- 2017-08-17 10:13:36
- សេដ្ឋកិច្ច
ការនាំផ្លែស្វាយកែវរមៀតកម្ពុជាចេញទៅក្រៅប្រទេស កំពុងជួបរបាំងពីរ
- 2017-08-17 10:13:36
- ចំនួនមតិ 0 | ចំនួនចែករំលែក 0
ការនាំផ្លែស្វាយកែវរមៀតកម្ពុជាចេញទៅក្រៅប្រទេស កំពុងជួបរបាំងពីរ
ចន្លោះមិនឃើញ
អ្នកធ្វើការលើការនាំចេញផលិតផលផ្លែឈើខ្មែរអះអាងថាការនាំស្វាយកែវរមៀតចេញទៅទីផ្សារក្រៅប្រទេសនៅមានកម្រិត ដោយថាអ្នកនាំចេញកំពុងជួបបញ្ហាទាក់ទងនឹងតម្លៃចេញលិខិតបញ្ជាក់ប្រភពដើម និងការធ្វើភូគាមអនាម័យលើផលិតផលទាំងនោះ។
ក្នុងសិក្ខាសាលាពិគ្រោះយោបល់រវាងអ្នកផលិត និងអ្នកផ្គតផ្គង់ផលិតផលខ្មែរកាលពីព្រឹកមិញ ប្រធានក្រុមប្រឹក្សាភិបាលនៃសម្ព័ន្ធអ្នកនាំចេញផលិតផលផ្លែឈើខ្មែរ លោក ហាក់ សុវណ្ណា ថ្លែងថាកម្ពុជានៅមិនទាន់មានស្តង់ដាររួម និងនិម្មិតសញ្ញាផលិតផលរបស់ខ្លួននៅឡើយ។ លោកបន្តថាបញ្ហាភូគាមអនាម័យក៏នៅចោទជាបញ្ហាដោយមិនទាន់មានភាពច្បាស់លាស់នៅឡើយ។ ដោយឡែកលោកថាតម្លៃលិខិតបញ្ជាក់ប្រភពដើម(CO)ក៏ហាក់ខ្ពស់ផងដែរ។
លោកថ្លែងថាៈ «ផ្លែស្វាយរបស់យើងនេះ ភាគច្រើនគឺនាំទៅប្រទេសវៀតណាម ហើយពេលរដូវចុងក្រោយនេះ វៀតណាមបិទមិនឲ្យស្វាយយើងនាំចេញ.. .ហើយខ្ញុំក៏បានចុះទៅសិក្សាផ្ទាល់ ដោយខាងវៀតណាមថា ឥឡូវយើងចូលអាស៊ាន គេតម្រូវឲ្យយើងធ្វើភូគាមអនាម័យ ទើបគាត់អនុញ្ញាតឲ្យចូល»។
ជាការឆ្លើយតបរដ្ឋមន្ត្រីក្រសួងកសិកម្ម ឯកឧត្តម វ៉េង សាខុន ទទួលស្គាល់បញ្ហាប្រឈមពាក់ព័ន្ធ ភូគាមអនាម័យ ផលិតផលកម្ពុជាមិនទាន់ត្រឹមត្រូវ។ ឯកឧត្តមមានប្រសាសន៍ថាៈ «ក្រសួងកសិកម្មនឹងរៀបចំសិក្ខាសាលាមួយដាច់ដោយឡែក នឹងអញ្ចើញវិស័យឯកជនដែលមានចំណាប់អារម្មណ៍ ទៅលើការរៀបចំយន្តការនានាដើម្បីឆ្លើយតបការដោះរបាំង ភូគាមអនាម័យនេះ»។ ឯកឧត្តមថា ប្រទេសចិនបានអនុញ្ញាតឲ្យនាំចូលផលិតផលខ្មែរជាង២០០មុខ តែបច្ចុប្បន្ននេះ ចិនទើបតែអនុញ្ញាតឲ្យកម្ពុជានាំចូលផលិតផលកសិកម្មតែ៣មុខប៉ុណ្ណោះ គឺ អង្ករ ដំឡូង និង គឺពោត។
រដ្ឋមន្ត្រីក្រសួង ពាណិជ្ជកម្មឯកឧត្តម ប៉ាន សូរស័ក្កិ ឆ្លើយតបចំពោះសំណើបញ្ជុះតម្លៃលិខិតបញ្ជាក់ប្រភពដើមថាក្រសួងមិនទាន់អាចធ្វើបាននោះទេ។ «ដោយឡែកពាក់ព័ន្ធការបញ្ចុះតម្លៃ CO ក្រសួងមិនទាន់អាចធ្វើបាននៅឡើយ»។ ឯឧត្តមបន្ថែម៕
ចុចអានបន្ទាប់
