- 2018-05-16 02:22:40
- សេដ្ឋកិច្ច
អភិបាលខេត្តព្រះសីហនុ បំភ្លឺរឿងផ្ទះសំណាក់ សណ្ឋាគារ និងម្ហូបអាហារឡើងថ្លៃ
- 2018-05-16 02:22:40
- ចំនួនមតិ 0 | ចំនួនចែករំលែក 0
អភិបាលខេត្តព្រះសីហនុ បំភ្លឺរឿងផ្ទះសំណាក់ សណ្ឋាគារ និងម្ហូបអាហារឡើងថ្លៃ
ចន្លោះមិនឃើញ
ឯកឧត្ដម យន់ មីន អភិបាលខេត្តព្រះសីហនុ បានឆ្លើយតបទៅនឹងមូលហេតុ ដែលបណ្តាលឱ្យផ្ទះសំណាក់ សណ្ឋាគារ និងម្ហូបអាហារនៅក្នុងខេត្តឡើងថ្លៃ បន្ទាប់ពីអ្នកប្រើប្រាស់បណ្ដាញសង្គមម្នាក់ បានចោទសួរទៅឯកឧត្ដមផ្ទាល់ជុំវិញបញ្ហានេះ។
ឯកឧត្ដមបានឱ្យដឹងថា កត្តាធំជាងគេ គឺការផ្គត់ផ្គង់ទាបជាងតម្រូវការ។ តម្រូវការកើនឡើង លឿនពេក ធ្វើអោយអ្នកផ្គត់ផ្គង់មិនទាន់ ដូច្នេះអ្វីៗត្រូវឡើងថ្លៃទៅតាមគន្លងនៃទ្រឹស្ដីសេដ្ឋកិច្ចទីផ្សារសេរី។ ប៉ុន្តែប្រសិនបើទាំងអស់គ្នាមើល តាមផ្លូវល្អវិញនឹងឃើញថា អ្វីៗទាំងអស់នេះ គឺជាកត្តារុញកំណើនសេដ្ឋកិច្ចយើងទាំងអស់ ដោយបងប្អូនយើងនឹងខិតខំសាងសង់ផ្ទះជួល សណ្ឋាគារ ផ្ទះសំណាក់ បន្ថែម ហើយអ្នកនេសាទ អ្នកដាំបន្លែ ក៏ត្រូវប្រឹងជាងមុន។ ជាក់ស្ដែងណាស់ ឃើញទាំងទាំងអស់គ្នា សំណង់សណ្ឋាគារ ខុនដូ និងផ្ទះជាច្រើន កំពុងស្ថិតក្នុងដំណាក់កាលសាងសង់ ហើយអ្នកខ្លះ កំពុងរកទិញដីសាងសង់ (ធ្វើឲ្យដីឡើងថ្លៃ)។
«ប្រសិនបើសំណង់ទាំងនោះត្រូវបានបញ្ចប់ដាក់ឱ្យដំណើការវិញនោះ បញ្ហាខ្វះបន្ទប់ជួល នឹងត្រូវបានដោះស្រាយជាបន្តបន្ទាប់មិនខាន ។ ចំពោះមុខនេះ បងប្អូនយើងមួយចំនួន មិនសប្បាយចិត្ត តែដំណើរវិវត្តនៃសេដ្ឋកិច្ចលូតលាស់ ធ្វើម៉េចនឹងគេច ផុតពីដំណាក់កាលនេះរួច? សូមយើងគិតតាមផ្លូវល្អថា ចំពោះមុខនេះ យ៉ាងហោចណាស់ក៏ម្ចាស់ផ្ទះជួល អ្នកនេសាទ អ្នកដាំបន្លែ កសិករយើងជាខ្មែរទាំងអស់គ្នា បានផលពីការរីកចំរើននេះដែរ»។
