កសិករដាំប៉ិកួៈ ពិបាកចិត្តយ៉ាងខ្លាំងព្រោះដល់ពេលប្រមូលផលតម្លៃធ្លាក់ចុះ

2017-03-11 08:56:50
សេដ្ឋកិច្ច

2017-03-11 08:56:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ិកួៈជាប្រភេទដំឡូងដែលប្រជាជនយើងយកមកធ្វើជាបង្អែមលាងមាត់ វាមានរស់ជាតិសាបលាយផ្អែមបន្តិច ហើយសំបូរជាតិទឹក ។ ដំណាំដំឡូងប្រភេទនេះត្រូវបានប្រជាកសិករយើងរស់នៅក្នុង ភូមិល្អាងក្រោម ឃុំល្អាង ស្រុកកំពង់សៀម ខេត្តកំពង់ចាម ដាំដុះរាប់សិបហិកតារនារដូវទឹកស្រក។

ស្ថិតក្នុងទឹកមុខមិនសូវសប្បាយចិត្ត កំពុងថ្លឹងប៉ិកួៈ ឱ្យភ្ញៀវដែលកុម្ម៉ង់យកទៅភ្នំពេញ លោក ញឹម វ៉ាន់ថេន បានប្រាប់ភ្នាក់ងារ Sabay ថា ខ្ញុំដាំដំណាំនេះតាំងពីខ្ញុំនៅតូចៗ ហើយដំណាំនេះឪពុកម្ដាយខ្ញុំដាំតពីដូនតាមកម៉្លេះ ។ ឆ្នាំនេះផលដំណាំ ប៉ិកួៈ បានល្អគ្រាន់បើជាងឆ្នាំទៅព្រោះទឹកឡើងលិច និងស្រោចទឹកបានល្អ តែទាស់ត្រង់តម្លៃចុះថោក។ កាលពីមុនប្រមូលផលតម្លៃបានជាង ៥០០៛ ក្នុង១គីឡូក្រាម តែដល់ពេលប្រមូលផលធ្លាក់ចុះ រហូតដល់ ៣០០ ៛ក្នុងមួយគីឡូក្រាម។

ចុះលោកដាំរយៈពេលប៉ុន្មានខែបានទទួលផល ហើយចំណាយថវិកាប៉ុន្មានដែរ?

ឆ្លើយតបជាមួយសំណួររបស់ Sabay បងប្រុសវ័យប្រហែលជា៤០ឆ្នាំ មានបុត្រតូចៗ ២នាក់ថា ដាំបើគិតទៅ៣ខែ ហើយត្រូវស្រោចទឹកទៀតដើម្បីឱ្យវាស្ទុះលឿន និងមើមបានធំៗល្អ ហើយបើគិតចំណាយសរុបប្រហែលជាង១០លានរៀល ដោយខ្ចីគេ ៨លានរៀល។ ដោយការខ្ចីលុយគេនេះហើយដែលឆ្នាំខ្លះខ្ញុំត្រូវលក់គោ និងរបស់ផ្សេងៗទៀតដើម្បីបង្គ្រប់សងគេវិញ ពេលដំណាំផ្ដល់ផលមិនល្អ ហើយតម្លៃថោកទៀតនោះ ។

បើនិយាយពីទីផ្សារវិញមិនសូវសំបូរទេ ពីមុនៗមកដំណាំប្រភេទនេះអាចនាំយកទៅលក់ដល់ខេត្តសៀមរាប ព្រះវិហារ ព្រៃវែង កំពង់ធំ និងខេត្តមួយចំនួនទៀត តែបច្ចុប្បន្នលក់បានតែក្នុងខេត្តកំពង់ចាម និងភ្នំពេញទេព្រោះខេត្តទាំងនោះគេចេះដាំដែរ និងជាពិសេសមានការនាំចូលពី ប្រទេសថៃសម្រាប់ខេត្តសៀមរាបព្រោះតម្លៃថោកជាង និងនាំចូលពីវៀតណាម ។ ប៉ិកួៈលក់ដុំតម្លៃ ៤៥០៛ក្នុងមួយគីឡូក្រាម និង លក់រាយ ៨០០៛ក្នុងមួយគីឡូក្រាម ។ ផលលំបាកធំបំផុតសម្រាប់កសិករនោះគឺ ពេលដំណាំចាប់ផ្ដើមប្រមូលផល ដោយតម្លៃចាប់ផ្តើមធ្លាក់ចុះ ឬត្រូវឈ្មួញទម្លាក់តម្លៃតែម្ដង ព្រោះអាងដំណាំនាំចូល។ វ៉ាន់ថេន ប្រាប់៕