- 2018-09-14 08:56:59
- ព័ត៌មាន
តិចនិកទាមទារប្រាក់ខែឲ្យបានខ្ពស់ ពេលសម្ភាសការងារ
- 2018-09-14 08:56:59
- ចំនួនមតិ 0 | ចំនួនចែករំលែក 0
តិចនិកទាមទារប្រាក់ខែឲ្យបានខ្ពស់ ពេលសម្ភាសការងារ
ចន្លោះមិនឃើញ
ចំណុចមួយដែលអាចចាត់ទុកថាពិបាក និងសំខាន់បំផុតនៅពេលសម្ភាសការងារគឺការចរចាប្រាក់ខែនេះឯង ដោយចំណុចនេះហើយដែលអាចកំណត់ថាយើងអាចនឹងទទួលបានអ្វីដែលយើងរំពឹងទុកកម្រិតណាជាមួយការងារនេះបើសិនជាយើងជាប់។ ប្រសិនបើចង់បានប្រាក់ខែតាមការរំពឹងទុក ឬលើសពីការរំពឹងទុក អាចសាកល្បងវិធីសាស្ត្រខាងក្រោមនេះ៖
១. ឆែកមើលទីផ្សារជាមុនថាតំណែងរបស់យើងគួរបានប្រាក់ខែប៉ុន្មាន
មុននឹងទៅចរចាប្រាក់ខែជាមួយគេបាន យើងត្រូវដឹងថាតំណែងនេះមានស្តង់ដារប្រាក់ខែខ្ទង់កម្រិតណា ហើយក្រុមហ៊ុនទូទៅអាចឲ្យកម្រិតណាដែរ ដូច្នេះយើងនឹងបានដឹងពីចំនួនសមរម្យដែលគួរទារពីគេ។ អាចសាកសួរពីមិត្តភ័ក្ដិ ឬសិស្សច្បងដែលជិតស្និទ្ធសាកមើល។
២. ទារប្រាក់ខែគេឲ្យខ្ពស់ជាងអ្វីដែលអ្នករំពឹង
រឿងប្រាក់ខែនេះមួយមិនចាំបាច់ដាក់ខ្លួនក៏បាន បើយើងពូកែ យើងមានសមត្ថភាព ដូច្នេះច្បាស់ណាស់ថាក្រុមហ៊ុននឹងត្រូវការយើង។ ទារគេឲ្យខ្ពស់ៗនោះអ្នកនឹងមានភាពងាយស្រួលពេលចរចា ហោចណាស់ពេលចរចារួចយើងក៏ទទួលបានតួលេខដែលខ្ពស់គួរសមដែរ។
៣. មើលថានិយោជកកំពុងត្រូវការអ្វី
មើលតាម Job description បានសម្រាប់ចំណុចនេះ ប៉ុន្តែត្រូវមើលឲ្យស៊ីជម្រៅជាងនេះផង ដូចជា កំឡុងពេលសម្ភាសន៍ក៏គួរសួរគេថា “ពេលនេះក្រុមហ៊ុនអ្នកចង់ធ្វើអ្វីឲ្យជោគជ័យជាអាទិភាព?" ឬ “តើចង់ឲ្យខ្ញុំធ្វើអ្វីខ្លះក្នុងការងារនេះ?” នោះអ្នកនឹងបានដឹងថាក្រុមហ៊ុនត្រូវការអ្វី ហើយមានអ្វីខ្លះដែលយើងអាចនឹងស្នើសុំទៅគេបាន។
៤. លើកចំណុចល្អរបស់ខ្លួនមកឲ្យអស់
ធ្វើបញ្ជីមួយមកថាយើងមានចំណុចលេចធ្លោអ្វីខ្លះ ធ្លាប់ទទួលជោគជ័យអ្វីខ្លះពីមុន ហើយបើមានភស្តុតាងយកទៅបង្ហាញគេ នឹងកាន់តែល្អ ព្រោះវានឹងជាគ្រឿងជំនួយក្នុងការចរចាប្រាក់ខែរបស់អ្នកឲ្យកាន់តែងាយស្រួល។
៥. កុំគិតតែរឿងប្រាក់ខែតែមួយមុខ
បើទោះបីប្រាក់ខែអាចតិចជាងការងារចាស់ ឬការរំពឹងទុក ប៉ុន្តែបើបើយើងអាចបានអត្ថប្រយោជន៍ល្អជាង ឬបរិយាកាសការងារដែលល្អជាង វាក៏មិនគួរជាបញ្ហា ដូចជាម៉ោងធ្វើការតិចជាង ជិតផ្ទះ ការងារស្រាលជាង ឱកាសរីកចម្រើនខ្ពស់ និងបានរៀន Free ជាដើម។
៦. មិនបាច់ប្រាប់គេពីការពិតគ្រប់យ៉ាងក៏បាន
នៅពេលសម្ភាសន៍ គេតែងសួរពីប្រាក់ខែដែលយើងធ្លាប់ទទួលបានពីមុន ប៉ុន្តែយើងក៏មិនចាំបាច់ទៅប្រាប់គេតាមត្រង់គ្រប់យ៉ាងនោះដេរ។ រឿងបែបនេះបើយើងនិយាយឲ្យលើសជាងការពិតតិចតួចក៏គ្មាននរណាថាអីដែរ ដើម្បីឲ្យបានប្រាក់ខែច្រើនៗ ទៅតាមអ្វីដែលយើងរំពឹងទុក។
៧. ប្រើវិធីស្ងៀមស្ងាត់
ការចរចាដោយល្អ មិនចាំបាច់ត្រូវនិយាយអ្វីច្រើននោះទេ ពេលខ្លះគេអាចនឹងសុំឲ្យយើងប្រាប់ពីតួលេខដែលយើងចង់បាន ប៉ុន្តែយើងក៏អាចនិយាយសុំឲ្យខាងគេជាអ្នកស្នើវិញ។ បើចៃដន្យគេស្នើប្រាក់ខែដែលខ្ពស់ជាងចំនួនដែលយើងរំពឹងទុក ក៏កុំប្រញាប់យល់ព្រម គួរធ្វើជាគិតបន្តិចសិន ហើយនិយាយថា អឺ... ប៉ុណ្ណឹងក៏បានដែរ។
៨. ហ្វឹកហាត់ត្រៀមឲ្យបានច្រើន
គ្មាននរណាពូកែខាងចរចាតាំងពីកំណើតនោះទេ គ្រប់យ៉ាងគឺអាចហាត់បាន។ សាកល្បងសុំឲ្យមិត្តភ័ក្ដិមកហ្វឹកហាត់ជាមួយអ្នក និងដាក់ពាក្យសុំធ្វើការឲ្យបានច្រើនកន្លែង ដើម្បីឲ្យជំនាញសម្ភាសការងាររបស់អ្នករីកចម្រើនបានលឿន។ ពេលជឿជាក់ខ្លួនឯងហើយ សឹមដាក់ទៅក្រុមហ៊ុនដែលអ្នកចង់ទៅធ្វើ ៕
ចុចអាន៖