- 2018-08-24 02:37:12
- ការអប់រំ
និស្សិតគួរមានបីចំណុចនេះជាមូលដ្ឋាន បើចង់ជាប់កម្មវិធីផ្លាស់ប្តូរនិស្សិតទៅសិក្សានៅអឺរ៉ុប
- 2018-08-24 02:37:12
- ចំនួនមតិ 0 | ចំនួនចែករំលែក 0
និស្សិតគួរមានបីចំណុចនេះជាមូលដ្ឋាន បើចង់ជាប់កម្មវិធីផ្លាស់ប្តូរនិស្សិតទៅសិក្សានៅអឺរ៉ុប
ចន្លោះមិនឃើញ
និស្សិតកំពុងបន្តការសិក្សានៅសាកលវិទ្យាល័យមួយចំនួនដែលជាដៃគូរបស់កម្មវិធីផ្ទេរក្រេឌីតអន្តរជាតិ របស់សហភាពអឺរ៉ុបបើចង់បានឱកាសចូលរួមក្នុងកម្មវិធីនេះយ៉ាងហោចណាស់ត្រូវមានមូលដ្ឋានគ្រឹះចំនួនបីសំខាន់។
កម្មវិធីផ្ទេរក្រេឌីតអន្តរជាតិ ជាកម្មវិធីផ្លាស់ប្តូរនិស្សិតពីសាកលវិទ្យាល័យមួយទៅសាលកវិទ្យាល័យមួយទៀតនៅអឺរ៉ុបក្នុងកម្មវិធី Erasmus។
ចាប់តាំងពីឆ្នាំ ២០១៥មកកម្មវីធី Erasmus+ ក៏បានផ្តល់លទ្ធភាពឲ្យនិស្សិត បុគ្គលិកសិក្សា អ្នកសិក្សាស្រាវជ្រាវទាំងនៅកម្ពុជា និងបណ្តាប្រទេសលើពិភពលោកផ្សេងទៀតបានទៅសិក្សា ស្រាវជ្រាវ ដកបទពិសោធន៍ការងាររយៈពេលខ្លីនៅអឺរ៉ុប។
ការផ្ទរក្រេឌីតជាលក្ខណៈទ្វេទិសបែបនេះ ផ្តល់លទ្ធភាពឲ្យនិស្សិតបានសិក្សានៅសាលកវិទ្យាល័យនៅ អឺរ៉ុបក្នុងរយៈពេលពី៣ទៅ១២ខែ និងទទួលបានក្រេឌីតដែលមានការទទួលស្គាល់ពីគ្រឹះស្ថានដែលបញ្ជូនអ្នកទាំងនោះទៅ។
ក្នុងកម្មវិធីជួបជុំជាមួយអតីតនិស្សិត និងបុគ្គលិកសិក្សារបស់កម្មវិធីErasmus កាលពីល្ងាចម្សិលមិញ កញ្ញា ហ្វាន លីម៉ី និស្សិតសាលវិទ្យាល័យបញ្ញាសាស្រ្តកម្ពុជា ដែលទើបត្រឡប់មកពីប្រទេសប៉ូឡូញ បានប្រាប់ Sabay ថាកញ្ញាបានទៅរៀននៅសាកលវិទ្យាល័យមួយនៅប្រទេសនេះរយៈពេល៤ខែ។
ការទៅសិក្សានេះគឺ ស្ថិតក្នុងកម្មវីធីផ្ទេរក្រេឌីតអន្តរជាតិ។ កញ្ញាបន្ថែម។ នៅពេលសួរថាតើកញ្ញាបានទទួលព័ត៌មានពីកម្មវិធីនេះតាមរយៈអ្វី? កញ្ញាថាបានទទួលដំណឹងតាមរយៈការបិទផ្សាយព័ត៌មាននៅសាកលវិទ្យាល័យ និងបានស្វែងរកព័ត៌មានបន្ថែមដើម្បីដាក់ពាក្យចូលរួមកម្មធីនេះ។
