អង្គការមួយបង្កើតកម្មវិធីតម្រង់ទិសសម្រាប់សិស្សវិទ្យាល័យ នៅកំពង់ចាម

2017-02-26 08:09:01
ការអប់រំ

2017-02-26 08:09:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ការជ្រើសរើសមុខវិជ្ជាសម្រាប់សិក្សាបន្តនៅថ្នាក់ឧត្តមសិក្សា ពិតជាមានសារៈសំខាន់ណាស់ ជាពិសេសការជ្រើសរើសឲ្យត្រូវអាជីពសម្រាប់អនាគត និងស្របតាមទីផ្សារការងារក្នុងប្រទេសកម្ពុជា។ នៅថ្ងៃទី២៥ ខែកុម្ភៈនេះ អង្គការ Room To Read បានបង្កើតកម្មវិធីតម្រង់ទិស ក្នុងការជ្រើសរើសមុខវិជ្ជា និងអាជីពសម្រាប់សិស្សថ្នាក់ ទី១០ដល់ ទី១២ នៅក្នុងវិទ្យាល័យស្រេងគីម ស្រុកព្រៃឈរ ខេត្តកំពង់ចាម។

គោលបំណងសំខាន់នៃកម្មវិធីនេះមាន៤ គឺ៖

ផ្តល់ឱកាសដល់កុមារីក្នុងការបង្កើតទំនាក់ទំនងជាមួយសាកលវិទ្យាល័យ និងស្ថាប័ននានា
ផ្តល់ឱកាសដល់កុមារីស្វែងយល់ពីមុខវិជ្ជាដែលខ្លួនពេញចិត្ត និងស័ក្ដិសមទៅនឹងសមត្ថភាពនិងតម្រូវការទីផ្សារការងារបច្ចុប្បន្ន ។
ស្វែងយល់ពីកម្មវិធីសិក្សានៅតាមសាកលវិទ្យាល័យនីមួយៗ ដែលកុមារជ្រើសរើសបន្ត ការសិក្សាបន្ទាប់ពីបញ្ចប់ទុតិយភូមិ
លើកទឹកចិត្តដល់កុមារី ពង្រឹងសម្ថភាព និងបង្កើនទំនុកចិត្ត ក្នុងការសិក្សាដើម្បីទទួលបាន ជោគជ័យទាំងក្នុង និងក្រៅសាលា ។

អ្នកចូលរូមក្នុងកម្មវិធីនេះសរុបប្រមាណ ៣០៣នាក់ ដែលមានដូចជាប្រធានការិយាល័យមធ្យមសិក្សានៃមន្ទីរអប់រំខេត្ត ប្រធានការិយាល័យអប់រំស្រុកព្រៃឈរ បុគ្គលិកអង្គការ Room To Read និងវាគ្មិនតំណាងសាកលវិទ្យាល័យ តំណាងអ្នកសារព័ត៌មាន ផលិតករ ប្រធានក្រុមហ៊ុននានា។

សិស្សឈ្មោះ មាស ស្រីតូច រៀនថ្នាក់ទី១០ បានអះអាងថា បន្ទាប់ពីបានស្ដាប់ និង ឃើញការពន្យល់របស់វាគ្មិន នាងបានយល់ដឹងច្រើនពីការជ្រើសរើសជំនាញ។ ស្រីតូចបាននិយាយថា៖ "ខ្ញុំរៀនពូកែគ្រាន់បើ លើមុខវិជ្ជាភាសាខ្មែរ ជាពិសេសមេរៀនបែបតែងនិពន្ធ និងកំណាព្យ ដូចនេះពេលចប់បាក់ឌុប ខ្ញុំនឹងបន្តរៀនយកឯកទេស អក្សរសាស្ត្រខ្មែរ ។ បានជាខ្ញុំចង់បន្តរៀនយកថ្នាក់បរិញ្ញាបត្រអក្សរសាស្ត្រខ្មែរ ព្រោះខ្ញុំចង់ក្លាយជាអ្នកនិពន្ធដ៏ល្បី ហើយជាពិសេសខ្ញុំចូលចិត្តអានសៀវភៅច្រើន ចូលចិត្តអត្ថបទកំណាព្យ និងអត្ថបទជាលក្ខណៈតែងនិពន្ធ"។