- 2019-02-13 12:27:49
- ការអប់រំ
គិតខុសខកចិត្ត ដាស់តឿនខ្លួនឯង ៧ចំណុចនេះជួយអ្នកឲ្យរឹងមាំវិញបាន
- 2019-02-13 12:27:49
- ចំនួនមតិ 0 | ចំនួនចែករំលែក 0
គិតខុសខកចិត្ត ដាស់តឿនខ្លួនឯង ៧ចំណុចនេះជួយអ្នកឲ្យរឹងមាំវិញបាន
ចន្លោះមិនឃើញ
រឿងគិតខុស ខកចិត្តក្នុងជីវិតនេះអ្នកណាក៏ធ្លាប់ជួបដែរ គ្រាន់តែមនុស្សដែលរកឃើញជោគជ័យ គឺគេមិនចេះចុះញ៉មនឹងបញ្ហា ហើយបានប្រើប្រាស់បទពិសោធន៍បរាជ័យទាំងនោះដើម្បីស្វែងរកពន្លឺជោគជ័យពិតប្រាកដបាន។ មួយជីវិតមាន ១០ឆ្នាំប៉ុន្មានដង គួរកុំបណ្តោយឲ្យពេលវេលាកន្លងទៅដោយគ្មានន័យ។ តោះ! មកមើលគន្លឹះខ្លះៗដើម្បីជួយឲ្យអ្នករឹងមាំពេលជួយបញ្ហា ដូចជា ៖
១. ប្រាប់ខ្លួនឯងថានេះគ្រាន់តែជាមេរៀនជីវិតប៉ុណ្ណោះ៖ ពេលខ្លះគិតខុសចាញ់បោកគេជ្រុលទៅហើយ កុំនៅទុក្ខសោកត្រាំត្រែងនឹងរឿងនឹងទៀត វាអត់ប្រយោជន៍ឡើយ។ គួរប្រាប់ខ្លួនឯងថាបានបង់ថ្លៃរៀនមេរៀនដ៏សំខាន់មួយក្នុងជីវិត ហើយបន្តដំណើរទៅមុខទៀតដោយប្រុងប្រយ័ត្ន។ ត្រូវឲ្យប្រាកដថាអ្នកនឹងមិនបង្កើតកំហុសឆ្គងបែបនេះជាលើកទី២ឡើយ។
២. បើយើងរត់ចោលបញ្ហា មិនយូរទេវានឹងមកលងយើងរាល់ថ្ងៃ៖ យើងអាចនៅឆ្ងាយពីមនុស្សដែលបង្កបញ្ហា តែយើងមិនអាចចេះតែរត់គេចពីបញ្ហាបានរហូតនោះទេ។ បញ្ហាខ្លះប្រៀបបាននឹងបន្ទប់ងងឹតដែលមើលទៅគួរឲ្យខ្លាច តែតាមពិតវាគ្រាន់តែមកពីអ្នកមិនទាន់ចូលទៅដល់ខាងក្នុងហើយបើកភ្លើងមើលវាឲ្យច្បាស់នឹងភ្នែកប៉ុណ្ណោះ។
៣. ត្រូវចាំថារឿងអ្វីក៏មានដំណោះស្រាយដែរ៖ គេតែងនិយាយថា «ទេវតាមិនបិទផ្លូវមនុស្សល្អទេ» វាជាការពិតឲ្យតែអ្នកប្រឹងប្រែងដោះស្រាយ បញ្ហាទាំងអស់នោះនឹងល្អប្រសើរឡើង។ ទោះអ្នកជួបឧបសគ្គអ្វីក៏ដោយ ត្រូវគិតថាមិនអស់ផ្លូវដើរនោះទេ ឲ្យតែយើងមិនចុះចាញ់ ហើយព្យាយាមជម្នះវា។
៤. កែលម្អ និងពង្រឹងអ្វីដែលយើងនៅខ្វះខាត៖ បើការងារនោះមិនទាន់ជោគជ័យ ត្រូវយកវាមកគិតឡើងវិញថាហេតុអីយើងមិនជោគជ័យ? ត្រូវរកចំណុចដែលអ្នកនៅខ្វះខាតឲ្យឃើញ រួចចាប់ផ្ដើមពង្រឹងចំណុចនោះឲ្យបានល្អសិន ។
៥. ត្រូវមានភាពអំណត់ចំពោះខ្លួនឯង ទោះមានរឿងអ្វីកើតឡើងក៏ដោយ កុំចេះតែបន្ទោសខ្លួនឯង និងដាក់សម្ពាធខ្លួនឯងជ្រុលដែលនាំឲ្យស្រ្តេសរហូតដល់គិតអ្វីលែងចេញ ឈឺក្បាលបាក់ទឹកចិត្តជាដើម។ ត្រូវចេះផ្តល់ពេលវេលាឲ្យខ្លួនឯងបានបន្ធូរសម្ពាធ និងសាកថ្មផង មុនត្រលប់មកគិតរឿងឈឺក្បាលនោះម្តងទៀត។
៦. ការលំបាកនឹងធ្វើឲ្យអ្នករឹងប៉ឹង៖ ត្រូវរំលឹកខ្លួនឯងថារាល់បញ្ហាដែលកើតឡើងក្នុងជីវិតអ្នក នឹងជួយឲ្យអ្នកកាន់តែរឹងមាំប្រសិនបើអ្នកជម្នះវាបាន។ រៀនដឹកនាំជីវិតដោយភាពវិជ្ជមានជានិច្ច ត្រូវចាំថាមនុស្សល្អ គង់ជួបល្អមិនខាន។
៧. ត្រូវចាំថាមិនមែនមានតែយើងនោះទេដែលឈឺចាប់៖ មានមនុស្សច្រើនណាស់ដែលជួបរឿងខកចិត្ត មិនមែនមានតែអ្នកទេ។ ត្រូវប្រាប់ខ្លួនឯងថាពេលយើងឈឺ អ្នកមានគុណទាំងពីររបស់អ្នក ឈឺជាងអ្នកទ្វេរដង ដូច្នេះបើស្រលាញ់ពួកគាត់ ត្រូវតែប្រឹងក្រោកឈរឡើង។
អ្នកណាក៏មានរឿងបែបនេះដែរ តែអ្វីដែលសំខាន់គេរឹងមាំក្នុងការទទួលយកវាមកដោះស្រាយ ហើយបន្តក្ដីសង្ឃឹមគេទៅមុខទៀត៕
