- 2015-08-23 23:06:14
- ការអប់រំ
ទីតាំងថតចម្លងជុំវិញមណ្ឌលប្រឡងត្រូវបិទពីរថ្ងៃ បើរឹងរូសអាចមានទោសព្រហ្មទណ្ឌ
- 2015-08-23 23:06:14
- ចំនួនមតិ 0 | ចំនួនចែករំលែក 0
ទីតាំងថតចម្លងជុំវិញមណ្ឌលប្រឡងត្រូវបិទពីរថ្ងៃ បើរឹងរូសអាចមានទោសព្រហ្មទណ្ឌ
ចន្លោះមិនឃើញ
ក្រសួងអប់រំ យុវជន និងកីឡានឹងបិទទីតាំងថតចម្លងសំណៅឯកសារនានាដែលនៅកៀកនឹងមណ្ឌលប្រឡងរយៈពេលពីរថ្ងៃ ចំសម័យប្រឡងមធ្យមសិក្សាទុតិយភូមិថ្ងៃទី ២៤ និង ២៥ សីហាខាងមុខ។
អ្នកនាំពាក្យក្រសួងអប់រំ យុវជន និងកីឡា លោក រស់ សាលីននិយាយថា ការប្រកាសឲ្យបិទនេះគឺដើម្បីធានាឲ្យមានភាពរលូននៅពេលប្រឡង និងការពារបាតុភាពអសណ្ដាប់ធ្នាប់ផ្សេងទៀត។ លោកបានឲ្យដឹងទៀតថា ទីតាំងថតចម្លងណាមួយរឹងទទើសមិនព្រមស្តាប់ការណែនាំនេះ ពួកគេអាចនឹងទទួលការព្រមានពីស្ថាប័នពាក់ព័ន្ធ ហើយបើសិនជារកឃើញថា ទទួលការព្រមានហើយនៅតែបន្តសកម្មភាពដដែលទៀតនោះពួកគេអាចនឹងត្រូវរងការចោទប្រកាន់ដល់បទព្រហ្មទណ្ឌក៏មាន។
លោករំលឹកដែរថា កាលសម័យប្រឡងមធ្យមសិក្សាទុតិយភូមិឆ្នាំ ២០១៤ កន្លងទៅ មានម្ចាស់អាជីវកម្មថតចម្លងម្នាក់នៅខេ្តតាកែវបានកេងចំណេញដោយកូពីឯកសារមេរៀនធម្មតា បោកបញ្ឆោតបេក្ខជនដែលត្រូវប្រឡងថា ជាវិញ្ញាសាបែកធ្លាយ និងលក់យកផលចំណេញខ្លួនឯង។ ពេលនោះ ម្ចាស់អាជីវកម្មបានទទួលការព្រមានពីស្ថាប័នពាក់ព័ន្ធ តែនៅតែរឹងរូសរហូតត្រូវចោទប្រកាន់ពីទោសទណ្ឌផ្សេងទៀតបន្ថែមពីលើនោះ។
ងាកមក ការធានាកុំឲ្យវិញ្ញាសាបែកញែកចេញទៅក្រៅ លោកថា វិញ្ញាសាត្រូវបានដឹកទៅដល់មណ្ឌលប្រឡងតាំងពីថ្ងៃទី ២០ ម្ល៉េះដោយមានការត្រួតពិនិត្យ និងការការពារពីអ្នកសង្កេតការណ៍មកពីក្រសួង និងអង្គភាពប្រឆាំងអំពើពុករលួយ។ ហើយបើសិនមានករណីបែកធ្លាយវិញ ឯកឧត្ដមសង្កត់ធ្ងន់ថា នរណាអ្នកធ្វើអ្នកនោះជាអ្នកទទួល៕
អត្ថបទ៖ ប្រាក់ ចាន់សីហា
