- 2018-07-31 04:13:15
- ការអប់រំ
លោកនាយកតស៊ូមិនធម្មតាឡើយ រហូតសាលាវត្តបូព៌សៀមរាបល្បីខ្ទរខ្ទារដល់បរទេស
- 2018-07-31 04:13:15
- ចំនួនមតិ 0 | ចំនួនចែករំលែក 0
លោកនាយកតស៊ូមិនធម្មតាឡើយ រហូតសាលាវត្តបូព៌សៀមរាបល្បីខ្ទរខ្ទារដល់បរទេស
ចន្លោះមិនឃើញ
បើនិយាយដល់សាលាបឋមសិក្សាដែលល្បីខ្ទរខ្ទារដាច់គេទូទាំងប្រទេស ទាំងវិន័យ សណ្ដាប់ធ្នាប់ បរិស្ថាន គុណភាពការបង្រៀន និងគ្រប់បែបយ៉ាងល្អឥតខ្ចោះ រហូតដល់សិស្សថៃមិនតិចជាងរយនាក់មកទស្សនកិច្ចរាល់ឆ្នាំ គេគ្រប់គ្នាប្រាកដជានឹកដល់ សាលាចំកណ្ដាលក្រុងសៀមរាប គឺសាលាបឋមសិក្សាវត្តបូព៌។
តើនៅពីក្រោយភាពល្បីល្បាញទូទាំងប្រទេស រហូតដល់ក្រៅប្រទេស តើនរណាជាបុគ្គលដ៏សំខាន់?
លោក ពិន គិមឆេន គឺជានាយកសាលាបឋមសិក្សាវត្តបូព៌ ដែលជាបុគ្គលម្នាក់បានខិតខំតស៊ូ ដឹកនាំសាលារៀនមួយនេះ រហូតមានកេរ្តិ៍ឈ្មោះល្បីល្បាញដល់សព្វថ្ងៃ រកគូប្រជែងពុំបាន។ ទម្រាំបានមកដូចសព្វថ្ងៃ នាយកសាលាដ៏ឆ្នើមនេះ បានឆ្លងកាត់ការលំបាកធំៗ ៤ចំណុចដូចខាងក្រោមនេះ៖
១. ការធ្វើកំណែទម្រង់ដំបូងបំផុត
តាំងពីទទួលតំណែងជានាយកសាលាបឋមក្នុងឆ្នាំ ១៩៩៤ លោកបានធ្វើកំណែទម្រង់ជាច្រើនដែលមិនធ្លាប់មានដើម្បីផ្លាស់ប្ដូរមុខមាត់ថ្មី ផ្ដោតជាពិសេសទៅលើសណ្ដាប់ធ្នាប់ វិន័យ និងចក្ខុវិស័យសំខាន់ៗរបស់សាលាបឋមសិក្សាមួយនេះ។ ដំណើរការកែទម្រង់ដំបូងពិតជាមានការលំបាកដោយសារតែថ្នាក់លើទាំងខ្សែបណ្ដោយ និងខ្សែទទឹង មិនយល់អំពីចក្ខុវិស័យរបស់សាលា។
២. កត្តាគ្រូបង្រៀន
លោកនាយក ពិន គិមឆេន ប្រាប់ទៀតថា គ្រូបង្រៀននៅក្រោមបង្គាប់ទាំងអស់ បានបង្ហាញការមិនសប្បាយចិត្ត ចំពោះការរឹតបន្ដឹងវិន័យដែលតឹងតែងខ្លាំង។ គ្រូបង្រៀនក្នុងសាលាស្ទើរគ្រប់គ្នាយល់ថាប្រាក់ខែគ្រូមានកម្រិតដូចៗគ្នាទេ ចុះហេតុអ្វីចាំបាច់ត្រូវធ្វើឲ្យល្អជាងគេយ៉ាងនេះ? ដូច្នេះហើយទម្រាំឲ្យគោលបំណង និងចិត្តគំនិតរបស់របស់លោក ជ្រាបដល់បេះដូងអ្នកគ្រប់គ្នា គឺមិនមែនជារឿងងាយស្រួលឡើយ ទម្រាំអ្វីៗចាប់ផ្ដើមដំណើរការទៅមុខទៀត។
៣. កត្តាឪពុកម្ដាយ
នាយកសាលា ដែលទទួលបានការវាយតម្លៃកម្រិតស្ដង់ដារខ្ពស់ ប្រចាំប្រទេសរូបនេះ បន្តថា បញ្ហាមួយទៀតនោះគឺ មាតាបិតា និងអាណាព្យាបាលរបស់សិស្ស។ មាតាបិតាសិស្សមួយចំនួនមិនទាន់យល់ និងមិនដែលជួបប្រទះ ចំពោះការរឹតបន្ដឹងវិន័យ សណ្ដាប់ធ្នាប់របស់សិស្ស។ ដូច្នេះហើយទើបពួកគាត់បានបញ្ចេញនូវប្រតិកម្មយ៉ាងខ្លាំងនាពេលនោះ។ ប៉ុន្ដែនាពេលបច្ចុប្បន្នមានមាតាបិតាសិស្សតិចណាស់ ដែលប្រតិកម្ម ដោយភាគច្រើនឪពុកម្ដាយរបស់សិស្សានុសិស្សទាំងអស់ បានបង្ហាញការគាំទ្រចំពោះការរៀបចំរបស់សាលាទៅវិញ។
៤. កត្តាគ្រួសាររបស់លោកផ្ទាល់
ក្រោយមានប្រតិកម្មច្រើន ពីលោកគ្រូ អ្នកគ្រូ និងអាណាព្យាបាលរបស់សិស្ស គ្រួសាររបស់លោកនាយក ពិន គិមឆេន មិនជាសប្បាយចិត្តប៉ុន្មាននោះទេ។ មួយវិញទៀតនោះ អ្នកផ្ទះរបស់លោកមិនសប្បាយចិត្តឡើយ ចំពោះអ្វីដែលលោកបានអនុវត្ត ព្រោះបានចំណាយពេលច្រើនលើការងារ ព្រលឹមចេញព្រលប់ចូលស្ទើរតែរាល់ថ្ងៃ តែទទួលបានមកវិញនូវការប្រតិកម្មជាច្រើនទៅវិញនោះ។
ទោះជាយ៉ាងណាក្ដី នាយកសាលារូបនេះឲ្យដឹងថា ទោះជាត្រូវប្រឹងប្រែងដើរទៅមុខដោយលំបាកក្ដី ក៏ប៉ុន្ដែលោកបានជំនះលើព្យុះធំទាំង ៤នេះរួចរាល់ហើយ។ រហូតមកដល់បច្ចុប្បន្នការតស៊ូលំបាកប្រឹងប្រែងគ្រប់បែបយ៉ាង ទទួលបានលទ្ធផលយ៉ាងគាប់ប្រសើរបំផុត។
សាលាបឋមសិក្សាវត្តបូព៌ មានអគារសិក្សាចំនួន ១៤ ខ្នង ស្មើនឹង ៦០ បន្ទប់ រួមជាមួយនឹងគ្រូបង្រៀនសរុបចំនួន ១១៦ នាក់។ គិតត្រឹមឆ្នាំសិក្សា ២០១៦-២០១៧ សាលា មានសិស្សានុសិស្សចូលសិក្សាសរុបចំនួន ៦ ៣៧៦ នាក់ ស្រីចំនួន ៣ ០៧២៕
