ល្បីឈ្មោះ Sabay ច្រើនឆ្នាំ ឥឡូវសិស្សចុះកម្មសិក្សា នៃសាលា PNC ឈ្វេងយល់កាន់តែច្បាស់!

2024-03-19 05:24:45
ការអប់រំ

2024-03-19 05:24:45
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូ និងនិស្សិតជាង ១០រូប នៃសាលា ភី អិន កម្ពុជា បានចុះកម្មសិក្សានៅក្រុមហ៊ុន Sabay Digital កាលពីល្ងាចថ្ងៃទី១៨ ខែមីនា ឆ្នាំ២០២៤។ ក្នុងឱកាសចុះកម្មសិក្សានេះ បុគ្គលិកធនធានមនុស្ស និងបុគ្គលិកផ្នែកបច្ចេកវិទ្យា នៃក្រុមហ៊ុន Sabay Digital បានធ្វើបទបង្ហាញពីដំណើរការរបស់ក្រុមហ៊ុន និងបច្ចេកវិទ្យាថ្មីៗដែលក្រុមហ៊ុនកំពុងប្រើ និងផ្ដល់សេវាជូនដល់អតិថិជន។

លោក គ្រី ពុទ្ធី ដែលគ្រូបង្រៀន និងជាប្រធានក្រុមដឹកនាំនិស្សិតឆ្នាំទី២ ផ្នែកព័ត៌មានវិទ្យាចំនួន ១៣រូប ចុះកម្មសិក្សា មានប្រសាសន៍ថា កម្មវិធី និងឈ្មោះបច្ចេកទេសមួយចំនួនទាក់ទងនឹងព័ត៌មានវិទ្យាដែលរូបលោកផ្ទាល់ និងសិស្សៗមិនធ្លាប់បានឮនោះ ទើបតែបានដឹងច្បាស់ក្រោយពីមានការបង្ហាញពីក្រុមការងាររបស់ក្រុមហ៊ុន Sabay Digital។ អ្វីដែលបានបង្ហាញនេះ គឺត្រូវទៅនឹងតម្រូវការ ឬការចង់ចេះចង់ដឹងរបស់និស្សិតដែលបានរៀននៅក្នុងផ្នែកព័ត៌មានវិទ្យានេះស្រាប់។

ក្រោយពីបានជួបសំណេះសំណាល និងបង្ហាញពីដំណើរការក្រុមហ៊ុន ព្រមទាំងព័ត៌មានទាក់ទងនឹងបច្ចេកវិទ្យាមួយចំនួនដល់គ្រូ និងក្រុមនិស្សិត បុគ្គលិកធនធានមនុស្ស នៃក្រុមហ៊ុន Sabay Digital ក៏បានអញ្ជើញពួកគាត់ទស្សនកិច្ចនៅកន្លែងបំពេញការងាររបស់បុគ្គលិកតាមផ្នែកនីមួយៗផងដែរ។

និស្សិតរៀនជំនាញ Web developer ក្នុងចំណោមនិស្សិតទាំង ១៣រូប គឺកញ្ញា ពៅ សុគន្ធា បានបង្ហាញចំណាប់អារម្មណ៍ថា ក្រោយបានឃើញឧបករណ៍បច្ចេកទេស និងរបៀបរបបធ្វើការងាររបស់បុគ្គលិកក្រុមហ៊ុនដែលកញ្ញាយល់ថាជាក្រុមហ៊ុនលេចធ្លោរមួយនៅកម្ពុជាផ្នែកបច្ចេកវិទ្យាព័ត៌មាន គឺកញ្ញាពិតជារំភើបខ្លាំង ហើយចង់មានឱកាសដើម្បីបំពេញការងារនៅក្រុមហ៊ុន។

ចំណែកប្អូនប្រុស ទីវ ដែលជានិស្សិតទើបរៀនចប់ឆ្នាំទី២ នៃសាលា ភី អិន កម្ពុជា ជំនាញ Web developer សង្កេតឃើញថា ភាសាបច្ចេកទេស និងការអនុវត្ដការងារស្ទើរដូចទាំងស្រុងទៅនឹងអ្វីដែលប្អូនបានសិក្សានៅឯសាសារៀនដែរ។ តាមរយៈការចុះកម្មវិសក្សានៅថ្ងៃនេះ បានធ្វើឲ្យប្អូនស្រឡាញ់វិស័យបច្ចេកវិទ្យាកាន់តែខ្លាំង ហើយចង់មានឱកាសសាកល្បងការងារជាមួយក្រុមហ៊ុន Sabay Digital នៅថ្ងៃណាមួយបើក្រុមហ៊ុនផ្ដល់ឱកាស។

ក្រោយបញ្ចប់ទស្សនកិច្ចសិក្សា ដោយចំណាយពេលជិត ២ម៉ោង ក្រុមនិស្សិត គ្រូបង្រៀន និងបុគ្គលិកក្រុមហ៊ុន Sabay Digital បានថតរូបអនុស្សាវរីយ៍ជុំគ្នា និងបានប្រគល់កាដូអនុស្សាវរីយ៍ជា Eco-bag ឬថង់ស្ពាយដែលLogo Sabay យ៉ាងស្រស់ស្អាតម្នាក់មួយទៀតផង៕