- 2018-03-05 04:04:50
- ការអប់រំ
ចង់ជាប់អាហារូបករណ៍ទៅចិនងាយបំផុត បើដឹងពីគន្លឹះទាំងនេះ
- 2018-03-05 04:04:50
- ចំនួនមតិ 0 | ចំនួនចែករំលែក 0
ចង់ជាប់អាហារូបករណ៍ទៅចិនងាយបំផុត បើដឹងពីគន្លឹះទាំងនេះ
ចន្លោះមិនឃើញ
ថ្ងៃនេះ Sabay សូមណែនាំប្រិយមិត្ត ជាពិសេសយុវជនកម្ពុជាកំពុងស្វែងរកការដាក់អាហារូបករណ៍ទៅសិក្សានៅប្រទេសចិនសម្រេចបានជោគជ័យ។ លោក ហេង ចាន់ហាក់ ប្រធានក្រុមប្រឹក្សាភិបាលនិស្សិតកម្ពុជាប្រចាំសាធារណរដ្ឋប្រជាមានិតចិន និងជារៀមច្បងធ្លាប់មានបទពិសោធន៍រៀននៅប្រទេសចិន ដែលបានបញ្ចប់បរិញ្ញាបត្រវិទ្យាសាស្ត្រសេដ្ឋកិច្ច និងការអប់រំភាសាអង់គ្លេស និងបញ្ចប់អនុបណ្ឌិតផ្នែកច្បាប់ស្ដីពីសិទ្ធិមនុស្ស នឹងចែករលែកបទសោធន៍ អត្ថប្រយោជន៍ និងណែនាំធ្វើយ៉ាងណាដើម្បីជាប់អាហារូបករណ៍ទៅប្រទេសចិន។
Sabay: តើមានប៉ុន្មានជំហាន ដើម្បីដាក់អាហារូបករណ៍ជាប់ដោយជោគជ័យ?
លោក ហេង ចាន់ហាក់៖ "ជំហានជាខ្លីគឺថា ដំបូងយើងត្រូវដឹងក្នុងចិត្តថា យើងចង់រៀននៅសាកលវិទ្យាល័យណា... ចង់បានអាហារូបករណ៍បែបណា និងកន្លែងណាដែលយើងចង់ទៅរៀន។ ម្យ៉ាងវិញទៀត ដើម្បីដាក់អាហារូបករណ៍ជោគជ័យ សិស្សនិស្សិតត្រូវតែត្រៀមរួចជាស្រេច ពិសេសគឺស្គាល់អាស័យដ្ឋានសាលា(Website) និងទម្រង់បែបបទដាក់ពាក្យ(Application) សេចក្ដីថ្លែងការណ៍ផ្ទាល់ខ្លួន(Personal Statement) ចំណេះដឹងភាសាអង់គ្លេសច្បាស់លាស់ (Language Proficiency) បទពិសោធន៍ការងារ(បើមាន)និងសញ្ញាបត្របញ្ជាក់ការសិក្សា"។
លោកបន្តថា៖ "សម្រាប់បទពិសោធន៍ខ្ញុំផ្ទាល់ ការដាក់អាហារូបករណ៍ទៅរៀននៅចិន ថ្នាក់អនុបណ្ឌិត និងបណ្ឌិត មានឱកាសច្រើនជាងបរិញ្ញាបត្រ... ព្រោះថាសិស្សនៅចិនម្នាក់ៗ ក៏សម្រុកចូលរៀនថ្នាក់បរិញ្ញាបត្រច្រើន ហេតុដូច្នេះយើងពិបាកនឹងជាប់"។ រីឯការរស់នៅ និងប្រពៃណីនៅចិនគឺស្រដៀងគ្នានៅកម្ពុជា។ លោកបន្ថែម។
Sabay: តើនិស្សិតទៅរៀននៅចិន ត្រឡប់មកវិញនឹងទទួលបានអត្ថប្រយោជន៍ដូចម្ដេចខ្លះ?
លោក ហេង ចាន់ហាក់៖ "បើយើងស្រមៃទៅគឺធំណាស់។ បើយើងគិតពីអនាគត ឬរបររកទទួលទាននោះ ចិនជាអ្នកវិនិយោគធំនៅស្រុកខ្មែរ ហើយជំនួយពីចិនច្រើនជាងគេ ហើយក្រុមហ៊ុនភាគច្រើនគឺជាចិន។ បើយើងបញ្ចប់ការសិក្សាពីប្រទេសចិន យ៉ាងហោចណាស់យើងចេះភាសាចិន និងឆាប់ទទួលបានការងារ ហើយអាចទទូលប្រាក់ខែពី ៦០០ទៅ ៨០០ដុល្លារ ពេលត្រលប់មកស្រុកខ្មែរវិញ "។
Sabay: មិនចេះភាសាចិន តែចេះអង់គ្លេស អាចដាក់អាហារូបករណ៍ដែរទេ?
លោក ហេង ចាន់ហាក់៖ "បាន! អាហារូបករណ៍មានពីរប្រភេទ ដោយមួយជាកម្មវិធីសិក្សាជាភាសាអន្តរជាតិ (អង់គ្លេស) មួយទៀតជាភាសាចិន។ ការដាក់អាហារូបករណ៍ អង់គ្លេស មានភាពតឹងរឹងបន្តិច តែបើបានជាប់ហើយគឺងាយស្រួលរៀនជាងភាសាចិន ព្រោះថានិស្សិតក្រៅស្រុកទៅរៀននៅចិនត្រូវប្រកួតប្រជែងជាមួយនិស្សិតចិនដែរ"។
Sabay: ចំពោះតេស្ត IELT ចាំបាច់ត្រូវតែមានដែរឬទេ?
លោក ហេង ចាន់ហាក់៖ "អាស្រ័យទៅលើសាលាខ្លះ ប៉ុន្តែពិន្ទុ IELT សម្រាប់អនុបណ្ឌិត អាចចាប់ពី 6.5 និង បណ្ឌិត ចាប់ពី 7.0”។ សិស្សនិស្សិតអាចតាមដានអាហារូបករណ៍ទម្លាក់ផ្ទាល់ពីរដ្ឋាភិបាលចិនតាមរយៈ បណ្ដាញសង្គមហ្វេសបុករបស់ សមាគមនិស្សិតកម្ពុជាប្រចាំសាធារណរដ្ឋប្រជាមានិតចិន ៕
