- 2019-08-13 06:53:29
- ការអប់រំ
នៅសល់ ៦ ថ្ងៃទៀតប្រលងបាក់ឌុបហើយ! គួរបិទ Facebook ចោលអត់?
- 2019-08-13 06:53:29
- ចំនួនមតិ 0 | ចំនួនចែករំលែក 0
នៅសល់ ៦ ថ្ងៃទៀតប្រលងបាក់ឌុបហើយ! គួរបិទ Facebook ចោលអត់?
ចន្លោះមិនឃើញ
Facebook ជាបណ្ដាញសង្គមដ៏ពេញនិយមមួយនៅប្រទេសកម្ពុជា ក្នុងពេលបច្ចុប្បន្ននេះ មិនថាវ័យចំណាស់ វ័យកណ្ដាល ឬវ័យជំទង់ឡើយ សុទ្ធតែប្រើប្រាស់វា ជាពិសេសនោះ សិស្សទី ១២ ដែលកំពុងត្រៀមប្រលងបាក់ឌុប។
ដោយហេតុថា បណ្ដាញសង្គមមួយប្រភេទនេះ មានទាំងផលវិជ្ជមាន និងផលអវិជ្ជមាន ជះឥទ្ធិពលទៅដល់បេក្ខជនប្រលងសញ្ញាប័ត្រមធ្យមសិក្សាទុតិយភូមិ បានជាបេក្ខជនមួយចំនួនកំពុងពិចារណាថា តើខ្លួនគួរតែឈប់ប្រើប្រាស់វា មួយរយះ ឬបន្តប្រើប្រាស់?
ជាសិស្សថ្នាក់ទី ១២ មួយរូប យុវជន លី គីមឡេង បានប្រាប់ឲ្យដឹងថា ខ្លួននឹងនៅតែបន្តប្រើប្រាស់ Facebook រហូតដល់ថ្ងៃប្រលង ពីព្រោះនៅក្នុងសម័យបច្ចុប្បន្ននេះ លំហាត់ ឬវិញ្ញាសាផ្សេងៗ ត្រូវបានចែកចាយពេញបណ្ដាញសង្គម ដែលផ្ដល់ភាពងាយស្រួលដល់ខ្លួនគេផ្ទាល់ ក្នុងការទទួលបានចំណេះថ្មីៗបន្ថែមទៀត។
ថ្វីដ្បិតតែយុវជនខាងលើមើលឃើញពិប្រយោជន៍ច្រើនរបស់ហ្វេសប៊ុកក៏ដោយ ក៏យុវជនរូបនេះបានដឹងច្បាស់ពីផលអវិជ្ជមានដូចគ្នា។ យុវជនរូបនេះបន្ថែមថា៖ « សម្រាប់ខ្ញុំផ្ទាល់ ការប្រើប្រាស់ Facebook ក៏វាប៉ះពាល់ដល់ការសិក្សារបស់ខ្ញុំដែរ ដូចយើងដឹងស្រាប់ហើយ តែពេលប្រើយូរទៅយើងជក់ហើយ វាពិបាកឈប់ហា៎ អ៊ីចឹងយើងក៏ខាតបង់ពេលវេលាដែរ»។
បេក្ខជនត្រៀមប្រលងបាក់ឌុបនេះ ក៏បានបញ្ជាក់ដែរថា ខ្លួនធ្លាប់ចង់ផ្ដាច់ឈប់ប្រើប្រាស់ Facebook ប៉ុន្តែនៅតែមិនអាចធ្វើបាន ព្រោះត្រូវការទាក់ទងទៅមិត្តភ័ក្ដិ ដើម្បីសួរលំហាត់គ្នា និងពន្យល់គ្នាទៅវិញទៅមក។
គីមឡេងបន្ថែមថា៖ « ខ្ញុំនៅតែបន្តប្រើប្រាស់វា តែខ្ញុំនឹងកាត់បន្ថយវា ហើយខ្ញុំនឹងបើកអ៊ីនធឺណិតចោល ប្រសិនជាមានអ្នកឆែកមកសួរខ្ញុំពាក់ព័ន្ធនិងព័ត៌មានផ្សេងៗ ឬក៏លំហាត់ ខ្ញុំអាចឆ្លើយតបគេបាន ខ្ញុំប្រើវាតែប៉ុណ្ណឹងទេ»។
