-ខណ្ឌ បេក្ខភាពសុទ្ធតែទទួលបានផ្ការំដួលទាំងអស់គ្នា ក្រុង-ខណ្ឌខ្លះ ទទួលបានផ្ការំដួល១ទង ផ្ការំដួល២ទង និងផ្ការំដួល៣ទង ដោយឡែកនៅក្រុងស្ទឹងសែន ខេត្តកំពង់ធំ ទទួលបានពានរង្វាន់ ផ្តារំដួល ២ទង។
ឯកឧត្ដម សុខ លូ បានជំរុញដល់អភិបាលក្រុងស្ទឹងសែន និងមន្ទីរទេសចរណ៍ខេត្ត ត្រូវប្រឹងប្រែងឲ្យបានខ្លាំងក្លាបំផុត ដើម្បីទទួលបានផ្ការំដួល៣ទង ព្រោះនេះមោទកភាពរបស់ខេត្តកំពង់ធំ។ ទីក្រុងស្អាតនាំមកនូវផាសុកភាព ជំរុញការរក្សាបាននូវអនាម័យល្អ និងសណ្ដាប់ធ្នាប់ល្អ ដែលជាការរួមចំណែកក្នុងការទាក់ទាញ ទេសចរ និងចំណេញដល់សេដ្ឋកិច្ចជាតិ តាមរយៈការធ្វើឲ្យជីវភាពប្រជាពលរដ្ឋនៅទីនោះមានការរីកចម្រើន៕
