- 2020-04-22 03:39:09
- ការអប់រំ
អ្នកដែលចង់ដឹងអំពីរឿងរ៉ាវខ្មែរក្រហម គ្រាន់តែមាន App នេះក្នុងទូរសព្ទ
- 2020-04-22 03:39:09
- ចំនួនមតិ 0 | ចំនួនចែករំលែក 0
អ្នកដែលចង់ដឹងអំពីរឿងរ៉ាវខ្មែរក្រហម គ្រាន់តែមាន App នេះក្នុងទូរសព្ទ
ចន្លោះមិនឃើញ
កម្មវិធីទូរស័ព្ទដៃបង្កើតឡើងដោយមានជំនួយថវិកាពីសហភាពអឺរ៉ុប ជួយលើកទឹកចិត្តឲ្យនិស្សិតខ្មែររៀនអំពីប្រវត្តិសាស្ត្រខ្មែរក្រហម ក្រៅថ្នាក់រៀន។ នេះយោងតាមសេចក្ដីប្រកាសព័ត៌មានមួយ ដែលចេញផ្សាយដោយក្រុមហ៊ុន ក្រុមហ៊ុន Particip Gmbh ដែល Sabay ទើបទទួលបាន នៅថ្ងៃទី ២២ ខែមេសា ឆ្នាំ២០២០នេះ។
ប្រភពដដែលបានសរសេរថា នេះជារបៀបមួយងាយស្រួលដើម្បីស្វែងយល់អំពីប្រវត្តិសាស្ត្រខ្មែរក្រហមឲ្យបានកាន់តែច្រើនថែមទៀត លោកអ្នកគ្រាន់តែបញ្ចូលកម្មវិធីដែលមានឈ្មោះថា App-learning on Khmer Rouge history នៅក្នុងទូរស័ព្ទដៃរបស់លោកអ្នកតែប៉ុណ្ណោះ។
កម្មវិធីនេះត្រូវបានបង្កើតឡើងដោយមានជំនួយថវិកាពីសហភាពអឺរ៉ុប ហើយកំពុងតែត្រូវបានផ្សព្វផ្សាយដោយមជ្ឈមណ្ឌលបុប្ផាណា ឲ្យសិស្ស និស្សិតនៅតាម សាលាមធ្យមសិក្សា និងសកលវិទ្យាល័យក្នុងប្រទេសកម្ពុជា ចេះប្រើប្រាស់ ដោយលើកទឹកចិត្តពួកគេឲ្យបញ្ចូលកម្មវិធីនេះនៅក្នុងទូរស័ព្ទដៃរបស់ពួកគេ ដូច្នេះ ពួកគេអាចរៀនសូត្រអំពីប្រវត្តិសាស្ត្រដ៏ខ្មៅងងឹតជាងគេមួយនេះរបស់ប្រទេសកម្ពុជា បន្ថែមពីលើអ្វីដែលពួកគេបានរៀននៅសាលា។
លោកស្រី តាន់ និស្ស័យ ដែលជាភ្នាក់ងារអប់រំចល័ត និងដែលបានចុះបំពេញបេសកកម្មផ្សព្វផ្សាយកម្មវិធីទូរស័ព្ទដៃនេះ តាំងពីខែវិច្ឆិកា ឆ្នាំ២០១៨មកនោះ បានបញ្ជាក់ថា អត្ថបទដែលមាននៅក្នុងកម្មវិធីនេះ គឺសរសេរដោយគ្មានភាពស្មុគស្មាញនោះទេ នៅពេលដែលសិស្ស និស្សិតអានអត្ថបទទាំងនេះហើយ ពួកគេអាចយល់ដឹងបានច្រើន។ លើសពីនេះទៀត យើងមានបញ្ចូលរូបភាពបែបសិល្បៈ រូបថត ក៏ដូចជាកម្រងវីដេអូឯកសារផងដែរប្រសិនបើពួកគេចង់មើល។
លោកស្រីបានបន្ថែមថា អ្វីដែលយើងកត់សម្គាល់ឃើញនោះ គឺសិស្ស និស្សិតពិតជាចាប់អារម្មណ៍នឹងកម្មវិធីនេះណាស់ ពីព្រោះវាជារបៀបរៀនថ្មីមួយ។ កាលពីមុន ប្រសិនបើពួកគេចង់ដឹងអំពីប្រវត្តិខ្មែរក្រហម ពួកគេត្រូវអានសៀវភៅ ឬក៏ស្ដាប់មនុស្សចាស់និយាយប្រាប់។
