- 2019-09-25 05:52:53
- សេដ្ឋកិច្ច
អ្នកស្រី អ៊ុន ណារីន៖ ទំនួលខុសត្រូវ និងភាពស្មោះត្រង់រកស៊ីអ្វីក៏ទទួលភាពជោគជ័យ
- 2019-09-25 05:52:53
- ចំនួនមតិ 0 | ចំនួនចែករំលែក 0
អ្នកស្រី អ៊ុន ណារីន៖ ទំនួលខុសត្រូវ និងភាពស្មោះត្រង់រកស៊ីអ្វីក៏ទទួលភាពជោគជ័យ
ចន្លោះមិនឃើញ
“ទំនួលខុសត្រូវចំពោះអតិថិជន និងភាពស្មោះត្រង់ចំពោះអតិថិជន រកស៊ីអ្វីក៏ដោយទទួលបានជោគជ័យ”។ ទាំងនេះគឺជាចំណាប់អារម្មណ៍របស់អ្នកស្រី អ៊ុន ណារីន ម្ចាស់សិប្បកម្មរក្សាលក់គ្រឿងចម្លាក់ស្ពាន់ បានថ្លែងក្នុងកិច្ចសម្ភាសជាមួយនឹង sabay កាលពីពេលថ្មីៗនេះ។
មានប្រវត្តិជាយុវតីកំព្រាឪពុក ក្នុងជីវភាពខ្សត់ខ្សោយរស់នៅក្នុងស្រុកបារាយណ៍ ខេត្តកំពង់ធំ អ្នកស្រីយល់ថា ភាពជោគជ័យមិនមែនកើតឡើងដោយឯកឯងនោះទេ តែត្រូវមានភាពអំណត់ តស៊ូ និងក្តីស្រលាញ់ចេញពីបេះដូង ចំពោះកិច្ចការងារ ដែលខ្លួនកំពុងធ្វើ ពិសេសត្រូវមានទំនួលខុសត្រូវ និងភាពស្មោះត្រង់ចំពោះអតិថិជន។
ចាប់កំណើតនៅភូមិត្រស់ ឃុំបល្ល័ង្គ ស្រុកបារាយណ៍ ខេត្តកំពង់ធំ មានបងប្អូនបីនាក់ និងជាកូនច្បងគេ។ ម្ដាយប្រកបរបរធ្វើស្រែ និងលក់ដូរតិចតួច ដើម្បីចិញ្ចឹមកូន ខណៈលោកឪពុកបានបាត់បង់ជីវិតដោយសារជំងឺកាលពីឆ្នាំ២០០៦។
ទោះជាកើតនៅក្នុងគ្រួសារទីទាល់ក្រនៅទីជនបទ ក៏អ្នកស្រី មិនរាថយ ក្នុងការសិក្សារៀនសូត្រ និងចាប់យកមុខជំនាញមួយដែល ខ្លួនពេញចិត្ត ដើម្បីមានអនាគតមួយដ៏ត្រចះត្រចង់។ ក្រោយប្រលងសញ្ញាប័ត្រមធ្យមសិក្សាទុតិយភូមិ(បាក់ឌុប) អ្នកស្រីបានឡើងមករាជធានីភ្នំពេញ រៀនជំនាញសំអាងការ ដោយមិនបានចូលរៀននៅមហាវិទ្យាល័យដូចមិត្តភ័ក្ដិដទៃទៀតឡើយ។ អ្នកស្រីត្រូវធាក់កង់ពីម្តុំផ្សារទួលគោក មករៀននៅម្ដុំផ្សារដេប៉ូជារៀងរាល់ថ្ងៃ ខណៈពេលនោះបានស្នាក់នៅជាមួយសាច់ញាតិ។ អ្នកស្រីត្រូវរៀនផង ធ្វើការងារឱ្យគេផង និងត្រូវផ្លាស់ប្ដូររៀនពីរបីកន្លែង ធ្វើយ៉ាងណា ដើម្បីបានចេះជំនាញមួយច្បាស់លាស់។
“អញ្ចឹងដើម្បីបានតម្រិះយើងនៅជួយមេជាង ដល់ម៉ោងប្រាំពីរ ឬប្រាបីយប់ ចង់បានក្តីស្រលាញ់ពីមេជាងគឺត្រូវតែនៅជួយគេ។ ចេញទៅផ្ទះវិញមេឃរលឹមស្រេចៗអញ្ចឹង ជិះកង់កាត់ភ្លៀង មានអារម្មណ៍ស្រណោះខ្លួនទឹកភ្នែកក៏ស្រក់មក ទាំងហេវទាំងហត់ និងត្រូវធាក់កង់ផ្លូវឆ្ងាយ តែជម្នះឱ្យបាន”។