កញ្ញា និងនិស្សិតបួននាក់ផ្សេងទៀតត្រូវបានជ្រើសរើសឲ្យទៅរៀននៅសាកលវិទ្យាល័យមួយនៅប្រទេសប៉ូឡូញ។ កញ្ញា ហ្វាន លីម៉ី ឲ្យដឹងថាដើម្បីបានជាប់ក្នុងកម្មវិធីនេះ មានចំណុចបីសំខាន់ដែលនិស្សិតគ្រប់រូបគួរមាន។
ទីមួយកញ្ញាថាចំណេះដឹងភាសាអង់គ្លេស។ កញ្ញាបន្តថានិស្សិតដែលមានចំណេះដឹងភាសាអង់គ្លេសអាចប្រើសម្រាប់ការសិក្សា ស្រាវជ្រាវបាននឹងជាចំណុចមួយក្នុងការជ្រើសរើស បើទោះជាគ្មានពិន្ទុIELTS ក៏ដោយ។ សម្រាប់កញ្ញា វិញកញ្ញាមានពិន្ទុនេះនៅក្នុងដៃស្រាប់ តែថាក៏មានអ្នកដែលមិនមានពិន្ទុនេះហើយទទួលបានការជ្រើសរើសដែរ។
ចំណុចមួយទៀតគឺ ពិន្ទុGPAរបស់និស្សិតផ្ទាល់តែម្តង ដោយថាពិន្ទុGPA គួរតែមានលើពី៣.០ឡើងទៅ ខណៈដែលកញ្ញាថាកញ្ញាមានពិន្ទុនេះ៣.៨៣នៅក្នុងដៃពេលដាក់ពាក្យចូលកម្មវិធីនេះ។
ចំណុចពិសេសចុងក្រោយមួយទៀត គឺការចូលរួមស្ម័គ្រចិត្តក្នុងការងារសង្គមណាមួយ ក៏ជាផ្នែកមួយសំខាន់ក្នុងការពិចារណាសម្រាប់កម្មវិធីនេះផងដែរ។ ទោះជាបីចំណុចនេះសំខាន់ តែកញ្ញាថានៅមានចំណុចផ្សេងៗមួយចំនួនទៀតផងដែរ គ្រាន់តែថាចំណុចទាំងបីនេះជាអ្វីដែលកញ្ញាបានដឹង តាមរយៈបទពិសោធន៍របស់កញ្ញាផ្ទាល់។
សម្រាប់លោក ចច អេដហ្គា ឯកអគ្គរដ្ឋទូតសហភាពអឺរ៉ុបប្រចាំកម្ពុជា ថ្លែងក្នុងកម្មវិធីតាមរយៈអ្នកបកប្រែថាកម្មវិធី Erasmusនេះពិតជាមានសារៈសំខាន់ មិនត្រឹមតែជាការផ្តល់ចំណេះដឹងដល់ប្រជាពលរដ្ឋកម្ពុជាបានទៅសិក្សា ស្រាវជ្រាវនៅសហភាពអឺរ៉ុបប៉ុណ្ណោះទេ តែថែមទាំងធ្វើឲ្យប្រជាពលរដ្ឋកម្ពុជាមានទំនាក់ទំនងដោយផ្ទាល់ជាមួយប្រជាពលរដ្ឋសភាពអឺរ៉ុបផងដែរ។
លោកបន្តថា នៅពេលប្រទេសមួយនិងប្រទេសមួយមានទំនាក់ទំនងច្រើនប្រភេទជាមួយគ្នានឹងធ្វើឲ្យប្រទេសទាំងនោះមានទំនាក់ទំនងនឹងគ្នាកាន់តែប្រសើរ។
គួរបញ្ជាក់ថាកម្មវិធីErasmus នេះចាប់ផ្តើមនៅកម្ពុជាកាលពីឆ្នាំ២០០៥ និងរហូតមកដល់ឆ្នាំ២០១៨នេះ និស្សិត បុគ្គលិកសិក្សាបានទទួលអាហារូបករណ៍ក្នុងក្នុងកម្មវិធីនេះទាំងរយៈពេលវែង និងខ្លីមិនតិចជាង៧៨០នាក់នោះទេ៕
