សាលាប៉ូលិសថៃ ហាមមនុស្សស្រីចូលរៀន ចាប់ពីឆ្នាំ ២០១៩ តទៅ

2018-09-04 02:06:38
ព័ត៌មាន

2018-09-04 02:06:38
ចំនួនមតិ 0 | ចំនួនចែករំលែក 0

ចន្លោះមិនឃើញ

សាលាគរុកោសល្យរបស់នគរបាលថៃ បានប្រកាសកាលពីថ្ងៃអាទិត្យថា ពួកគេនឹងទទួលយកតែបុរសឲ្យចូលរៀនប៉ុណ្ណោះ ចាប់ពីឆ្នាំក្រោយទៅ ដោយគ្មានការពន្យល់ហេតុផលណាមួយឡើយ។

អាជ្ញាធរបាននិយាយថា ស្ត្រីនឹងមិនត្រូវបានអនុញ្ញាតឲ្យចុះឈ្មោះចូលរៀន នៅសាលាប៉ូលិស Royal Police Cadet Academy ចាប់ពីឆ្នាំ ២០១៩ តទៅ ដែលធ្វើឲ្យមានការព្រួយបារម្ភក្នុងចំណោមសកម្មជនថា ករណីរំលោភផ្លូវភេទអាចទទួលបានការយកចិត្តទុកដាក់តិចតួច ដោយសារតែការថយចុះមន្ត្រីប៉ូលិសស្រី។

លោក Worawut Sripakhon រដ្ឋបណ្ឌិត្យសភានៃគរុកោសល្យ បានថ្លែងកាលពីព្រឹកថ្ងៃច័ន្ទតាមទូរស័ព្ទថា «វាជាគោលនយោបាយ យើងមិនត្រូវបានអនុញ្ញាតឲ្យផ្ដល់ព័ត៌មានបន្ថែមទៀតនោះទេ»។

លោកស្រី Supensri Puengkhokesoong សកម្មជនសុខុមាលភាពរបស់ស្ត្រី និងជានាយកមូលនិធិលើកកម្ពស់សមភាពសង្គម Social Equality Promotion Foundation បាននិយាយថា ការហាមប្រាមនេះបានប្រឆាំងទៅនឹងច្បាប់សមភាពយេនឌ័ររបស់ប្រទេសថៃ Thailand’s Gender Equality Act ហើយអាចកាត់បន្ថយការយកចិត្តទុកដាក់ ចំពោះករណីចាប់រំលោភផ្លូវភេទ និងបញ្ហាផ្សេងទៀតដែលពាក់ព័ន្ធនឹងស្ត្រី ឬកុមារ។

លោកស្រី Supensri បានឲ្យដឹងទៀតថា «យោងទៅតាមច្បាប់ ប្រសិនបើស្ត្រីម្នាក់ត្រូវបានគេរំលោភបំពានផ្លូវភេទ មន្ត្រីប៉ូលិសទទួលបន្ទុករឿងក្ដីរបស់ពួកគេ ត្រូវតែជាស្ត្រី ហើយករណីពាក់ព័ន្ធនឹងគ្រួសារ និងកុមារ មន្ត្រីនគរបាលត្រូវតែមានជំនាញទំនាក់ទំនង ក៏ដូចជាចំណេះដឹងអំពីសិទ្ធិមនុស្សស្រី និងកុមារផងដែរ»។

ជាមួយគ្នានេះដែរ លោកស្រី Supensri បានបន្ថែមថា ស្ត្រីដែលបានចូលធ្វើការនៅបណ្ឌិត្យសភា សម្រាប់ឆ្នាំសិក្សា ២០១៩ នឹងមានការខកចិត្តមិនខាន ចំពោះគោលនយោបាយថ្មីនេះ បន្ទាប់ពីបានចំណាយទាំងពេលវេលា និងថវិកា។

គួរបញ្ជាក់ឲ្យដឹងថា សាលាគរុកោសល្យប៉ូលិសថៃ បានបើកដំណើរការនៅឆ្នាំ ១៩០១ ហើយបានអនុញ្ញាតឲ្យស្ត្រីចុះឈ្មោះចូលរៀន នៅឆ្នាំ ២០០៩។ ចាប់តាំងពីពេលនោះមក វាបានបង្កើតប៉ូលិសស្រីប្រហែល ៧០០ នាក់៕