ដោយភាពជឿជាក់លើសមត្ថភាពខ្លួនអ្នកស្រី បានបើកហាងសំអាងមួយនៅម្តុំផ្សារឌុយម៉េចរាជធានីភ្នំពេញ។ បើកបានមួយរយៈ អ្នកម្ដាយមានជំងឺក៏បានវិលទៅកាន់ស្រុកកំណើតវិញ ដើម្បីមើលថែម្ដាយ។ លុះក្រោយមកដោយសារ មានប្អូនជីដូនមួយជាជាងទង ហើយអ្នកស្រីជាជាងសំអាងស្រាប់ ក៏បែកគំនិតចង់ផលិតគ្រឿងសំអាងធ្វើពីចម្លាក់ស្ពាន់ និងប្រាក់មានជាអាទិ៍ ក្រវិល កងដៃ ខ្សែដៃ ខ្សែក និងខ្សែវ៉ាត់ជាដើម ខណៈតម្រូវការគ្រឿងសំអាងពេលនោះកំពុងមានទីផ្សារក៏សម្លឹងមើលឃើញឱកាសមួយនេះ។
នៅអំឡុងឆ្នាំ២០១៦ ដោយក្ដីស្រលាញ់ការងារចម្លាក់ស្ពាន់ និងវត្ថុបុរាណ ដែលជាមរតកដូនតាបានបន្សល់ទុកឱ្យ សិប្បកម្មចម្លាក់ស្ពាន់ផលិតដោយដៃមួយត្រូវបានបង្កើតឡើង ចូលហ៊ុនគ្នាជាមួយនឹងប្អូនជីដូនមួយ ដែលបច្ចុប្បន្នមានទីតាំងស្ថិតនៅម្ដុំពោធិ៍ចិនតុង។
យ៉ាងណាមិញមុនបើកសិប្បកម្មឱ្យដំណើរការ អ្នកស្រី និងប្អូនជីដូនមួយបានចំណាយពេលជិតកន្លះឆ្នាំទៅលើការរៀបចំរោងសិប្បកម្ម ម៉ាស៊ីនក្រូម៉េស្ពាន់ ម៉ាស៊ីនផ្សារ ម៉ាស៊ីនចាក់ពុម្ព និងវត្ថុធាតុដើម ពិសេសរចនាបថចម្លាក់តែម្តង។
បច្ចុប្បន្នសិប្បកម្មចម្លាក់ស្ពាន់ របស់អ្នកស្រីកំពុងមានមានឈ្មោះបោះសម្លេង និងទទួលបានការគាំទ្រពីអតិថិជន និងបានចែកចាយនៅតាមបណ្ដាផ្សារខេត្តក្រុងស្ទើរទូទាំងប្រទេស ពិសេសបានផ្ដល់ការងារដល់បុគ្គលិកជិត៣០នាក់ផងដែរ។ អ្នកស្រីមិននឹកស្មានថា ជំនួញនេះទទួលបានការគាំទ្រពីអតិថិជនហួសការស្មានយ៉ាងដូច្នេះឡើយ។ ការទទួលជោគជ័យឆាប់រហ័សបែបនេះ មានកត្តាបី មានកត្តាយ៉ាងទី១ គុណភាពផលិតផលល្អ (ក្រូម៉េស្អាតមើលមិនដឹងស្មានថាមាស) ទី ២មានទំនួលខុសត្រូវ និងទី៣ ភាពស្មោះត្រង់ចំពោះអតិថិជន។
អ្នកស្រី ណារីន មានមហិច្ឆតាចង់ពង្រីកសិប្បកម្មខ្លួនជាអាណាចក្រគ្រឿងសំអាងធ្វើពីស្ពាន់ និងប្រាក់ ដើម្បីបន្តលើកស្ទួយសិល្បៈវប្បធម៌ខ្មែរ ដែលបន្សល់ពីដូនតា ជាមួយនឹងការពង្រីកទៅកាន់ទីផ្សារបរទេស។
អ្នកស្រីបានផ្តាំផ្ញើទៅយុវតីត្រូវមានការតស៊ូអត់ធ្មត់ បើបរាជ័យកុំបាក់ទឹកចិត្ត និងកុំគិតថា ខ្លួនគ្មានសមត្ថភាពត្រូវតែខំក្រោកឈរបន្តទៀត គេអាចធ្វើយើងក៏អាចធ្វើបានដែរ៕
