- 2018-05-21 02:38:53
- ព័ត៌មាន
ទារកម្តាយទុកចោលក្នុងបន្ទប់ទឹក ត្រូវកម្មការិនីម្នាក់ទទួលចិញ្ចឹម និងព្យាបាល ទោះបីប្រឈមបញ្ហាថវិកា
- 2018-05-21 02:38:53
- ចំនួនមតិ 0 | ចំនួនចែករំលែក 0
ទារកម្តាយទុកចោលក្នុងបន្ទប់ទឹក ត្រូវកម្មការិនីម្នាក់ទទួលចិញ្ចឹម និងព្យាបាល ទោះបីប្រឈមបញ្ហាថវិកា
ចន្លោះមិនឃើញ
ទារកដែលត្រូវម្តាយបង្កើតហើយទុកចោលក្នុងបន្ទប់ទឹករោងចក្រផលិតស្បែកជើងមួយកន្លែងក្នុងខេត្តកំពង់ស្ពឺកំពុងទទួលការព្យាបាលពីក្រុមគ្រូនៅមន្ទីរពេទ្យកុមារជាតិ ក្រោមការមើលថែពីកម្មការិនីម្នាក់។
កាលពីថ្ងៃទី១៩ ខែឧសភា ឆ្នាំ២០១៨ ក្នុងរោងចក្រផលិតស្បែកជើងមួយកន្លែងក្នុងខេត្តកំពង់ស្ពឺ នៅម៉ោងប្រហែលជា១២ថ្ងៃត្រង់ មានទារកម្នាក់ត្រូវគេប្រទះឃើញក្នុងបន្ទប់ទឹក។ ទារកនោះត្រូវគេសង្ស័យថាជាកូនរបស់កម្មការិនីម្នាក់ តែបានគេចខ្លួនក្រោយពេលសម្រាលរួច។ ករណីនេះបាធ្វើឲ្យអ្នកប្រើប្រាស់បណ្តាញសង្គមហ្វេសប៊ុកចែកចាយបន្តគ្នាជាច្រើន។
អ្នកស្រី ឃន សុគា កម្មការិនី នៅរោងចក្រខាងលើបានទទួលយកទារករូបនេះមកទទួលការព្យាបាលនៅមន្ទីរពេទ្យកុមារជាតិក្នុងរាជធានីភ្នំពេញ។ អ្នកស្រីឲ្យដឹងថាទារករូបនេះដំបូងឡើយត្រូវបានកម្មករក្នុងរោងចក្រនាំយកមកព្យាបាលនៅមណ្ឌលសុខភាពក្បែរនោះ តែដោយថាស្ថានភាពទារកមិនប្រក្រតី និងគ្មានអាណព្យាបាលមកថែទាំផង អ្នកស្រី ក៏បានស្នើសុំគ្រូពេទ្យ ដោយធ្វើកិច្ចសន្យាផង សុំយកទារកនោះមកព្យាបាលបន្ត។
បើតាមអ្នកស្រី ឃន សុគា ទារកនោះកើតមិនគ្រប់ខែ និងមានទម្ងន់ត្រឹម១,៦គីឡូក្រាម ដែលអ្នកស្រីថាគ្រូពេទ្យតម្រូវឲ្យស្នាក់នៅ ព្យាបាលនៅមន្ទីរពេទ្យរហូតមានសុខភាពល្អគ្រប់គ្រាន់ទើបអនុញ្ញាតឲ្យចេញពីមន្ទីរពេទ្យបាន។ អ្នកស្រីបន្តថា ក្រុមគ្រូពេទ្យមិនទាន់បញ្ជាក់បានទេថាទារកនេះអាចចេញពីមន្ទីរពេទ្របាននៅពេលណានោះ ដោយថាក្រុមគ្រូពេទ្យកំពុងបន្តតាមដានសុខភាពនៅឡើយ។
អ្នកស្រីបន្តថាដោយទារកនេះមានសំណាងបានរួចផុតពីគ្រោះថ្នាក់ដល់ជីវិត អ្នកស្រី និងស្វាមីបានដាក់ឈ្មោះទារកនេះថា សុគន់ សំណាង។ អ្នកស្រីឲ្យដឹងដែរថាមានអ្នកស្នើសុំយកទារកនេះទៅចិញ្ចឹមផងដែរ ដោយមានទាំងអ្នកនៅក្រៅប្រទេសផង តែថាអ្នកស្រីបានបដិសេធ។
អ្នកស្រីបញ្ជាក់ថា៖ «មានគេតេមកសុំច្រើនដែរបង មានអ្នកនៅអូស្រ្តាលី គេសុំដែរ គេថាឲ្យលុយខ្ញុំ តែខ្ញុំបដិសេធ ខ្ញុំទុកចិញ្ចឹមខ្លួនឯង មាននិស្ស័យនឹងក្មេងនេះបង ខ្ញុំសបប្បាយចិត្តផង ភ័យផង...ខ្ញុំអត់មានកូនទេ...ឥឡូវស្ថានភាពទារកបានគ្រាន់ហើយ បានឡើងគីឡូបន្តិចហើយ...គ្រូពេទ្យបានជួយមើលដិតដល់»។
ទោះយ៉ាងណាអ្វីដែលអ្នកស្រីកំពុងប្រឈមគឺបញ្ហាថវិកា ត្រូវចំណាយប្រចាំថ្ងៃក្នុងការព្យាបាលទាំងលើថ្លៃបន្ទប់ និងថ្លៃថ្នាំពេទ្យ។
ប្រធានសហភាពចលនាកម្មករកម្ពុជា លោក ប៉ាវ ស៊ីណា កាលពីម្សិលមិញបានចេញមុខអំពាវរកជំនួយសប្បុរសធម៌ជួយដល់អ្នកស្រី ឃន សុគា ដើម្បីបានថវិកាជួយផ្គត់ផ្គង់ការចំណាយចាំបាច់ទៅលើទារកនេះ។
ក្រោយពីមានការអំពាវនាវនេះ លោកស្រី ឃន សុគា ឲ្យដឹងថាមានអ្នកទូរស័ព្ទមកអ្នកស្រីដែរដោយសន្យាថានឹងជួយផ្តល់ប្រាក់ឧបត្ថម្ភខ្លះៗដល់អ្នកស្រីសម្រាប់ចំណាយផ្សេងៗក្នុងរយៈពេលព្យាបាលនេះ៕