កន្លងមកភ្ញៀវទេសចរទៅកម្សាន្តនៅខេត្តព្រះសីហនុ និងអ្នកប្រើប្រាស់បណ្តាញសង្គម Facebook តែងរអ៊ូរទាំពីការឡើងថ្លៃបន្ទប់ផ្ទះសំណាក់ សណ្ឋាគារ និងម្ហូបអាហារជាដើម ដែលសកម្មភាពនេះ បានកើតឡើងមានព្រមគ្នានឹងកំណើនទេសចរជនជាតិចិនមកទស្សនានៅខេត្តព្រះសីហនុយ៉ាងគំហុក។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាប្រាប់ sabay ឲ្យដឹងថា កន្លងមកភ្ញៀវទេសចរ តែងរអ៊ូរទាំជុំវិញបញ្ហានេះ ក្នុងនោះមិនមែនតែអ្នកទេសចរខ្មែរទេ សូម្បីភ្ញៀវអឺរ៉ុបក៏លើកឡើងពីបញ្ហាតម្លៃនេះដែរ។ អ្នកស្រីថា បើសិនជាផ្នែកពាក់ព័ន្ធមិនអាចដោះស្រាយបានទាន់ពេលអនាគតខេត្តព្រះសីហនុនឹងក្លាយជាគោលដៅទេសចរសម្រាប់តែអ្នកមានចំណូលខ្ពស់ប៉ុណ្ណោះ។
«ខេត្តព្រះសីហនុ គឺជាខេត្តដែលមានសក្ដានុពលទេសចរយើងចង់ឃើញគ្រប់គ្នាអាចទៅកម្សាន្តទីនោះបានទាំងភ្ញៀវជាតិ និងអន្តរជាតិជាពិសេសភ្ញៀវមកពីអឺរ៉ុប ដោយមិនពឹងតែភ្ញៀវជនជាតិចិននោះទេ។ សៀមរាបគឺជាខេត្តគោលដៅ ទេសចរធំមួយរបស់កម្ពុជា ប៉ុន្តែបញ្ហាតម្លៃផ្ទះសំណាក់ សណ្ឋាគារ និងម្ហូបអាហារជាដើមមិនហក់ឡើងខ្លាំងដូចព្រះសីហនុពេកទេ”។
លោក តាំង វិចិត្រគ្រឹះស្នា ប្រធានមន្ទីរទេសចរខេត្តព្រះសីហនុបានថ្លែងប្រាប់ Sabay ថា បន្ទប់ផ្ទះសំណាក់ និងសណ្ឋាគារនៅខេត្តព្រះសីហនុបច្ចុប្បន្នមានចន្លោះពី ៨០០ បន្ទប់ទៅ ៩០០បន្ទប់ប៉ុណ្ណោះ។ ដូច្នេះទើបតម្រូវឱ្យមានការសាងសង់ថ្មីបន្ថែមទៀត កាលពីឆ្នាំ ២០១៧ ដែលអ្នកវិនិយោគភាគច្រើនជាជនជាតិចិន។ ដូច្នេះនៅឆ្នាំ២០១៩ ខាងមុននឹងមានសណ្ឋាគារកម្រិតផ្កាយ៥ ចំនួន៤បន្ថែមទៀត ដាក់ឱ្យដំណើរការ។
ឆ្នាំ២០១៧កន្លងមកខេត្តព្រះសីហនុទទួលបានភ្ញៀវទេសចរជិត ២លាននាក់ ក្នុងនោះជាង ៤០ម៉ឺននាក់ គឺជាភ្ញៀវបរទេស ហើយខេត្តនឹងបន្តរក្សាកំណើនបែបនេះបន្តទៀតក្នុងរង្វង់ចន្លោះពី ១០% ទៅ១៥%។ និយាយដោយឡែកតែភ្ញៀវជនជាតិចិនគឺបានកើនឡើងជាង ១០០%។ ដូច្នេះធម្មតាកាលណាភ្ញៀវទេសចរកើនឡើងយើងត្រូវការផ្គត់ផ្គង់ ច្រើនទាំងកន្លែងស្នាក់នៅ និងផ្នែកសេវាកម្មកម្សាន្ត៕