- 2018-05-09 01:51:28
- ចរាចរណ៍
ក្ដៅៗ! ដឹងការពិតរឿងចោរជិត៣០ទូកកាត់ស្ពានបាឡេដែក ទើបសម្ពោធហើយ
- 2018-05-09 01:51:28
- ចំនួនមតិ 0 | ចំនួនចែករំលែក 0
ក្ដៅៗ! ដឹងការពិតរឿងចោរជិត៣០ទូកកាត់ស្ពានបាឡេដែក ទើបសម្ពោធហើយ
ចន្លោះមិនឃើញ
ឆ្លើយតបជាមួយ Sabay នៅព្រឹកនេះអ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានអះអាងថា មិនមានករណីចោរជិះទូកទៅកាត់ស្ពាននោះទេ។ ការផ្សាយព័ត៌មានកាលពីយប់មិញនេះ គឺជាការផ្សាយទាំងមិនបានសាកសួរសមត្ថកិច្ចច្បាស់លាស់។ កាលពីយប់មិញនេះពិតជាមានទូកជិះទៅក្រោមស្ពានបាឡេដែកមែន ប៉ុន្តែមិនមែនដើម្បីទៅកាត់ស្ពានទេ គឺពួកគេគ្រាន់តែទៅរើសកម្ទេចកំទីដែក ដែលជ្រុះនៅក្រោមស្ពាននោះតែប៉ុណ្ណោះ។ ដែកទាំងនោះ បានធ្លាក់ចូលទឹកនៅពេលកំពុងសាងសង់ និងមានតម្លៃអាចលក់បាន ទើបពួកគេនាំគ្នាទៅរើស ហើយអ្នកទាំងនោះមិនមែនជាចោរទេ។
«ខ្ញុំពិតជាមានការហួសចិត្តខ្លាំង គ្មានប្រវត្តិសាស្ត្រឯណាចោរហ៊ានទៅកាត់ស្ពាននោះទេ។ ការផ្សាយព័ត៌មានមិនពិតនេះ បានប៉ះពាល់យ៉ាងខ្លាំងដល់មុខមាត់ប្រទេសជាតិ ក៏ដូចជាក្រុមហ៊ុនសាងសង់ផ្ទាល់។» នេះជាការលើកឡើងធ្ងន់ៗរបស់លោក ម៉េត មាសភក្ដី។
អ្នកនាំពាក្យសាលារាជធានីភ្នំពេញបន្តទៀតថា លោកកំពុងទំនាក់ទំនងដល់សារព័ត៌មាននោះ ដើម្បីធ្វើការកែប្រែព័ត៌មាននោះចេញវិញ ក៏ដូចជាអប់រំណែនាំខ្លះ កុំចេះតែផ្សាយព័ត៌មានមិនពិតដល់បងប្អូនប្រជាពលរដ្ឋបែបនេះតទៅទៀត។
សូមបញ្ជាក់ថា នៅវេលាម៉ោង១២រំលងអធ្រាត្រ ឈានចូលដល់ថ្ងៃទី៩ ខែឧសភា ឆ្នាំ២០១៨ មានសារព័ត៌មានមួយបានទៅធ្វើការផ្សាយផ្ទាល់ ថាមានចោរជិត៣០ទូកនាំគ្នា ទៅកាត់ស្ពានបាឡេដែកទើបសម្ពោធដាក់ឲ្យប្រើប្រាស់។ ការផ្សាយព័ត៌មាននោះ បានធ្វើឲ្យមានការភ្ញាក់ផ្អើលជាខ្លាំងទៅដល់ប្រជាពលរដ្ឋ និងមានអ្នកចែករំលែកបន្តរាប់ពាន់នាក់។