ប្អូនស្រី សៀក ទាមុយហ៊ាង ជាសិស្សថ្នាក់ទី១១ បាននិយាយថា៖ "ខ្ញុំរៀនអំពីប្រវត្តិខ្មែរក្រហមពីលោកគ្រូ អ្នកគ្រូរបស់ខ្ញុំ និងអានសៀវភៅ ប៉ុន្តែមានកម្មវិធីនេះ ខ្ញុំកាន់តែមានអារម្មណ៍ចង់រៀនថែមទៀត ដើម្បីទទួលព័ត៌មានឲ្យបានកាន់តែច្រើន អំពីប្រវត្តិខ្មែរក្រហម។
កម្មវិធីនេះ ត្រូវបានរចនាឡើងដើម្បីទាក់ទាញចំណាប់អារម្មណ៍យុវជនជំនាន់ថ្មី និងរបៀបថ្មីដែលពួកគេប្រើប្រាស់សារព័ត៌មាន។ នៅក្នុងប្រទេសកម្ពុជា ប្រជាពលរដ្ឋ១នាក់ មានស៊ីមកាតចំនួនពីររួចទៅហើយ ម្យ៉ាងវិញទៀត គេបានប៉ាន់ប្រមាណឃើញថា មានប្រជាជន៧លាននាក់ភ្ជាប់អ៊ីនធឺណែតនៅក្នុងប្រទេសកម្ពុជា។ ខណៈដែលការប្រើប្រាស់ទូរស័ព្ទដៃមានការកើនឡើងយ៉ាងលឿននៅតាមតំបន់ជនបទ ប៉ុន្តែការប្រើប្រាស់នោះនៅតែមានកម្រិត ដោយសារតែនៅតាមតំបន់ខ្លះ គ្មានភ្លើងអគ្គិសនីនោះទេ។ យុវជនក៏ប្រឈមមុខនឹងឧបសគ្គមួយបន្ថែមទៀតដែរ នោះគឺពួកគេនៅតែពឹងពាក់លើថវិការបស់ឪពុកម្ដាយ ដែលមិនតែងតែអាចផ្គត់ផ្គង់បច្ចេកវិជ្ជានេះបាននោះទេ។
ដើម្បីឆ្លើយតបទៅនឹងកង្វះខាតនេះ គម្រោងក៏រៀបចំផងដែរ នូវវគ្គអប់រំចល័ត ដើម្បីបង្ហាញដោយផ្ទាល់ជូនសិស្ស និស្សិត នៅតាមសាលា និងសាកលវិទ្យាល័យផ្សេងៗ ដោយសហប្រតិបត្តិការជាមួយក្រសួងអប់រំ។ វគ្គអប់រំចល័តពេលនេះស្ថិតនៅក្នុងដំណាក់កាលទី២ សំដៅទៅធ្វើការបង្ហាញអំពីកម្មវិធីនេះឲ្យបានគ្រប់ទិសទីនៅក្នុងប្រទេសទាំងមូល។
គម្រោងបង្កើតកម្មវិធីទូរស័ព្ទនេះ ត្រូវបានអនុវត្តជាផ្នែកមួយនៃគម្រោងសំណងជនរងគ្រោះដោយសារខ្មែរក្រហម ផ្ដល់ជូនដោយអង្គជំនុំជម្រះវិសាមញ្ញក្នុងតុលាការកម្ពុជា ឬហៅកាត់ថា ECCC ព្រមទាំងមានគោលបំណងចលនាឲ្យយុវជនស្វែងយល់អំពីយុត្តិធម៌សិទ្ធិមនុស្ស និងសន្តិភាព។
ប្អូនប្រុសឈ្មោះ អេង ពុធ ជាសិស្សថ្នាក់ទី១២ រៀននៅសាលាមធ្យមសិក្សា ជា ស៊ីម កណ្ដុរជ្រុម ក្នុងខេត្តត្បូងឃ្មុំ បាននិយាយកាលពីខែកុម្ភៈ បន្ទាប់ពីបានចូលរួមមើលការបង្ហាញអំពីកម្មវិធីទូរស័ព្ទនេះថា៖ "ឪពុកម្ដាយខ្ញុំបានឆ្លងកាត់ការឈឺចាប់នៅក្នុងរបបខ្មែរក្រហម។ ខ្ញុំចាំបាច់ត្រូវរៀនឲ្យដឹងអំពីការឈឺចាប់ដែលមិនអាចបំភ្លេចបាននេះ។ ខ្ញុំក៏មានអារម្មណ៍ឈឺចាប់ដូចគ្នាដែរ។ យើងទាំងអស់គ្នាត្រូវតែរួមគ្នាការពារ កុំឲ្យរបបដ៏ព្រៃផ្សៃបែបនេះវិលត្រឡប់មកប្រទេសកម្ពុជាយើងវិញ"។
