- 2015-07-07 16:04:04
- ការអប់រំ
ម៉ូតូ១បំណះ ២០០០៛ ទេ តែបើប្រហែសប្រយ័ត្នអស់ដល់ម៉ឺន
- 2015-07-07 16:04:04
- ចំនួនមតិ 0 | ចំនួនចែករំលែក 0
ម៉ូតូ១បំណះ ២០០០៛ ទេ តែបើប្រហែសប្រយ័ត្នអស់ដល់ម៉ឺន
ចន្លោះមិនឃើញ
អាជីពការងារប៉ះកង់ម៉ូតូ ជារបរដែលប្រជាពលរដ្ឋខ្មែរគ្រប់រូបត្រូវការ ហើយរបរនេះទៀតសោត កើនឡើងព្រោងព្រាតនៅតាមដងផ្លូវក្នុងទីក្រុងភ្នំពេញ និងតាមបណ្ដាខេត្ត។ ចំពោះតម្លៃសេវាប៉ះអ៊ុតនៃរបរនេះ មានចាប់ពី ២០០០-២៥០០រៀល ទៅ ៣០០០រៀល និងពេលយប់អាចដល់ ៥០០០រៀល អាស្រ័យតាមតំបន់ ប៉ុន្តែទោះបីជាយ៉ាងណា អ្នកស្វែងរកសេវាគួរប្រុងប្រយ័ត្ន ក្រែងត្រូវជនខិលខូចស៊ីដល់ខ្ទង់ម៉ឺនក៏អាចថាបាន។
មេឃចាប់ផ្ដើមងងឹតបន្តិចម្ដងៗ ខណៈម៉ូតូធ្លាយយុវជន ស៊ុំ ផល្លី មិនហ៊ានជិះទេ សុខចិត្តបណ្ដើរ រហូតដល់កន្លែងផុតទុក្ខ «ពូ! ប៉ះមួយ»។
រវល់តែអង្គុយចុចទូរសព្ទ ស្រាប់តែសំឡេងអ្នកប៉ះបន្លឺថា «អាអូន! ដូរប៉ាវៀនទៅ ប៉ះអត់កើតទេ។ ខ្ញុំក្រឡេកខ្វាច់ រយះកន្លះចង្អុលដៃ...ដូចអត់មុតដែកគោលអីទេ ស្នាមហែកថ្មីចែស។ ផល្លី រៀបរាប់ពីបទពិសោធន៍ដែលខ្លួនធ្លាប់ជួបប្រទះដល់ Sabay ម្សិលមិញនេះ។
ដោយស្គាល់រសជាតិត្រូវគេបន្លំ និង ចេញថ្លៃពោះវៀនម៉ូតូស្មាស់រ៉េវ៉ូជិត ៥ ដុល្លារ ផល្លីសូមផ្ដាំទៅពលរដ្ឋខ្មែរថា ត្រូវតាមដានសកម្មភាពរបស់អ្នកប៉ះកង់ម៉ូតូ ក្រែងកើតករណីដូចលោក។
ម្ដងនេះមិនហែកទេ ប៉ុន្តែ ស៊ីគល់វ៉ាល់ «ហែកខ្លាចគេដឹង ព្រោះមានស្នាមថ្មីៗ»។ នេះជាការខ្សឹបប្រាប់របស់ សម្បត្តិ និស្សិតផ្នែកទីផ្សារ នៃសាកលវិទ្យាល័យ ធនធានមនុស្ស។ និស្សិតឆ្នាំមូលដ្ឋានបង្ហើបថា រូបគេដឹងល្បិចនេះ ពីជាងប៉ះកង់ម្នាក់ក្បែរផ្ទះជួលវត្តសន្សំកុសល។
សម្បត្តិ អ្នកខេត្តបាត់ដំបងបានរៀបរាប់យ៉ាងដូច្នេះថា «ទំនេរៗខ្ញុំមកអង្គុយជជែកលេងជាមួយគាត់ ហើយមានង៉ៃមួយខ្ញុំក៏ស្ដាប់ឮអ៊ីចឹងទៅ»។
ជាងប៉ះអ៊ុតមួយរូប នៅតាមបណ្ដោយផ្លូវ ១៩BT សង្កាត់បឹងទំពន់ ខណ្ឌមានជ័យបានបង្ហើបឱ្យដឹងព្រឹកមិញថា ករណីនេះពិតជាមានមែន ៖«អាហ្នឹងមាត់ទន្លេ មានមែន! មានមែន! សព្វថ្ងៃ នៅតែមាន។ បើយើងអត់មើលហែកហើយ ហែកដើម្បីដូរពោះវៀនថ្មី»។
ស្ដាប់សំឡេង
[audio mp3="http://media.sabay.com/uploads/2015/07/អ្នកប៉ះកង់ម៉ូតូ.mp3"][/audio]
លោកប្រាប់បន្តថា នៅបែកចានពេលយប់ ពោះវៀនម៉ូតូមួយ ១០ ម៉ឺនរៀល ដែលនេះជាការកេងចំណេញ មិនបាច់ដាក់ទឹក របស់ជនខិលខូច។ នៅពេលសួរថា លោកធ្លាប់ប្រព្រឹត្តទង្វើនេះទេ? អ្នកប៉ះអ៊ុតតាំងពីឆ្នាំ ១៩៩៨ រូបនេះ និយាយទាំងសម្ដីម៉ាត់ៗថា «មិនចេះរកស៊ីខូចទេលោកអើយ! ប៉ុន្មានប៉ុណ្ណុងហើយ...ពីរប៉ាណាស់ប៉ះឱ្យ តែបីប៉ាណាស់អត់ប៉ះទេ...ដូរថ្មី»។
ផល្លី និង សម្បត្តិ បានប្រាប់ថា មិនមែនអ្នកប៉ះកង់ទាំងអស់សុទ្ធតែមានកលល្បិចអាក្រក់ទេ ប៉ុន្តែក្នុងនាមជាអ្នកស្វែងរកសេវាគួរតែប្រុងប្រយ័ត្ន ព្រោះកុំឱ្យចំណាយច្រើន ឥតប្រយោជន៍យ៉ាងដូច្នេះ៕
ចុចអាន៖ ចង្កឹះខ្មែរ ស្នាដៃខ្មែរ គ្មានជាតិគីមី ១០០%
ចុចអាន៖ ជំនាញទាំង៨ ត្រូវប៉ាន់បំផុតក្នុងទីផ្សារការងារកម្ពុជា
អត្ថបទ៖ អ៊ុំ សុភក្តិ
