- 2018-10-26 03:01:00
- ព័ត៌មាន
លំបាកតិចតួច កុំទាន់រអ៊ូ! មកស្តាប់រឿងរ៉ាវ ស្រ្តីម្នាក់បង្កើតកូន ៤៤នាក់ ទើបដឹងថាយ៉ាងណា
- 2018-10-26 03:01:00
- ចំនួនមតិ 0 | ចំនួនចែករំលែក 0
លំបាកតិចតួច កុំទាន់រអ៊ូ! មកស្តាប់រឿងរ៉ាវ ស្រ្តីម្នាក់បង្កើតកូន ៤៤នាក់ ទើបដឹងថាយ៉ាងណា
ចន្លោះមិនឃើញ
ជួនកាល ឪពុកម្ដាយវ័យក្មេងបច្ចុប្បន្នពិបាកនឹងមើលថែរក្សាកូនរបស់ខ្លួន ត្រឹមម្នាក់ ឬ២នាក់ណាស់។ ប៉ុន្តែស្ត្រីវ័យ៣៩ឆ្នាំ មកពីប្រទេសអ៊ូហ្គាន់ដា (Uganda) បានបង្កើតកូនរហូតដល់ទៅ ៤៤នាក់ ប៉ុន្តែបានស្លាប់អស់ ៦នាក់ នៅសល់សរុប ៣៨នាក់ កំពុងរស់នៅក្រោមដំបូលតែមួយ។
ស្ត្រីខាងលើនេះមានឈ្មោះថា Mariam Nabatanzi។ នៅអាយុ១៣ឆ្នាំ គ្រួសាររបស់អ្នកស្រី បានលក់អ្នកស្រីឲ្យទៅបុរសមានអាយុចាស់ជាង ២៧ឆ្នាំ។ ពួកគេហៅវាថាជា «មង្គលការ» ប៉ុន្តែអ្នកស្រី Mariam នៅពេលនោះ មិនបានដឹងថាជាអ្វីឲ្យប្រាកដនោះទេ។ មួយឆ្នាំក្រោយមក អ្នកស្រីក៏បង្កើតបានកូនភ្លោះ ២នាក់ដំបូង , មួយឆ្នាំក្រោយមកទៀតក៏បង្កើតបានកូនភ្លោះ ៣នាក់ ហើយមួយឆ្នាំក្រោយមកទៀតក៏បង្កើតបានកូនភ្លោះ ៤នាក់។
រហូតដល់មានកូន ២៣នាក់ ទើបអ្នកស្រីសម្រេចចិត្តទៅជួបគ្រូពេទ្យ ដើម្បីរកវិធីការពារណាមួយ មិនឲ្យមានកូនបន្តទៀត។ ផ្ទុយទៅវិញ ក្រោយធ្វើការវិនិច្ឆ័យរួច គ្រូពេទ្យបានឆ្លើយតបវិញថា អ្នកស្រីមានចំនួនអូវុលខ្ពស់ ហើយការការពារនឹងធ្វើឲ្យសុខភាព ក៏ដូចជាជីវិតអ្នកស្រីស្ថិតក្នុងគ្រោះថ្នាក់។
បច្ចុប្បន្នអ្នកស្រី Mariam បានបង្កើតកូនសរុបចំនួន ៤៤នាក់ ក្នុងនោះរួមមាន កូនភ្លោះ ២នាក់ ចំនួន៦ដង, កូនភ្លោះ ៣នាក់ ចំនួន៤ដង, កូនភ្លោះ ៤នាក់ ចំនួន៣ដង និង កូនទោលចំនួន ២នាក់។ ចំណែកឯកូន ៦នាក់ទៀតបានស្លាប់។ អ្នកស្រីបានប្រាប់ឲ្យដឹងថា អ្នកស្រីគ្មានការសោកស្ដាយឡើយ ហើយការដែលមានកូនច្រើនបែបនេះ គឺជាពរជ័យពីព្រះ។
ទោះជាយ៉ាងណាក៏ដោយ អ្នកស្រីបានជួបនឹងបញ្ហាធំមួយ ដោយសារតែប្ដីអ្នកស្រីតែងតែគេចវេះ ជួនកាលច្រើនខែ និងជួនកាលច្រើនឆ្នាំទៀតផង។ បុរសជាប្ដីរូបនោះមិនដែលមកជួយចិញ្ចឹមកូនឡើយ ដោយគ្រាន់តែដាក់ឈ្មោះឲ្យពួកគេប៉ុណ្ណោះ ហើយមានពេលខ្លះ បានដាក់ឈ្មោះឲ្យកូនតាមទូរសព្ទទៀតផង។
កូនប្រុសច្បងរបស់អ្នកស្រី Mariam អាយុ២៣ឆ្នាំ បាននិយាយថា គេមិនបានឃើញមុខឪពុកតាំងពីអាយុ ១៣ឆ្នាំមកម្ល៉េះ។ ប៉ុន្តែអ្នកស្រីមិនត្អូញត្អែរអំពីរឿងនេះឡើយ ព្រោះអ្នកស្រីបានលះបង់អ្វីៗគ្រប់យ៉ាង ដើម្បីផ្ដល់សេចក្ដីស្រលាញ់ និងការថែទាំដល់កូនៗរបស់ខ្លួន។
អាហារ គឺជាការចំណាយធំបំផុតសម្រាប់គ្រួសារដ៏ធំមួយនេះ ដោយក្នុងមួយថ្ងៃ ពួកគេត្រូវការ ម្សៅពោត ១០គីឡូក្រាម, សណ្ដែក ៧គីឡូក្រាម និង ស្ករស ៤គីឡូក្រាម។ ដើម្បីទូទាត់ការចំណាយទាំងអស់នេះ អ្នកស្រី Mariam បានរៀនជំនាញជាច្រើន ដូចជា បេះផ្កាលក់, ធ្វើនំខេក, រៀបឥដ្ឋ, ក្រងសក់, រៀបចំ និងដេគ័រកម្មវិធី ព្រមទាំងធ្វើម៉ូដសក់សម្រាប់កូនក្រមុំទៀតផង។
យ៉ាងណាក៏ដោយ កូនៗរបស់អ្នកស្រីទាំងអស់ សុទ្ធតែទទួលបានការអប់រំរៀនសូត្រ។ កូនភ្លោះ ២នាក់ដំបូងរបស់អ្នកស្រី បានក្លាយជាគិលានុបដ្ឋាយិកា ហើយម្នាក់ទៀតក្លាយជាអ្នកសាងសង់៕
ចុចអាន៖