- 2019-10-18 02:45:33
- ការអប់រំ
និស្សិតធ្វើបទបង្ហាញពីចំណុចពិសេសរបស់ខេត្ត៦ជាប់ទៅទស្សនកិច្ចនៅជប៉ុន
- 2019-10-18 02:45:33
- ចំនួនមតិ 0 | ចំនួនចែករំលែក 0
និស្សិតធ្វើបទបង្ហាញពីចំណុចពិសេសរបស់ខេត្ត៦ជាប់ទៅទស្សនកិច្ចនៅជប៉ុន
ចន្លោះមិនឃើញ
និស្សិតឆ្នាំទីបីមកពីសាកលវិទ្យាល័យនានាក្នុងប្រទេសកម្ពុជាចំនួន២៤រូបត្រូវបានជ្រើសរើសឲ្យទៅធ្វើទស្សនកិច្ចសិក្សារយៈពេលមួយសប្ដាហ៍នៅប្រទេសជប៉ុនបន្ទាប់ពីបានឆ្លងកាត់ការធ្វើបទបង្ហាញនិងយកឈ្នះលើក្រុមផ្សេងៗសរុប១២២ក្រុម។
កាលពីម្សិលមិញនៅCJCC ស្ថានទូតជប៉ុនប្រចាំកម្ពុជាបានរៀបចំការប្រកួតប្រជែងធ្វើបទបង្ហាញក្រោមប្រធានបទ «ស្រុកកំណើតខ្ញុំ» ដើម្បីជ្រើសយកក្រុមដែលឈ្នះចំនួនប្រាំមួយទៅទស្សនកិច្ចផ្លាស់ប្ដូរវប្បធម៌ជាមួយនិស្សិតជប៉ុននៅដើមឆ្នាំ២០២០។
កម្មវិធី JENESYS២០១៩ មាននិស្សិតចំនួន១២២ក្រុមឬស្មើនឹង៤៨៨នាក់បានដាក់ពាក្យចូលរួមប្រកួតធ្វើបទបង្ហាញ។ ក្រោយការជ្រើសរើស ក្រុមចំនួន១២ត្រូវបានជាប់និងអនុញ្ញាតឲ្យធ្វើបទបង្ហាញជាសាធារណៈនៅCJCC កាលពីម្សិលមិញ។
និស្សិតចូលរួមសរុប៤៤នាក់ មាន១២ក្រុម មកសាកលវិទ្យាល័យផ្សេងៗគ្នាក្នុងប្រទេសកម្ពុជា។ ក្រុមនីមួយៗមានរយៈពេល១០នាទីដើម្បីធ្វើបទបង្ហាញរបស់ខ្លួន ដោយអាចជាការសម្ដែង រាំរបាំ ឬការនិយាយណែនាំអមដោយវីដេអូខ្លីផង។
ក្រោយការធ្វើបទបង្ហាញគណៈកម្មការបានដាក់ពិន្ទុឲ្យក្រុមចំនួនប្រាំមួយឈ្នះការប្រកួតនេះ។ ក្រុមទាំងប្រាំមួយបានលើកប្រធានបទបង្ហាញតាមរយៈវីដេអូ រាំរបាំ និងសម្ដែងជារឿងខ្លី ក្រោមប្រធានបទ ផ្សេងគ្នា រួមមាន «ស្រុកខ្ញុំចម្លាក់ខ្ញុំខេត្តកណ្ដាល កេដំណែលវប្បធម៌នៃខេត្តពោធិ៍សាត់ អាពីងខេត្តកំពង់ចាម ព្រះវិហារស្រុកកំណើតខ្ញុំដែនដីនៃមាសបៃតង របាំបាត់ដំបង និងខេត្តរតនគិរីកន្លែងដែលយើងហៅថាផ្ទះ»។
កញ្ញា អ៊ូ វង្សវិទូ ជាសមាជិកក្រុមនិយាយពីអាពីង នៅខេត្តកំពង់ចាម បានប្រាប់Sabay ក្រោយប្រកាសលទ្ធផលថាមូលហេតុដែលក្រុមទាំងមូលសម្រេចជ្រើសរើសប្រធានបទ អាពីង យកមកធ្វើបទបង្ហាញ ព្រោះថាអាពីងមានការពេញនិយម ហើយមានអ្នកទទួលទានច្រើន ទាំងបរទេស និងខ្មែរ។
កញ្ញាបន្ថែមថា៖ «មានអារម្មណ៍ថាចង់ជាប់កម្មវិធីហ្នឹងយូរហើយ សប្បាយមែនទែនបង វាជាឱកាសល្អសម្រាប់ពួកយើងទៅជប៉ុន ពួកយើងខំប្រឹងមែនទែនបងដើម្បីកម្មវិធីមួយហ្នឹង...អាពីងជាសត្វល្អិតតែល្បីឈ្មោះអ្នកណាៗក៏ចាប់អារម្មណ៍ទាំងខ្មែរ និងបរទេស វាមានរស់ជាតិឆ្ងាញ់»។
អ្នកស្រី ខាអូរី តាណាបេ លេខាទី១នៃស្ថានទូតជាប៉ុនប្រចាំកម្ពុជា បានលើកឡើងក្រោយប្រកាសលទ្ធផលថានិស្សិតដែលត្រូវជ្រើសរើសនេះនឹងត្រូវទៅទស្សនកិច្ចនៅប្រទេសជប៉ុននៅចុងខែមករា ឆ្នាំ២០២០ រយៈពេលមួយសប្ដាហ៍។ អ្នកស្រីបន្តថាអ្នកទាំងនោះនឹងត្រូវទៅទីក្រុងតូក្យូ និងខេត្តតូកុស៊ីម៉ា ដើម្បីជួបជាមួយនិស្សិតជប៉ុននៅទីនោះ។
អ្នកស្រីបន្តថា៖ «និស្សិតខ្មែរអាចស្គាល់ពីវប្បធម៌ ប្រពៃណី សង្គមជប៉ុនបានតាមរយៈការផ្លាស់ប្តូរវប្បធម៌ ឬស្នាក់នៅតាមផ្ទះប្រជាជនជប៉ុន...ក្រុមទាំងប្រាំមួយនឹងធ្វើបទបង្ហាញរួមមួយនៅប្រទេសជប៉ុន»។
គួរបញ្ជាក់ថាកម្មវិធីJENESYS របស់រាជរដ្ឋាភិបាលជប៉ុននេះបានចាប់ផ្ដើមតាំងពីឆ្នាំ២០០៧ ដែលមានអ្នកចូលរួមរហូតដល់២៥០០នាក់រួចមកហើយ៕