ចំណែកសិស្សទី ១២ ម្នាក់ទៀត ហូយ បញ្ញារ៉ា បានឲ្យដឹងដែរថា រូបគេបានចំណាយពេលយ៉ាងច្រើនទៅលើ Facebook ប៉ុន្តែដោយឡែកមុនថ្ងៃប្រលងសញ្ញាប័ត្រមធ្យមសិក្សានេះ រូបគេនឹងកាត់បន្ថយការប្រើប្រាស់ ហើយប្រើប្រាស់វាតែពេលទំនេរបន្ទាប់ពីរៀន ជាពិសេសគឺពេលស្រ្តេស។
បេក្ខជនរូបនេះថា៖ « ខ្ញុំក៏មិនចង់លេងវាដែរ ប៉ុន្តែខ្ញុំគិតថា ពេលខ្ញុំទំនេរពីមើលមេរៀន ខ្ញុំក៏បើកមើលវាបន្តិចទៅ ដោយសារតែចង់ដឹងពីព័ត៌មាននៅក្នុងសង្គម ឬព័ត៌មានពាក់ព័ន្ធនិងបាក់ឌុប»។
ម៉្យាងទៀតយុវជនរូបនេះបន្តថា ទោះជាខ្លួនប្រើ Facebook យូរក្នុងរយះពេល ៦ ថ្ងៃ មុនថ្ងៃប្រលង ក៏គ្មានការប៉ះពាល់អ្វីដល់ការប្រលងរបស់គេដែរ ព្រោះមាតិកាក្នុងគណនីហ្វេសប៊ុករបស់គេ មានតែគម្រោងវិញ្ញាសាចាស់ៗ តែប៉ុណ្ណោះ។
ទាក់ទិននឹងបញ្ហានេះ លោក ឡុង ឆើត គ្រូបង្រៀនគណិតវិទ្យាត្រៀមប្រលងសញ្ញាបត្រមធ្យមសិក្សាទុតិយភូមិ បានឲ្យដឹងថា សម្រាប់សិស្សទី ១២ គួរតែផ្អាកប្រើប្រាស់ Facebook មួយរយៈសិន ហើយចាប់ផ្ដើមមើលមេរៀន តែមិនមែនមានន័យថាមិនប្រើប្រាស់សោះនោះទេ គឺត្រូវប្រើប្រាស់វា នៅពេលចង់ដឹងព័ត៌មានផ្សេងៗ ដូចជាការមើលឈ្មោះប្រលងជាដើម។
លោកថា៖« សល់តែ ៦ ថ្ងៃទៀតទេប្រលងហើយ យើងអាចប្រើ Facebook បាន តែសម្រាប់តែពេល យើងចង់ដឹងព័ត៌មានទាក់ទងនឹងក្រសួង post តែប៉ុណ្ណោះក្នុងអំឡុងពេលនេះ តែបើយើងងុបលេងរហូតម៉ង់ អត់ល្អទេ ព្រោះជិតដល់ពេលប្រលងហើយ»។
ទោះជាលោកណែនាំឲ្យសិស្សកាត់បន្ថយក៏ដោយ ក៏លោកបានបញ្ជាក់ថា Facebook ក៏មានផលប្រយោជន៍ដែរ គឺយើងអាចប្រើប្រាស់វា ដើម្បីទទួលបានចំណេះដឹងថ្មីៗ ក៏ដូចជាវិញ្ញាសាចាស់ៗ ដែលត្រូវបានគេចែកចាយផងដែរ។
បញ្ជាក់ផងដែរថា បេក្ខជនប្រលងបាក់ឌុបឆ្នាំនេះ មានចំនួនសរុប ១១៩,២១៧ នាក់ ខណៈមណ្ឌលប្រលងមាន ២០២ មណ្ឌល។