ស្ថានទូតម៉ាឡេស៊ី ប្រចាំកម្ពុជា បានរៀបចំកម្មវិធីពិសាភោជនាអាហារ សម្រាប់ក្រុមអតីតនិស្សិតកម្មវិធីអាហារូបករណ៍ MTCP (Malaysian Technical Cooperation Programme) កាលពីថ្ងៃទី៩ ខែតុលាកន្លងទៅ នៅសណ្ឋាគារ​ Rosewood Phnom Penh ក្រោមអធិបតីភាពលោក Eldeen Husaini Mohd Hashim ឯកអគ្គរដ្ឋទូតម៉ាឡេស៊ី ប្រចាំព្រះរាជាណាចក្រកម្ពុជា។

នៅចំពោះមុខ​អតីតនិស្សិត និងភ្ញៀវកិត្តិយស​ប្រមាណជាង ៣០នាក់ លោក Eldeen Husaini Mohd Hashim បាន​មាន​ប្រសាសន៍ថា ទំនាក់ទំនងដ៏​រឹងមាំរវាងម៉ាឡេស៊ី និងកម្ពុជា ត្រូវបានគាំទ្រដោយ​ទំនាក់ទំនងរវាង​ប្រជាជន និងប្រជាជននៃប្រទេសទាំង២។ MTCP បានជំរុញកិច្ចសហប្រតិបត្តិការកាន់តែខ្លាំងឡើងរវាងរដ្ឋាភិបាលនៃប្រទេសទាំងពីរ និងបានលើកទឹកចិត្តឱ្យមានកិច្ចសហប្រតិបត្តិការកាន់តែស៊ីជម្រៅ រវាងវិស័យឯកជននៃប្រទេសទាំងពីរ។

លោក​ឯកអគ្គរដ្ឋទូត​ ក៏បានបន្ថែមដែរថា កិច្ច​សហប្រតិបត្តិការ​​នេះ នឹង​ជម្រុញ​លើកទឹកចិត្ត ឱ្យមានការចូលរួមនាពេលអនាគតបន្ថែមទៀត ពីមន្រ្តីកម្ពុជានៅក្នុង MTCP ដែល​មិនត្រឹមតែ​ផ្តល់អត្ថប្រយោជន៍​ដល់ទំនាក់ទំនងទ្វេភាគី​ប៉ុណ្ណោះទេ ប៉ុន្តែថែមទាំងជួយក្នុងការអភិវឌ្ឍអាជីពរបស់អ្នកចូលរួមផងដែរ។

នេះគឺជាកម្មវិធីលើកទី៣ហើយ ដែល​ស្ថានទូតម៉ាឡេស៉ី បានរៀបចំ​កម្មវិធីសម្រាប់អតីតនិស្សិត MTCP ក្នុងឆ្នាំនេះ ដែល​ពីរលើកដំបូង បានប្រារព្ធឡើងកាលពីខែមិថុនា ដោយមាន​ការ​ចូលរួម​ពី​ឯកឧត្ដម​ទេសរដ្ឋមន្រ្តី លី ធុច និងទេសរដ្ឋមន្រ្តី អូស្មាន ហាសាន់។

គោលបំណងនៃកម្មវិធីនេះ គឺដើម្បីលើកកម្ពស់ឱ្យមានការចូលរួម និងកសាងនូវចំណងមិត្តរឹងមាំយូរអង្វែងជាមួយអតីតនិស្សិត MTCP។ មិនតែប៉ុណ្ណោះ វាក៏ដើម្បីបង្កើនទំនាក់ទំនងឲ្យកាន់តែជិតស្និទ្ធ ក៏ដូចជាពង្រឹងបណ្តាញទាក់ទងរវាងស្ថានទូតម៉ាឡេស៉ី ប្រជាពលរដ្ឋម៉ាឡេស៉ីដែលរស់នៅប្រទេសកម្ពុជា និងអតីតនិស្សិត MTCP របស់កម្ពុជាផងដែរ។

សូមបញ្ជាក់ផងដែរថា កម្ពុជា បានក្លាយជាប្រទេសដែលបានទទួលបានកម្មវិធីអាហារូបករណ៍ MTCP កាលពីឆ្នាំ១៩៩១ ហើយមកទល់បច្ចុប្បន្ន ពលរដ្ឋកម្ពុជាសរុបច្រើនជាង១,៦០០នាក់ បានចូលរួមក្នុងវគ្គសិក្សានៃកម្មវិធីនេះ។ ជារៀងរាល់ឆ្នាំ បណ្តាគ្រឹះស្ថានបណ្តុះបណ្តាលនាំមុខគេរបស់ម៉ាឡេស៉ី ផ្តល់នូវវគ្គសិក្សាឯកទេសរយៈពេលខ្លីច្រើនជាង៥០ ក្នុងជំនាញជាច្រើនដូចជា៖ កសិកម្ម សេដ្ឋកិច្ច ហិរញ្ញវត្ថុ ពាណិជ្ជកម្ម អប់រំ បរិស្ថាន បណ្តុះបណ្តាលបច្ចេកទេសឧស្សាហកម្ម ការទូត គ្រប់គ្រងនិងរដ្ឋបាលសាធារណៈ សង្គម វិទ្យាសាស្រ្ត បច្ចេកវិទ្យា និងបច្ចេកវិទ្យាព័ត៌មានគមនាគមន៍ (ICT) ជាដើម៕