កាំង តុងងី៖ មានចំណេះដឹងហិរញ្ញវត្ថុកាន់តែល្អ អាចគ្រប់គ្រងហានិភ័យ ហើយការវិនិយោគកាន់តែប្រសើរ

2024-04-29 07:24:04
ការអប់រំ

2024-04-29 07:24:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ដូចការគ្រោងទុក "The Platform" បានរៀបចំវេទិកាចែករំលែកចំណេះដឹងផ្នែកហិរញ្ញវត្ថុ ក្រោមប្រធានបទ “លុយសំខាន់! បង្កើតយុទ្ធសាស្ដ្រគ្រប់គ្រងហិរញ្ញវត្ថុផ្ទាល់ខ្លួន" សម្រាប់យុវជន និងអ្នកមានប្រាក់ចំណូលប្រចាំខែជាច្រើននាក់។

វេទិកានេះ មានការអញ្ជើញចូលរួមចែករំលែកចំណេះដឹង និងបទពិសោធន៍គ្រប់គ្រងហិរញ្ញវត្ថុពីវាគ្មិនជំនាញៗ ៣រូប។ ក្នុងនោះ គឺមានលោក កាំង តុងងីប្រធាននាយកដ្ឋានទំនាក់ទំនង នៃសមាគមមីក្រូហិរញ្ញវត្ថុកម្ពុជា លោកស្រី ធាម រមណី នាយិកាទំនាក់ទំនងគូភាគី ប្រធានគ្រប់គ្រងតំបន់ នៃធនាគារ ABA Bank និងលោកស្រី ស៊ូ ហ្សូលីដា នាយកគ្រប់គ្រង នៃ Prestige Consulting។

តាមរយៈសារចែករំលែកនៅក្នុងគម្រោង The Platform កាលពីថ្ងៃទី២៧ ខែមេសា ឆ្នាំ២០២៤ លោក កាំង តុងងី ឲ្យដឹងថា ការចាប់ផ្ដើមឈ្វេងយល់ចំណេះដឹងផ្នែកហិរញ្ញវត្ថុបានកាន់តែឆាប់ គឺមិនថាតែយុវជនទេ ទាំងអ្នករកស៊ី គឺអាចធ្វើឲ្យពួកគាត់មានសេរីភាពហិរញ្ញវត្ថុ ឬអាចធ្វើឲ្យពួកគេឈានដល់គោលដៅបានលឿន។

លោក កាំង តុងងី៖ "ខ្ញុំគិតថាការចូលរួមចំណែកចែករំលែកជាមួយThe platform ថ្ងៃនេះលើប្រធានបទ ហិរញ្ញវត្ថុផ្ទាល់ខ្លួននេះ ជាចំណុចមួយដ៏សំខាន់ក្នុងការចូលរួមលើកកម្ពស់ការយល់ដឹងផ្នែកហិរញ្ញវត្ថុដល់យុវជន និងអ្នកធ្វើការមួយចំនួន។ នៅពេលដែលពួកគាត់មានចំណេះដឹងហិរញ្ញវត្ថុកាន់តែល្អ គឺគាត់អាចគ្រប់គ្រងហានិភ័យ ឬអាចវិនិយោគ ដើម្បីជំរុញឲ្យសេដ្ឋកិច្ចកម្ពុជាកាន់តែមានភាពប្រសើរឡើងដែរ"។

ចំណែកសហស្ថាបនិក នៃគម្រោង The Platform លោក គង់ សុរិយា មានប្រសាសន៍ថា ទិសដៅសំខាន់របស់គម្រោង គឺចង់ផ្ដល់ឱកាស និងពង្រួមឲ្យយុវវ័យជុំគ្នា ដើម្បីពិភាក្សា ទទួល និងចែករំលែកចំណេះដឹងថ្មីៗ។ លោកថា ក្រុមការងារនឹងរៀបចំវេទិកា ក្រោមប្រធានបទសំខាន់ជាច្រើនទៀត នៅបន្ទាប់ពីនេះ។

គម្រោង The platform ត្រូវបានបំផុសគំនិតឡើងកាលពីខែមករា ឆ្នាំ២០២៤ ហើយធ្លាប់បង្កើតវេទិការស្រដៀងគ្នានេះជាលើកដំបូងកាលពីខែកុម្ភៈ ដោយទទួលបានការចាប់អារម្មណ៍ច្រើនពីមហាជន ជាពិសេសយុវវ័យដែលមានប្រាក់ចំណូលប្រចាំខែ ប៉ុន្ដែពួកគេមិនទាន់មានការគ្រប់គ្រង់លុយបានច្បាស់លាស់។

សូមរំលឹកថា យុវវ័យ អ្នករកស៊ី និងបុគ្គលិកក្រុមហ៊ុននានាដែលមានប្រាក់ចំណូលប្រចាំខែប្រមាណ ១០០នាក់ បានជួបជុំគ្នាពិភាក្សា និងទទួលចំណេះដឹង និងយុទ្ធសាស្ដ្រគ្រប់គ្រងហិរញ្ញវត្ថុពីវាគ្គិនទាំងបីរូប កាលពីរសៀលថ្ងៃសៅរ៍ ទី២៧ ខែមេសា ឆ្នាំ២០២៤ នៅ The Atom អគារ Vattanac៕