កម្មវិធីទូរស័ព្ទដៃនេះ ត្រូវបានគេទាញយកទៅប្រើប្រាស់ជាង១ម៉ឺនដងទៅហើយ រីឯគម្រោងអប់រំចល័តគ្រោងនឹងទៅបង្ហាញជូន សិស្ស និស្សិត នៅតាមសាលាមធ្យមសិក្សា និងសាកលវិទ្យាល័យផ្សេងទៀតនៅក្នុងប្រទេសកម្ពុជា។
គម្រោងនេះទទួលបានការឧបត្ថម្ភថវិកាពីសហភាពអឺរ៉ុបដែលជាផ្នែកមួយនៃយុទ្ធសាស្ត្ររួមរបស់ខ្លួនក្នុងការជួយជ្រោមជ្រែងអង្គជំនុំជម្រះវិសាមញ្ញក្នុងតុលាការកម្ពុជា ក្នុងការស្វែងរកយុត្តិធម៌ជូនជនរងគ្រោះក្នុងសម័យខ្មែរក្រហម ក៏ដូចជាកិច្ចខិតខំប្រឹងប្រែងផ្សះផ្សារ និងព្យាបាលរបួសឈឺចាប់របស់ប្រជាជនកម្ពុជាក្នុងរបបនេះ។
គម្រោងមួយនេះ គឺជាផ្នែកមួយនៃសំណងយុត្តិធម៌សម្រាប់ផ្នែករដ្ឋប្បវេណីក្នុងករណី០០២/០២ នៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា និងត្រូវបានអនុវត្តដោយមជ្ឈមណ្ឌលបុប្ផាណា ដោយសហការយ៉ាងជិតស្និទ្ធិជាមួយសហមេធាវីនាំមុខតំណាងដើមបណ្ដឹងរដ្ឋប្បវេណី និងផ្នែកគាំពារជនរងគ្រោះ របស់អង្គជំនុំជម្រះវិសាមញ្ញក្នុងតុលាកាកម្ពុជា ក្រោមជំនួយឧបត្ថម្ភថវិកាពីសហភាពអឺរ៉ុប និងមូលនិធិ Rei Foundation Limited។ គម្រោងនេះទទួលបានការគាំទ្រពីក្រសួងអប់រំ យុវជន និងកីឡា ក្នុងនាមជាដៃគូ។
ខាងក្រោមនេះគឺជាតំណភ្ជាប់ដើម្បីទាញយកកម្មវិធីទូរស័ព្ទរៀនអំពីប្រវត្តិសាស្ត្រខ្មែរក្រហម មាននៅក្នុង AppStore និង PlayStore៖
App Store: https://itunes.apple.com/kh/app/khmer-rouge-history/id1262423973?mt=8
Play Store: https://play.google.com/store/apps/details?id=org.bophana.krhistory&hl=en
អត្ថបទនេះនិងសារព័ត៌មានពាក់ព័ន្ធផ្សេងៗទៀត ត្រូវបានផលិតឡើងដោយទទួលបានជំនួយថវិកាពីសហភាពអឺរ៉ុប។ ខ្លឹមសារនៃអត្ថបទនិងឯកសារផ្សេងទៀតគឺជាទំនួលខុសត្រូវតែមួយគត់របស់ក្រុមហ៊ុន Particip GmbH ហើយមិនប្រាកដថាឆ្លុះបញ្ចាំងពីទស្សនៈរបស់សហភាពអឺរ៉ុបនោះឡើយ។
កម្មសិទ្ធិរូបថតទាំងអស់៖ 2019 Particip GmbH, C.Jancloes. All rights reserved. Licensed to the European Union under conditions