នាយកវិទ្យាល័យនៅកំពង់ចាមសង្ឃឹមតិចតួចចំពោះសិស្សជាប់និទ្ទេស A ឆ្នាំនេះ

2015-09-07 20:33:08
ការអប់រំ

2015-09-07 20:33:08
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅមុនការប្រកាសលទ្ធផល នៃការប្រលងបាក់ឌុប នាថ្ងៃទី ១៥-១៦ ខែ កញ្ញានេះ នាយកវិទ្យាល័យពីរ ក្នុងខេត្តកំពង់ចាម បានឲ្យដឹងថា សិស្សានុសិស្សប្រលងបាក់ឌុបឆ្នាំនេះសង្ឃឹមជាប់ច្រើន តែក្ដីសង្ឃឹមទទួលលទ្ធផលនិទ្ទេស A តិចតួច។

គេនៅចាំបានថា ក្នុងចំណោមអ្នកជាប់និទ្ទេស A ១១ នាក់ កាលពីឆ្នាំមុន ក្នុងនោះ មានសិស្សខេត្តកំពង់ចាម មកពីវិទ្យាល័យសម្ដេច ជួន ណាត តែគេនៅមិនទាន់ដឹងថា ឆ្នាំនេះ ខេត្តកំពង់ចាម នឹងអាចរកឃើញសិស្សជើងខ្លាំងដូចកាលពីឆ្នាំ ២០១៤ ទៀតឬអត់?

លោក ឡុង ហៀង ជានាយកវិទ្យាល័យសម្តេច ជួន ណាត បានប្រាប់ភ្នាក់ងារ Sabay ថា “ ការទាយទុកមុន គឺមិនអាចនិយាយបានត្រឹមត្រូវ ១០០% ទេ តែបើសង្ឃឹម ជាប់វិញប្រហែលពី ៦៥ ទៅ ៧០% ដោយមិនគិតពីនិទ្ទេស។ ចំណែកបើនិយាយពីនិទ្ទេស A វិញពិតជាពិបាកប្រាប់ណាស់ថាជាប់ឬមិនជាប់ ប៉ុន្តែ បើសង្ឃឹមវិញ គឺតិចតួចបំផុត” ។ ទោះបីជាយ៉ាងណាក៏ដោយ លោកនាយកនៅតែសង្ឃឹមថា សិស្សរបស់គាត់អាចដណ្តើមបាននិទ្ទេស A ម្នាក់ ឬ ពីរនាក់។ លោក ឡុង ហៀង បន្ថែម។

ចំណែក លោក ផាវ សុផល នាយកវិទ្យាល័យ ព្រះសីហនុ វិញ ដែលសិស្សរបស់គាត់ចំនួន ៦៤៤នាក់ បានប្រឡងបាក់ឌុបដែរនោះ បានឆ្លើយតបនឹងសំណួររបស់ភ្នាក់ងារ Sabayថា “ចំពោះសេចក្តីសង្ឃឹមថា សិស្សរបស់គាត់ជាប់និទ្ទេស A គឺយើងមិនអាចនិយាយបានទេ ព្រោះបើយើងថាមិនជាប់តែបែរជាជាប់ ហើយបើថាជាប់ស្រាប់តែមិនជាប់ទៅវិញនាំឱ្យពិបាក” ។ លោកនាយកបន្តថា “ និទ្ទេស A សង្ឃឹមតិច តែបើនិទ្ទេស B គឹសង្ឃឹមច្រើន ហើយបើលទ្ធផលជាប់ដោយមិនគិតពីនិទ្ទេសវិញ គឺប្រហែលជា ៧០%“៕