- 2019-03-27 04:36:48
- សេដ្ឋកិច្ច
ត្រឹមរយៈជិតបីខែសោះ កម្ពុជានាំចេញចេកអំបូងលឿង និងស្វាយរាប់តោន ទៅក្រៅប្រទេស
- 2019-03-27 04:36:48
- ចំនួនមតិ 0 | ចំនួនចែករំលែក 0
ត្រឹមរយៈជិតបីខែសោះ កម្ពុជានាំចេញចេកអំបូងលឿង និងស្វាយរាប់តោន ទៅក្រៅប្រទេស
ចន្លោះមិនឃើញ
ក្នុងរយៈពេលជិត ៣ខែក្នុងឆ្នាំ ២០១៩នេះ កម្ពុជាបាននាំចេញចេកអំបូងលឿងប្រមាណ ១ម៉ឺន៦ពាន់តោន និងផ្លែស្វាយបានជិត ១ម៉ឺន ៥ពាន់តោន ទៅកាន់ទីផ្សារបរទេស។ នេះបើតាមប្រសាសន៍ ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានថ្លែងអ្នកសារព័ត៌មានក្នុងសិក្ខាសាលាផ្សព្វផ្សាយ និងទប់ស្កាត់ជំងឺប៉េស្តជ្រូកអាហ្វ្រិកនៅកម្ពុជាកាលពីថ្ងៃទី ២៦ ខែមីនា ម្សិលមិញ។
ឯកឧត្ដមបន្ថែមថា បូករួមទាំងផលិតផលកសិកម្មដទៃទៀតមានអង្ករ និងដំឡូងមីជាដើម កម្ពុជាបាននាំចេញទៅកាន់ទីផ្សារបរទេសរហូតដល់ទៅប្រមាណ២ លានតោន ក្នុងពេលជិតបីខែ កន្លងមកនេះ។ តាមទិន្នន័យ ដែលគិតត្រឹមថ្ងៃទី ២៥ ខែមីនា ម្សិលមិញនេះ ក៏មានការបែងចែកជាពីរផងដែរពោល គឺការនាំចេញផលិតកសិកម្មតាមផ្លូវការ មានជាង ១លាន ៤សែនតោន និងការនាំចេញក្រៅផ្លូវការជាង ១លានតោនទៀត ខណៈការនាំទិន្នផលកសិកម្មទៅកាន់បរទេសដំណើរការល្អប្រសើរ។
ឯកឧត្ដមបន្តថា បច្ចុប្បន្នទីផ្សារ នាំចេញផលិតកសិកម្មសំខាន់ៗរបស់កម្ពុជា រួមមានប្រទេសបារាំង ប្រមាណ ៤០% ទីផ្សារប្រទេសចិនប្រមាណ ៤០% រួមទាំងទីផ្សារ អឺរ៉ុប និងទីផ្សារប្រទេសក្នុងតំបន់អាស៊ាន។ ការនាំចេញចេកអំបូងលឿងពីកម្ពុជា ដោយផ្ទាល់ទៅកាន់ទីផ្សារប្រទេសចិន បានចាប់ផ្ដើមជាផ្លូវការនៅខែមករាឆ្នាំ ២០១៩នេះ ក្រោយកម្ពុជា និងចិន បានចុះកិច្ចព្រមព្រៀងលើពិធីសារមួយ អាចនាំចេញទៅកាន់ប្រទេសចិនបាន។ ប្រទេសចិន បានអនុញ្ញាតឲ្យកម្ពុជា នាំចេញចេក៣០ម៉ឺនតោនក្នុងមួយឆ្នាំ។
ចេកអំបូងលឿងកម្ពុជាទទួលទិន្នផលល្អ និងការចាប់អារម្មណ៍ខ្លាំងនៅលើទីផ្សារអន្តរជាតិនាពេលនេះពិតជាបានឆ្លុះបញ្ចាំងពីការខិតខំរបស់ក្រុមហ៊ុនផង និងការចូលរួមពីមន្ត្រីជំនាញក្រសួងកសិកម្មរុក្ខាប្រមាញ់ និងនេសាទផង ក្នុងការគោរពទៅតាមលក្ខណៈបច្ចេកទេស នៃការដាំដុះ និងការវេចខ្ចប់តាមស្តង់ដារអនាម័យខ្ពស់។ លទ្ធផលនេះក៏បានឆ្លើយតបទៅនឹងគោលនយោបាយរបស់ក្រសួងស្ដីពីការជំរុញផលិតកម្ម ក្នុងស្រុកបង្កើនតម្លៃបន្ថែម បង្កើតការងារ បង្កើនប្រាក់ចំណូល កាត់បន្ថយភាពក្រីក្រ និងចំណាកស្រុកតាមរយៈការអភិវឌ្ឍខ្សែសង្វាក់ផលិតកម្មកសិកម្ម។
ឯកឧត្ដម រដ្ឋមន្ត្រីកាលពីពេលកន្លងមកធ្លាប់បានបញ្ជាក់ដែរថា នៅក្នុងឆ្នាំ ២០១៩នេះ កម្ពុជាអាចនាំចេញចេកអំបូងលឿង ទៅកាន់ទីផ្សារអន្តរជាតិប្រមាណជាង ១លានតោន ។ ការអះអាងរបស់ឯកឧត្ដមរដ្ឋមន្ត្រីដូចនេះ ធ្វើឡើងបន្ទាប់ពីឯកឧត្ដមបានសង្កេតឃើញថា ត្រឹមដើមឆ្នាំ២០១៩ តែប៉ុណ្ណោះ កម្ពុជាបាននាំចេញចេកអំបូងលឿងបានប្រមាណជាង ៦ ០០០តោនរួចទៅហើយ ទៅកាន់ទីផ្សារអន្តរជាតិ។
តាមការប៉ាន់ប្រមាណ កម្ពុជាអាចនាំផលិតទិន្នផលកសិកម្មឆ្នាំ ២០១៨ -២០១៩ បានប្រមាណ ២៧លានតោន ដែលចរាចរណ៍នាំចេញទៅក្រៅប្រទេសយ៉ាងប្រសើរ៕