- 2017-01-30 08:46:47
- ការអប់រំ
អ្នកជំនួញ ៤រូប ចែករំលែកបទពិសោធន៍លើការរកស៊ី
- 2017-01-30 08:46:47
- ចំនួនមតិ 0 | ចំនួនចែករំលែក 0
អ្នកជំនួញ ៤រូប ចែករំលែកបទពិសោធន៍លើការរកស៊ី
ចន្លោះមិនឃើញ
ស្របពេលដែលយុវជនជាច្រើនងាកមកចាប់អារម្មណ៍លើមុខជំនួញផ្ទាល់ខ្លួននាពេលបច្ចុប្បន្ន ការប្រកួតប្រជែងក៏មានកាន់ខ្លាំង ហើយភាគរយជោគជ័យបែរធ្លាក់មកនៅកាន់តែតិច។ ដើម្បីជាវិថីនាំផ្លូវដល់អ្នកមានគំនិតចង់ចាប់ផ្ដើមអាជីវកម្មទាំងនោះ អ្នកជំនួញពោរពេញដោយបទពិសោធន៍ ៤រូប បានចែករំលែកចំណុចមួយចំនួននៅក្នុងកម្មវិធី "វេទិកាធុរកិច្ច ២០១៧" កាលពីពេលថ្មីៗនេះ។
គិតថាអ្វីដែលសង្គមកំពុងពេញនិយម
ជំនួញ៥ ដែលអាចមានសន្ទុះខ្លាំង ចំណីអាហារ, ម៉ូដ, វិស័យកម្សាន្ត, វិស័យហិរញ្ញវត្ថុ និងព័ត៌មានវិទ្យា
ចាប់ឱកាសបានហើយ ត្រូវហ៊ានប្រថុយ និងពុះពារ
ពង្រឹងគុណភាព បង្កើតទំនាក់ទំនង
ស្វែងយល់ពីនិស្ស័យធម្មជាតិរបស់ខ្លួនឯង
លោក ជី សិលា ដែលជាប្រធាននាយកប្រតិបត្តិក្រុមហ៊ុន Sabay Digital Corporation បាននិយាយថា ការរកស៊ីដែលជោគជ័យនោះ គឺត្រូវមើលពី Trend សង្គម ដោយលោកបានឲ្យនិយមន័យ Trend ថាជាអ្វីដែលកំពុងពេញនិយមនាពេលបច្ចុប្បន្ន ដូចជាយុវវ័យនិយមទិញកាហ្វេ brand brand និងមើលកុនជាដើម។
អ្នករកស៊ីពហុជំនួញរូបនេះបានលើកឡើងថា បើចង់រកស៊ីជោគជ័យនាពេលបច្ចុប្បន្ននេះ ត្រូវផ្ដោតទៅលើ 4F IT។ 4F មាន Food (ចំណីអាហារ), Fashion (ម៉ូដ), Fun (វិស័យកម្សាន្ត), និង Finance (វិស័យហិរញ្ញវត្ថុ) បន្ថែមពីលើនេះ គឺផ្នែក IT (ព័ត៌មានវិទ្យា) ដែលជំនួញទាំង៥នេះ លោក ជី សិលា បានលើកឡើងថា កំពុងមានសន្ទុះខ្លាំង ហើយមានភាគរយជោគជ័យច្រើន ប្រសិនបើតាមទាន់ Trend របស់វា។
ចំណែកលោក គង់ សុលីយ៉ា ប្រធាននាយកប្រតិបត្តិក្រុមហ៊ុនដឹកជញ្ជូន "Joonaak Delievery” បានអះអាងថា បើចង់រកស៊ីជោគជ័យ ត្រូវចាប់ឱកាសឲ្យបាន នោះភាគរយមានខ្ពស់។ ទោះយ៉ាងណា លោក សុលីយ៉ា បានបន្ថែមថា បន្ទាប់ពីចាប់ឱកាសបានហើយ ត្រូវពុះពារឲ្យខ្លាំង ព្រោះភាពជោគជ័យមិនមែនកើតឡើងដោយចៃដន្យទេ។ អ្នកជំនួញវ័យក្មេងបានបង្ហើរពាក្យមួយឃ្លាថា "ហ៊ានចាប់ផ្ដើម ទើបដឹងថាជោគជ័យឬអត់"។
លោក សោម សម្បត្តិ នាយកប្រតិបត្តិនៃសហគ្រាសផលិតថ្នាំពណ៌ជាតិខាំផែន បានប្រាប់ពីយុទ្ធសាស្ត្រនៃការពង្រីកម៉ាកផលិតផលរបស់ខ្លួនថា ជាដំបូងត្រូវដឹងពីគុណភាពសិន ដើម្បីឲ្យគេជឿទុកចិត្ត។ បន្ទាប់មក ត្រូវគិតលើការរចនា និងការវេចខ្ចប់ ឲ្យមានភាពទាក់ទាញ ធ្វើឲ្យគេមានអារម្មណ៍ថាមើលទៅល្អគួរទិញ។
ក្រៅពីនេះ ក៏ត្រូវផ្ដោតលើជំហរថាតើផលិតផលនោះ អ្នកណាជាអ្នកប្រើប្រាស់ បើមិនត្រូវទេ គួរប្ដូរបែបណាទើបជោគជ័យ។ លើសពីនេះ លោក សោម សម្បត្តិ បានបន្ថែមថា ការគ្រប់គ្រងទំនាក់ទំនង ជារឿងសំខាន់ ប្រសិនបើផលិតផលល្អហើយ មានទំនាក់ទំនងល្អទៀត ការកសាងម៉ាកផលិតផលរបស់ខ្លួនពិតជាជោគជ័យ។
ក្រៅពីចំណុចខាងលើ លោក គឹម ចាន់ណា ជានាយកគ្រឹះស្ថានបោះពុម្ពសៀវភៅម៉ាញបុក្ស (Mindbooks) បាននិយាយថា អ្នកចង់រកស៊ី ឬធ្វើជំនួញក៏ត្រូវស្វែងយល់ពីធម្មជាតិរបស់ខ្លួនឯងដែរ ទើបអាចធ្វើទៅបានដោយរលូន។ លោកបានលើកឧទាហរណ៍ថា "សត្វទឹកមិនអាចមករស់នៅលើគោក ឯសត្វគោកក៏មិនអាចមករស់នៅក្នុងទឹក"។ ដូចនេះ ត្រូវស្វែងយល់ថាខ្លួនឯងមាននិស្ស័យលើអ្វី មានចំណង់ចិត្តលើអ្វី ចាំចាប់ផ្ដើមចាប់ជំនួញលើផ្នែកនោះ៕
