- 2019-02-23 08:33:28
- ការអប់រំ
៨ វិធីសាស្ត្រជំរុញចិត្តឲ្យខំរៀនសូត្រ និងរក្សាភាពអំណត់រហូតទទួលបានលទ្ធផលសមបំណង
- 2019-02-23 08:33:28
- ចំនួនមតិ 0 | ចំនួនចែករំលែក 0
៨ វិធីសាស្ត្រជំរុញចិត្តឲ្យខំរៀនសូត្រ និងរក្សាភាពអំណត់រហូតទទួលបានលទ្ធផលសមបំណង
ចន្លោះមិនឃើញ
មនុស្សយើងបើមិនផ្សារភ្ជាប់ខ្លួនជាមួយនឹងការរៀនសូត្រទេនោះ ច្បាស់ជាមិនងាយមានកំណើតឡើយ។ បើយើងកើតមកចូលចិត្តរៀនស្រាប់ ជារឿងដ៏ប្រពៃមួយ តែជាទូទៅនៅវ័យក្មេងមិនងាយមានឆន្ទៈចង់រៀនសូត្រដោយឯកឯងឡើយ ត្បិតដំណើរនៃការរៀនសូត្រស្មុគស្មាញ វែងឆ្ងាយ និងទាមទារការលះបង់ទាំងពេលវេលា និងកម្លាំងកាយចិត្ត។
ដើម្បីជំរុញចិត្តឲ្យខំប្រឹងរៀន និងរៀនឆាប់ចេះ ឆាប់ចាំនោះ មាន ៨ វិធីសាស្ត្រាដូចជា៖
១. ដឹងច្បាស់ពីមូលហេតុដែលត្រូវប្រឹងរៀន ៖ រៀនគឺដើម្បីខ្លួនឯង ព្រោះមានតែការរៀនសូត្រប៉ុណ្ណោះដែលអាចជួយឲ្យអ្នករីកចម្រើនបាន។ ត្រូវចាំថាការរៀនសូត្រអ្វីក៏ដោយ មិនអាចលំៗ លេងៗបានឡើយ បើចាយពេលជាមួយវាហើយ ត្រូវតែប្រឹងឲ្យអស់ពីលទ្ធភាពបង្កើតលទ្ធផលឲ្យបានល្អបំផុត ទើបវាផ្តល់ផលមកវិញបានច្រើនតាមនោះដែរ។
២. បង្កើតកម្លាំងជំរុញចិត្តខ្លួនឯងឲ្យចង់រៀន ៖ ការមានគោលដៅច្បាស់លាស់នឹងជួយឲ្យអ្នករៀនចំយុទ្ធសាស្ត្រដើម្បីរៀនកាន់តែមានប្រសិទ្ធភាព។ ជាទូទៅអ្នករៀនម្នាក់គួរតែដាក់គោលដៅឲ្យធំ ហើយខ្ពស់ ដូចជាចង់ក្លាយជាសិស្សពូកែអ្វីមួយឲ្យប្រាកដ ទើបពេលរៀនទទួលបានលទ្ធផលជាផ្លែផ្កា និងទន្ទេញពាក្យថា «ខ្ញុំធ្វើបាន» ជានិច្ច។
៣. បើកចំហចិត្តដើម្បីទទួលយកចំណេះដឹង ៖ មានន័យថាអ្នកត្រូវតែមានចំណាប់អារម្មណ៍ និងឆន្ទៈ ចង់ចេះចង់ដឹង យកចិត្តទុកដាក់ ចង់ឲ្យខ្លួនឯងកាន់តែវាងវៃ និង រីកចម្រើន ចង់បានជីវិតមួយដែលល្អប្រសើរ និងស្គាល់តម្លៃនៃការរៀនសូត្រ។
៤. យកអ្វីដែលរៀនមកគិតត្រិះរិះ ឲ្យយល់ច្បាស់ និងស៊ីជម្រៅ៖ ប្រើការគិតឲ្យបានច្រើនបំផុត បែងចែករកហេតុផលរហូតដល់អ្នកយល់ពិតប្រាកដទើបអាចហៅថាជាការរៀនសូត្រដ៏ពេញលេញបាន។ បើយើងទទួលមេរៀន ឬ ព័ត៌មានមួយដោយគ្រាន់តែកត់ត្រាទុកក្នុងប្រព័ន្ធចងចាំខួរក្បាលតែម្យ៉ាងដោយមិនបានគិតត្រិះរិះពិចារណាឲ្យយល់ជាក់លាក់នោះទេ នេះមិនចាត់ទុកថាអ្នកបានបើកចំហចិត្តដើម្បីរៀនសូត្រឡើយ។
៥. ឲ្យតែប្រឹងប្រែងប្រាកដជាមានលទ្ធផល៖ ជាអ្នករៀនម្នាក់ត្រូវមានការតាំងចិត្តមោះមុត ប្រាប់ខ្លួនឯងថាទោះជាលំបាកយ៉ាងណាក៏ដោយដាច់ខាតកុំបោះបង់ ។ រៀនសូត្រអ្វីមួយ បើចង់បានលទ្ធផលល្អប្រសើរវាមិនងាយស្រួល តែអ្នកក៏ត្រូវជឿជាក់ថាគ្មានអ្វីដែលលើសពីសមត្ថភាពខ្លួនឡើយ ដរាបណាអ្នកខំប្រឹងប្រែង ដោយមានរបៀប និងវិធីសាស្ត្ររៀនត្រឹមត្រូវ អ្នកច្បាស់ជាជោគជ័យមិនខាន។
៦. កុំដាក់សម្ពាធខ្លួនឯងជ្រុលពេក ត្រូវធ្វើឲ្យខ្លួនឯងរៀនដោយរីករាយ៖ ជីវិតមនុស្សយើងមានឡើងចុះ ការរៀនសូត្រក៏ដូច្នេះដែរ។ អីចឹងត្រូវចេះបើកចិត្តទទួលយកបញ្ហា និង ការបរាជ័យដែលអ្នកជួបប្រទះជាមេរៀន។ មានលក្ខខណ្ឌជាច្រើនដែលរំខានដល់ការរៀនសូត្រជារឿយៗ ដូចជា សុខភាព ស្ថានភាពគ្រួសារ និងផ្លូវចិត្តជាដើម នេះជារឿងធម្មជាតិរបស់មនុស្ស។ ដូច្នេះពេលជួបបញ្ហាទាំងនេះ គួរចេះដកឃ្លា បន្ធូរសម្ពាធ សម្រាក ស្វែងរកថាមពលថ្មី ដើម្បីបន្តដំណើរទៅមុខទៀត។
៧. នឿយមុនស្រណុកក្រោយ ៖ រាល់ការរៀនសូត្រ គឺជាការវិនិយោគរយៈពេលយូរ ដូច្នេះអ្នកក៏ត្រូវប្រឹងរក្សាភាពអំណត់តស៊ូខ្លួនឯងឲ្យបានរហូតដល់សម្រេចជោគជ័យពិតប្រាកដផងដែរ។ ព្រោះថាបើអ្នកបោះបង់ចោលពាក់កណ្តាលទី រាល់ការប្រឹងប្រែងកន្លងមកនឹងទៅជាអាសាបង់មិនខាន។ តែបើអ្នកសម្រេចបានជោគជ័យហើយវា នឹងក្លាយជាទ្រព្យជាប់ខ្លួនមួយជីវិត មិនអាចជ្រុះបាត់ ឬ ចោរឆក់ប្លន់បានឡើយ។
៨. យកចំណេះទៅបំពេញឲ្យកើតប្រយោជន៍ជាវិជ្ជមាន៖ ការរៀនដ៏ពិតប្រាកដ គឺ មានន័យថាយើងបានប្រើចំណេះដឹងនោះដើម្បីបង្កើតភាពវិជ្ជមាន ជាប្រយោជន៍ដល់សង្គមជាតិ មនុស្សជាតិ និងខ្លួនឯង ដូចពាក្យចាស់តែងពោលថា «ចំណេះដឹងណាដែលមិនបម្រើសង្គម ប្រៀបបាននឹងសំរាម»។
ការរៀនសូត្រមិនមែនសុទ្ធតែមានន័យថា ត្រូវទៅរៀននៅសាលាប៉ុណ្ណោះទេ វាអាចកើតឡើងគ្រប់ទីកន្លែង និងគ្រប់ពេលវេលា តួយ៉ាងដូចជា រៀនពីមនុស្ស និងបញ្ហាជុំវិញខ្លួន ពីចាស់ទុំដែលពោរពេញដោយបទពិសោធន៍ ពីក្រុមគ្រួសារ និងការអានសៀវភៅជាដើម៕
អត្ថបទទាក់ទង៖ ១០វិធីសាស្ត្រយកឈ្នះចិត្តមនុស្សយ៉ាងស័ក្ដិសិទ្ធិ ដើម្បីសម្រេចការងារធំដុំបានកាន់តែងាយស្រួល
